في ضيفة أسرة العطية في قطر - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

06-07-2010, 05:15 PM

( أسرة العطية في قطر )
أسرة العطية في قطر أسرة معروفة من أعرق وأشهر الأسر المتحضرة ويتفرع من العطية عدد من الأسر منهم رجال افاضل ذوي مناصب ورتب وهم من قبيلة بني حنيفه من بكر بن وائل من جديلة من ربيعة وموطنهم الأصلي قديماً كان منفوحة وهي قرية قديمة تقع جنوب شرق الرياض وأصبحت حالياً من أحياء الرياض ثم نزحوا إلى الدرعية وهي قرية تقع شمال غرب الرياض في عهد مقرن بن مرخان ثم نزح الشيخ علي بن عمر بن عطية إلى عين دار وأمضى بها عامين ثم نزل في العقير وأمضى هناك خمس وعشرون عاماً ثم نزل في قطر واستقر في قطر واشتهر من ذريته عطية وأصبح عمود نسب الأسرة وعرفت به وهو عطية بن عبدالله بن دواس بن دجين بن مرخان وهو غير مرخان جد الأسرة السعودية ولأسرة العطية مصاهرة قديمة مع حكام قطر آل ثاني ووسم أبل العطية المشغار والشواهد على الفخذ الأيمن ولهذه الأسرة تاريخ مجيد ورد في عدد من المصادر
وقلت هذه القصيدة بزيارتي الأولى لأسرة العطية أثني على الرجل الفاضل ناصر العطية :
شـديـت قـطـّاع الـديـار الـخـلــيـــه *** مديـل خـمس بلـوحـتـه واستـمـاره
يـطـوي مهـامـيـه الـخـلا والـدويـه *** بــوج الفـيـافـي نـاجـح باخـتـبـاره
الـجـيـب للمشـوار يـنـجـب مطـيــه *** يـرتـاح سـواقـه الـيـا لــف طـــاره
أنـا اشهـد أن الجـيـب ما فـيـه زيـه *** مـن وارد الـيـابـان تـم اخـتــيــاره
يـوم الربـوع الجـيـب مـد ضحويـه *** ثـالـث ربـيـع أول بــدايــة نـهــاره
بـعـد المسـافـه بـالعـدد سـت مـيـه *** مـع الطـريـق الـلي وسـيـع مسـاره
مـد الصبـاح مـن الـرياض العـذيـه *** للشـرق والهـفـوف حـطـه يـسـاره
بـاج الصحـاري والـديـار الفـضيـه *** مـقـصـوده الـدوحـه بـلاد الـزبـاره
قـصـده قـطـر دار الـرجـال الشفيـه *** دار الـزعـيـم الـلي زهـتـه الأمـاره
دار ابن ثانـي ريـف ربـعـه وحـيـه *** فــخـر تميـم الـلي قـديـم افـتـخـاره
تـاريـخـهـم مـعـروف بـالجـاهـليـه *** مـثـل الـعـلـم فـوق الشوامخ منـاره
مـقـدامـهـم شـيـخ عـزومـه قـويـه *** مـا لان عـزمه لـو تـليـن الحـجـاره
عـسـى بـلـدهـم دوم تـبـقــا مـريـه *** يـشمـخ مبـاني نهـضتـه والعـمـاره
حـزّت طـرالــي بـالتـفـاكـيـر نـيـه *** نـويـت أزور الـلـي رفــيـع وقــــاره
عنيـت أبـي ناصرعـريـب السميـه *** مالـي غـرض لكـن نـصيتـه زيـاره
ابـو عبدالـلـه مـن قـروم العـطـيـه *** الـنـافـليـن أهـل الـكـرم والجـسـاره
الـوايـلي فـيـه الصخى والـحمـيـه *** يـلـقــا الـحـفـاوه كـل مـن زار داره
زرتـه مـحـبـه والـضـمـايـر نـقـيـه *** جـيـت وتـلـقـاني بـرحـب وحـراره
زيـن النـبـا للضيـف نـفسه رضيـه *** غـمـرني بـجـوده ولـطـف العـبـاره
شهـم الرجـال الـلي كـفـوفـه نـديـه *** يـبـذل حـلالـه مـا حسـب للخسـاره
ما دار مـن بـذل الـكـرامـه جـزيـه *** ألا و لا يـعـرف الـريـاء والـقـمـاره
اطـلـب عـسى يـحمـيـه رب البريـه *** ترفـع لـه البيضا عـلى راس قـاره
الـلـه يـعــيـذه مـن بــلا كـل سـيّـــه *** وعسـاه يـرفـل بـالهـنـا عـز جـاره
وعسى حـيـاتـه بـالسـعـاده هـنـيـه *** يـبقـا عـزيـز بحشمتـه واعـتبــاره
ساسـه عـريـب وعـزوتـه وايـليـه *** اهـل الشجـاعـه والـكـرم والنـمـاره
مـن لابـة تـرقـى الـبـروج العـلـيـه *** مجلاسهـم بـيـن العـرب بالصـداره
افعـالهـم بـالـطيـب مـا هـي خـفـيـه *** تعـرفهـم البـدوان وأهـل الحضاره
مـن مـارثـة دواس مـاهــم هـفـيـه *** الـمـجـد والـعـزة خـذوه بـجـــــداره
مـا يـقـربـون الـعـايـزه والـرديــــه *** والـكـل منهـم طـاب سلـمـه وكـاره
وصـلـوا عـلى سيـد الخـلايـق نبيـه *** المصطـفى بالحـق جـاب البشـاره

