بسم الله الرحمن الرحيم

قصيدة الشاعر نواف الحصبان الصقري العنزي بالشيخ مسلط بن زبن بن محروت الهذال

هذي القصيدة القيت امام الشيخ مسلط بن زبن بن محروت الهذال شيخ مشايخ عنزة

تخجل الحروف وتستحي الكلمات لان مهما قيل فيك من الشعر لايوفيك حقك يا مسلط الهذال يا رمز لكل عنزي

وهذا حققك واقل من حقك يا ابو فهد تستحق الكثير




بادي بذكر اللي يسوق الهبايب...............الواحد اللي كل الاسلام ترجيه
طالبك ياجذل العطا والوهايب.................يالله تعز الشيخ مسلط وتنجيه
عقب الشيوخ اللي تفك النشايب...........شيخ الشيوخ اللي عريب مجانيه
ماشيخته شيخات عضوٍ ونايب..............علمه وتاريخه من المجد مكفيه
فعله مثل جده عطيب الضرايب............وابوه من طيب المراجل مغذيه
عن واجبات الناس ماهو ابغايب............ومن دز له دعوه يزوره وياتيه
ولاهو مثل بعض الشيوخ الجلايب.........اللي على ربعه رديه مســاعيه
مسلط امشاركنا الفرح والمصايب ..........هذا يجي عرسه وهذا يعزيــه
كل عنزه للشيخ مسلط قرايـــــب...........وكل عنزه باللازمه تعتزي فيه
ابو فهد وشلك ابعوج الطلايـــب............كل يقول ونعم لاحل طاريــــه
وفهد ولد مسلط عن الشيخ نايب...........يقوم بالواجب عسى الله يخليــه
وجيت فهد اطفت علينا اللهايب ........على عزانا الشيخ مسلط اموصيه
حلياه حراً فوق روس الجذايب...........والحر الاشقر بينات مواريــــه
والنعم بالهذال شبا وشايـــــب..............والكل منهم طيبات مماشيــــه
اخوات بتلا يوم دور الحرايب............افعالهم بالشرق والغرب توحيه
وحنا سندهم بالليال الصعايب.............تظهر مواقفنا نهار المكاريـــــه
لأهل البويضا واجلويه سبايب............يوم انتخينا عند وضح مداليـــه
حنا الصقور مجسره كل هايب .........ننزل قفار الخوف والذود نحميه
واليا ركبنا فوق عوص النجايب.........كم ذود قوم نشلعه من مفاليـــــه
وهذا زمان شفت فيه العجايب ............فيه الردي ينكر تراثه وماضيه
ومن ينكرالماضي من الناس عايب.....ماله معا اهل الطيب فعل ايجديه
ترا الردي في كل الاحوال خايب .........الناس ما تبدي عليه المشاريه
وصلوا عدد ماهل وبل السحايب........على الرسول بتالي القول نهديه

الشاعر: نواف محمد الحصبان الصقري العنزي