صــــــوت . وصــــدى .

ارسلي الاخ والشاعر فراج بن دخيل الله الحربي
هذه الابيات حيث يقول :
((السلام عليكم ورحمة الله وبركاته .
اوجه هذه الابيات للشاعر الكبير
محمد ابن سوعان الربيع عبر هذا المنبر الرائع))

باشرح مصابي بالهوى لبن سوعان = عســاه يـوصف لي عـــلاج المحبين
قلبي رهـينه عنــد مدعــوج الاعيان = مسـجون مابيــن الثنـين المسـاجـيـن
وانا خذيت الثقــل من ضلع ورقــان = ماني خفيف وارجحت بي مــوازين
خفـت مـوازيني وزاغــن الاذهــان = ثقل العقـول تــزوغ مـع كامل الزين
ظبيٍ يذايـر مع طرف جـول غزلان = ماراح فـي درب القـنوص المتـاقـين
جـاني وانا جالس عـلى جـال غدران = جابـه لهيـب القيـض والناس لاهـيـن
ولـدت بعيــنٍ خلـت القلــب مـرضان = تـودع ثقيــل العقــل مثـــل المجـانين
ولجّت ضلوعي بالعوى مثل سرحان = لاشـــاف رعيـــان الـرعـيـه مقـفـيـن
الشاعر :
فــراج بن محمود بن دخيل الله الحـربي
--------------------------------------------------------------------------------------------------
انا معـك يـا صاح فـ العسـر واللــين
----------------------------------
هذه الابيات رداً على الشــاعــر فـراج بن دخيل الله الحربي
متمنياً ان تحوز على اعجابه واعجاب الجميع
مـع التحيه والتقدير .......

ارحـب هـلا مليــون ياذرب الايمـان = واعــداد مابالـبيت طــاف الملــبيـن
واعداد ماهز الهوى روس الاغصان = واعـداد منبوت. الزهـر فــ البساتيـن
بالشاعر اللي صاغ قـافـــه بالاوزان = وانشئ ابيوتً تطرب القلب والعـيـن
يامرحــبا وحييت مـن قلـبً ولســان = صديقي اللي من حمــولـة عـزيزيـن
ارسـل بهـا فراج خـلفـة هــل الشــان = من حـرب سـاسه والرجال المسمين
ومـن يومهـا نــوم المخاليـق جافــان = سـرابي الهـوجـاس والناس غـافـيـن
هاض القريح وزان مسحوب الالحان = ومـن شــرّد القيفان صغت العناويـن
ومـن خصني معناه بحــروفً اسمان = يـاتي عـجّــل ردي ولا اقـول بعديـن
فراج يشكي حـب مدعــوج الاعيـان = والحـب عـذب فـي قلـوب السلاطين
قبلك نمـر من لوعته صابـه اجنـان = قـالــوا على وضحا تـعــدا المجانين
وقبله وعقبه يابــن الاجٰواد وفرسان = حضر وبدو واللي من الهند والصين
تبغـا النصيحـه والنصايـح للانســان = كالنـور فـي ليـل الــدجـا للفـهيـمين
بلسم جروح اللي من الحـب مرضان = حـيث النصايــح تنشـرا بـالبعـاريـن
نصيحتـي بـالصبـر تكســب والايمان = وانا معـك يـا صاح فـ العسر واللــين
وان كـان خـلك صادقً يـا كحيـلان = ابـذل جهــودك فـي جـميــع الميٰاديـن
حيث الاصايــل مـا اتعـادل بالاثمـان = ولاهن. خـزايـز للضعوف المساكيـن
مـا هزنـا حـكيً علـى غـيـر بـرهٰـان = مـا دام ممشٰانا على الشـرع والـديـن
محمد بن سـوعان الربيع

الاثنين 6 محرم 1439 هجـريه
27/ 9 / 2017 ميلاديـه