وقد تشرفت بزيارة العطية للمرة الثانية في يوم السبت الموافق الحادي والعشرون من شهر جماد الآخرة ووجدت كل الحفاوة والأكرام وقلت هذه الأبيات المتواضعة مهداه مع التحية والإجلال إلى رجال أسرة آل عطية الكرام في قطر :
القاف بالمدح يصفي عذب نقروحه *** يـزدان نـظـمه بالحمايـل وتنظيـمـه
الطيّـب اجهـر بـه التمجيـد وابـوحه *** ولا يـنفـع الـلاش تبجيلـه وتفخيمه
لي الشرف بـزيـارة الـربع بالدوحه *** نوادر شخوص العطية هـل الشيمة
ولـي الشرف أكتب بتمجيدهم لوحه *** ولي الشرف مدحهم اجهر بتعميمه
لـو كـان شهادتي بالـربع مجـروحه *** قصد الكلام أعرف حلاله وتحريمه
اضهـر ثـناهـم والحواسيد مكسوحه *** الـلي نواظـرهـم عن الطايلـه نيمـه
ولا العـطيـه صقـور تـبـعـد الشوحـه *** من مصقرتعطب الجزله صواريمه
العزالأقعس رقوا في عالي صروحه *** ومن حازعلم المراجل حق تقديمه
رجالهم بالفخر صوب العلا اشبوحه *** نـال العـلا بفهمه وعـرفـه وتعليمة
أدناهـم الـلي حصّل العـلـم بطروحه *** توفيق من ربـه وعـزمه وتصميمه
من يـبلغ الطـايـلـه نعـتـز بـنجـوحه *** يستاهـل المنصب العـالي وتكريـمه
لـهـم فعـايـل بكتـب المجد مشروحه *** نـفخـر بها ما هـي تصنّع وترهيمه
ما منهم اللي بجوفه نفس مشفوحه *** نسل النبـيـل الـلي قـليلـه مثـاليـمـه
أحفـاد ليـث نـزح من دار منفـوحـه *** علي بن عمر صاحب القدر والقيمة
أهل مضايف من أجل الضيف مفتوحه *** زبن الدخيل اللي عليهم شكاظيمه
للضيف ريف وزلة الجار مسموحه *** ودخيلهم يصعب على اعداه تسليمه
لا جـاهم الضيف لـه الشـاة مذبـوحه *** يـوم القصى والجفا والفقر والعيمه
واليوم بفضل الولي عاشوا ابحبوحه *** في ضل حاكم عسى رب الملأ يديمه
حمد منار الدجى يسرى على ضوحه *** شيخ يـمينـه تشابـه هـاشل الغـيمه
ياما مسح دمعـة يـتـيـم عـقـب نـوحه *** ويا ما فـرج هم من يشكي مغاريمه
شعبـه رفـع قـدره وفـكـّر بمصلـوحه *** منهاج شرع الولي حكمه وتحكيمه
نسل بواسل واحدهم يرخص بروحـه *** كانه سمك عـج السبايا تقـل خيمـه
يوم الدماء بسلوم الأعراب مسفوحه *** والكـل منهم خصيمه يـبي تحطيمه
خيـالهـم يجنب مع الـذود بسـروحـه *** يحـمي مغـاتـيـر القطيع ومجاهيـمه
أشبـال ثـاني لهـم أفـعـال مـمـدوحـه *** يـوم الفخـر بين العـرب تـم تقسيمه
بنوا من المجد قصر تشمخ سطوحه *** فخـر تميـم احيـوا سوابق مراسيمه