يامرحبا أعداد نقد الفلوسي

ترحيبت ً ماتنحصي بالقياسي

أعداد خلق الله ورمل الطعوسي

واعداد جبال ٍ شامخات ٍ بالرواسي

حييت ياسايق جديد الجموسي

من زارنا مانرجعه بالفلاسي

ريض وتقهووا واشرب بن محموسي

ومفطح ٍ عمره بوقم الخماسي

وبعد ذالك ياطرت النحوسي

خذ الكتاب ومحضره من حواسي

حضرت قاف ٍ مالقي به أدنوسي

قيفان أحممها من انتاج راسي

عطه العصيمي لاتجيه أهجوسي

وقله ترا عشيان زاد أحتماسي

وأن كان جسمه ناحلن تقل قوسي

راع الهوى دايم كثير أنهماسي

وأن كان شوقك حال دونه أنجوسي

أنحال دونه معيزل العين ناسي

القاز يعبأ المتين الضروسي

يشيلة المقلاع لو الضرس قاسي

نركب عليهم طائره صنع روسي

ما تحمل الإ اربعه بالكراسي

سواقها جنسيته أندنوسي

وملاحها ومعاونه والسياسي

نعمل لهم يوم ٍ كدور عبوسي

يوم ٍ يشيب حاضرين المحاسي

وأن كان ابوها قانعن بالفلوسي

نعطيه من العمله كثير الكياسي

وأفطن ترا بعض العذارا تجوسي

مثل الذهب مايقترب لنحاسي

_________

شعر : عشيان بن سليمان

حييت ياسلطان بجمل تحيات

يازايرٍ وهل البلد رحبوبه

تحيتٍ احلى من صرف الجنيهات

واحلى من ريح النفل بارطوبه

الجوف لبست كل عز وزينات

تقل هنوفٍ في زمان الخطوبه

من اقصى الشمال الى الحفرللقريات

متواجدين وفيك نالو اعجوبه

حيثك امير للفضى انت بالذات

بذلت نفسك للخطر والصعوبه

بدسكفري نلتو بعيد المسافات

سبعة ايامٍ يالامير محسوبه

وثلاث اقمار اطلقتها مع عرب سات

فوق الكواكب يوم طارت تيوبه

زوتنا بعلم وزود الاتصالات

ردت الفضى يامير واضهر غيوبه

انت اللي تدحم للدروب الصعيبات

يارائدٍ شلت الفخر للعروبه

من فيه غيرك بالفضا له شهادات

بين العرب واسلامها ماحكوبه

ماقيل هذا بالفضى له سجلات

من مشرق شمس الضحى ليا غروبه

ياعالمٍ جبت العلوم الغريبات

بينت شي للعرب مادروبه

الصحف تشهد فعلكم والمجلات

وهذا الصحيح الي العباد شهدوبه

العلم يحقق للبشر كل خيرات

وللا الجهل مافيه غير العقوبه

والعلم يفتح للشعوب الطموحات

تفتح ابواب مغلقه في دروبه

وفهد ملكنا نشكره كل الاوقات

مليكنا ياعز من اعتزوبه

مليكنا مقدامنا بالمهمات

العز طبعه والمكارم اسلوبه

ولي العهد راعي الصخى والمروات

وسلطان قرمٍ بالوازم ينوبه

ونايف على اسمه نايف بالجمالات

وسلمان يفرح عانين لجوبه

حكام نجد يوم دور الاصيلات

شرق وشمال وغرب بويضا جنوبه

عبد العزيز اللي مشى بهدي ايات

داس الرواسي وخضعت له اهضوبه

اسس قواعدها ورسى البنايات

وزال الضلاله والجهل والحزوبه

صم الصحاري بدلت بالجنينات

والبنك يعطي والفلل شيدوبه

المملكه صارت نعامٍ وخيرات

مثل المنيحه كل يوم حلوبه

عبد العزيز اللي فعوله عضيمات

خلف رجال ٍ مامشابه مشوبه

عساه يجزى بالجنان النعيمات

في جنة الفردوس تمحى ذنوبه

اقولها من صدق ماهي دعايات

والعالم الله قابل كل توبه

والخاتمه يا امير ارجو السموحات

كاني مقصر بالكلام اسمحوبه

فرحتنا واسعدتنا بالزيارات

وشوفك سعيدٍ والحضور اسعدوبه

واختامها على النبي بالصلاواة

اعداد سحبٍ سايقتها هبوبه

________

شعر عشيان بنت سليمان

يوم الخمشه على الحفله دعوني

ركبت جيبي وأمتطيته مع القار

ماني على جمع الرفاقه مهوني

ولاهمني بعد المسافه والأمتار

