مـــاهمني مــدح الــردي .............

حسبي على اللي في كلامه جـرحـني = كـدّر صفـاي وعالـج الجـرح بجروح
لـيتــه قـبـل مـا قــال شـــيً ذبـحنـــي = واقفـا بصمت وراح عني وانا اروح
ولا جتني الضيـقه وصمتي فضحنـي = صمتي تـمرد في محيطه على البوح
الحـظ الاقـشـر بـالمهـافي طـرحنـي = واصبحت انا من غـدرالاصحاب مذبوح
ليتي حظيـت بصدق شخصً نـصحني = ما كان طحـت بغـيّ الاوهام والنوح
لـيـتـه بــوده ,,والـجـمـايـل ربـحنــي = واصيـر له ممنون وافـديــه بـالـروح
ولا انخدعـت بعرف بشخص ذبحــني = اللي بغــدره دمـــر القـلــب والـروح
اليوم اشـــوفـه من وجــوده مســـحني = وعنـده تسـاوى المنع مع كل مسموح
ولاهـمني مـدح الردي لـــو مـــدحـني = وانا قبـل يُخلــق مـع النـاس ممـدوح

محمد بن سوعان الربيّع .

الأخ محمد بن سوعان الربيّع ذكرني أبياتك التي تقول بهن :
ولا انـخـدعـت بـعـرف شخـص ذبحــني = الـلي بـغــدره دمـــر الـقـلــب والـروح
اليوم اشـــوفـه من وجــوده مســـحـني = وعنـده تسـاوى المنع مع كل مسموح
تذكرت قصيده أيام زمان يوم كان العود أخضر /

* قال عبدالله بن دهيمش العبار هذه القصيدة من شعر المعاتبه :
يـا رسـل مـنـي تـوجـه بـالـسـلامـــه *** خـذ صمال العـلم وأحضر لي يقينـه
أوصـل الـلي فـاق جيـلـه بالـوسامـه *** مثـلهـا مـا شفـت فـي بــر ومـديـنه
خــدهـا مـثـل الـقــمـر ليـلـة تـمـامـه *** كـن ضوح البرق في موضي جبينه
ضـامـر الـسرجـوف معـتـدل قـوامـه *** يـا عسى مخـلـوق ربـي مـا تعـينـه
تـومـي بقـلبي كمـا أومـاي المسامـه *** ولا أومـاي الهـوج بشراع السفينه
كـنـت أبـي لا مـاه بـالـسـنـّة مـدامــه *** وهـني الـلـي يحـوشــه لـه قـريـنـه
أبـغـي جـل الـصـيد ما أريـد الهلامـه *** وأحـمد الـله عادتي صيـد السمينـه
يـا نعـيـم الـعــود يـا ظـبـي العــدامـه *** أتــبـع الـمـنطـوق كانـك تـذكـريـنـه
جـيـتـكـم عـاني مـن ديـار الـيـمـامـه *** أحسـب أن موعد قـدومي تحترينـه
الـهـجــر والـصــد يـا خــلي نــدامـه *** والجفـاء يا صاحبي غلب وغـبـينـه
كيـف عـنـي صـد يـوم الـقلـب رامـه *** كيـف صـارت صدتـك عـني هوينـه
الـعـهـد عـنـد العـرب عـالـي مقـامـه *** والـوفـي معـروف مـا يجـفـا خدينه
الـعـهـد يـا صاحـبـي ويـن أحتـرامـه *** الحشيـم الـلي الخلايـق حـاشـمـينـه
كـان مظـمـون العهـد مـالـه دعــامـه *** يـعـلـم الـلـه صـبتـه مـا هـي متينـه
أرفــق وخــل الـتـّـكـبـر والـفـخــامـه *** كيـف مـن صـان المـودة تخدعـينه
بـان حـبـك وأنجـلـت عـنـه الغــمامـه *** لـيـه معـلـوق الـمولـع تـحـرقـيـنـه
سلـمكـن يالبـيض مـا يعـرف نظـامـه *** ومـن يـغـره سلمكـن لا تـواخذينـه
لا تجـاهـلنـي تـرى مـابـك غـشـامـه *** لـيـه مـردود الـرسـايـل تـهـمـلـيـنه
يـا مـنـى قـلـبـي و يـا غـايـة مـرامـه *** نـعـتـزي والـلي تـركـنـا تـاركـيـنـه
يا الغـضي ما جـيت لـدروب الملامـه *** ولا بغـيـتـك كـان قـربـي ما تـبـينـه
الـعــفـو يـا بـنـت حـمـاي الجـهــامـه *** يـا ذهـب يـا مـاس يـا درة ثـمـيـنـه
يالعـريـب الـلي خـوالـه مـن عـمامـه *** مـن أسـود باللقـاء تحـمي عـرينـه
تـحسبـيـني لاش مـا عـنـدي كـرامــه *** يـوم مـرسولـي يـجـيـك وتـزلهينه
طــوحـي كـل الـرسـايـل بـالـقـمـامــه *** ودوري غـيـري خلـيـل تـراسلينه
أترك اللي صد ما أنشد وش عـلامــه *** لـو يسج الـقـلب فـي شلفـا سنينـه
يـا وديـع الـحـب خـذ مــني غــرامــه *** أبعــده بـالحـال مـانـي لـه رهـيـنـه
تـابع الـمـقـفـيـن مـا عـنـده شـهـامـه *** وكان ابـن عـبـار زل أتسـامحيـنـه

هالله هالله
صح بوحك العذب ومعناك الراقي
لاهنت يابو مشعل
تـابع الـمـقـفـيـن مـا عـنـده شـهـامـه *** وكان ابـن عـبـار زل أتسـامحيـنـه
حاشاك من الزلل
اشكرك على حسن المتابعه وطيب الاطراء
ربي يحفظك ......