ياذا الضمير الابيض الطاهر الحيْ=ياذا العقل ياذا الفكر ياذا الاحساس
لد النظر لي وإسمع القول ياخيْ=وخذ كلمة ٍ تعطى من الراس للراس
لاهل العقول الواعيه تعتبر ضيْ=لامن غشاء الافكار تعتيم وإدماس
بالمختصر عن زايد الهرج تغنيْ=كلمة مجرب حطها بين الاقواس
المستحيل لكل الاذواق ترضيْ=يصعب رضى كل الشرايح والاجناس
بس المهم انك مع الحق تمشيْ=ولا إتجامل كل مايل وهسّاس
والناس عاملها على الزي بالزيْ=إلا الردى بالك تخليه مقياس
لو قابلوا حسن العمل منك بالسيْ=لامشكله بالناس نذلين وأنجاس
ولا مشكله لآمال وأحلام تبنيْ=المشكله لو ما بناها على ساس
ولا مشكله تسعى وتطمح وترجيْ=المشكله لو صابك إحباط وإيّاس
ولا مشكله لا إحتاجك الناس في شيْ=المشكله لا صرت محتاج للناس
كان إستطعت لحاجة الناس تقضيْ=تكسب بها طيب وجماله ونوماس
ولو ماستطعت سمان الاعذار تكفيْ=يقنع بها المحروج ويقول لاباس
وإن كان ماسويت لاذي ولا ذيْ=بشر مدورت الفزع منك بفلاس