عــزة الــنــفـس - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

03-30-2022, 12:22 PM

عزة النفس

لو جرعوك العلقم المُر بالكاس=ودنياك ضاقت مثل خيط بمسلّه
وتوغل بصدرك من الهم هوجاس=ما لك عضيد ولا سند أو مظلّه

بعض البلاوي جاتك وكنت محتاس=زود المصايب فيك مليون علّه
وابليس يظهر لك على شكل وسواس=يعرض عيك ان المشاكل يحلّه

لا تشتكي همّك ولو صابك اليأس=واصبر على جور الزمن لا تِمِلّه
ولا تسمع قوال الأباليس الأنجاس == الي يحدونك على كل زلّه

الله خلقنا الوان واشكال واجناس=والي يخافون الله اليوم قِلّه
إلأنبياء الله ابتلاهُم ولا باس====إن ابتلانا كلنا تحت ظِلّه

وصبرك على نفسك ترى درع ولباس=من زمرةٍ أفكارهُم مضمحله
سرك ولا تفشيه حتى لقرطاس = واحشم لسانك عن سوالف مُمِلّه

والي فشا أسرار بيته ولا قاس=====بعض البشر تسمع له وتستغلّه
صيت الغنى أكرم عليك من الأفلاس=ومن لا ستر حاله عن العيب قِل له

الي يقع ما بين الأقدام ينداس=وانت العفيف أبيض وناصع سِجلّه
خلك عزيز النفس شامخ وحساس = لو يسألوك تقول دنياي فُلّه

ولا صرت بعيون المخاليق نوماس=ولك مجلسٍ كل الخلايق تِدلّه
أفضل من الي يملك التبر والماس=وله مجلسٍ مقفول محدٍ يصلّه

بعض المجالس ما بنوها على ساس=إرفع مقامك عَنّها فوق تلّه
ولا تجلس الأ في صدر خير مجلاس=وجنب مكان الغير لا تستحلّه

واظهر شديد العزم والحزم والبأس=ما في على السانك سوى الحمد لله
وان كنت ثوب الطيب والعز لباس ===== حديثك بذكر الله بتستهلّه

تفخر بعزة نفسك وترفع الراس=شانك عظيم وتازن الكون كِلّه
وخلك عزيز وبين الأجواد نبراس==كل الخلايق تحترمه وتجلّه

ولا تبوح في سرك لو تعد الأنفاس=الصبر مفتاح الفرج في محلّه
غير الشماته ما يطولك من الناس==شكوى لغير الله عار ومَذلّه

ومحمد الي عد ما هب نسناس=صلوا عليه الخلق من كل مِلّه

الشاعر ناجي الصقار
.