ياحل وقت اللازمهواندبوني

لي الشرف لاجيت لطوال الاشبار

وشلون ماجي ناس بالجوف جوني

قررت انا امشي يمهم مابها اعذار

ماهي غريبه تيتي واسمعوني

وايل جمعنا في قديمات الادوار

ياما حضروا في كل هيه وكوني

يشهد لنا التاريخ في حرب ذي قار

عبدالمجيد العام فك السجوني

جابوا اموال ٍ ماتعدد بقنطار

من عقب ماشاف العنا والغبوني

فكوه ذربين اليماني والاشوار

وقت اللزوم عيال وايل يجوني

لو انهم شتان في خمس الاقطار

اهل الظعنه محتمين ٍ الطعوني

مضرب مثل بين القبايل لهم صار

والله يعز اللي للإسلام عوني

ملكنا ابو متعب لنا والد ٍ بار

وسلطان يوم بعودته بشرونه

ولي عهد للوطن درع وستار

يحمي وطنا من جميع الركوني

عن المكيد وكيد مشرك وغدار

يحمود حنا على الطيب نموني

والحر مثلك دوم يفهم بالإشار

شرواك عندي للمراجل زبوني

من شانكم شاركت من ضمن شعار

والمعذره عن الخطا وسامحوني

حيث القبايل كلهم خير وخيار

قلت الصمايل يوم هاضت شجوني

واخذت معكم عبر الايام تذكار

وانا احمد الله ضافيات ٍ ردوني

ربعي اهل العليا على الكود صبار

وصلاة ربي عد هل المزوني

على النبي اعداد ماهلت أمطار

_____________

عشيان بن سليمان

بعت الغنم ونويت ياعلها خير

ونشري من الإبل حيث في قنيها عز

هنف الخشوم مغرزات المواخير

طفح الضلوع وسنمهن قعسا ً غز

وأخترت من نوع البكار المغاتير

مثل البرد ياهل مزنه وركز

وليا ذكر لي خايعا ً به نواوير

والكل ناوي لربيع وتجهز

ندبتهن ثم روح ٍ لي دعاثير

كنه وراهن واحد لزها لز

وأخذ أياما ً بالفياض المخاضير

والجيب عندي باللوازم مجهز

ندله بها مع ربعنا والمسايير

والعمر فاني والليالي تعجز

ابعد عن اسواق البلد بالمشاوير

ولاننزل إلا يابغينا نتعوز

_______

شعر عشيان بن سليمان

ياميرنا جينا على عهدنا الماضي

مجددين العهد يا امير ونصونه

الكل منا قال في حكمكم راضي

يستنكر الارهاب شكله ومضمونه

الدوله اللي حطة الشرع له قاضي

ربي حماها وزمرت ابليس ملعونه

من خان كل المشكلة عنه تنباضي

ومن جنب الواقع على الحق يقدونه

له زمهرير الموقده ينجظ انجاضي

مخاطرا ً شقرا ً على النار مركونه

ياعاد انا بنعمه وخيارات وحفاضي

وحكومتن من لاذ فيهم يعزونه

من غيرهم من ريد بالحكم نعتاضي

حنا معاهم والوطن نحمي ركونه

شله اللي بقلوبهم حسد ومراضي

مهما عملوا بالوطن مايهزونه

والخاتمه يا امير ماجيت عراضي

نظهر ولانا ونمشي اللي ماتريدونه

واقبل تحية عد مابارق ً ناضي

تحية مني لها الود مقرونه

وصلاة ربي عد فيض ليا فاضي

غيث ً من الغربي تنثر من امزونه

___________

شعر : عشيان بن سليمان

قالوا اخبارك قلت ماعندي اخبار

تسمع لإخبار العرب بالجزيره

تابع قناة الفضاء عبر الإقمار

ناس ٍ تسوي من الصغيره كبيره

وناس ٍ عليها حظر جوي مع حصار

وناس ٍ مايدرى وين مطرح مصيره

مشاكل ٍ مابين ريس وثوار

واللي توعد واللي حشد المسيره

ماهي حروب ٍ بين مسلم وكفار

مسلم ويذبح مسلم ٍ بالظهيره

مصايب ٍ عمت بها كل الإقطار

فتنه وصّل شرها بكل ديره

والمستفيد الغرب من كل ماصار

يجي بسلاح وطيران وذخيره

يعبث بديار العرب سّر وجهار

خطه مرسومه والصليبي يديره

وعدو جدك مايجي صاحب ٍ بار

والقدس مبطي في يديهم إسيره

وشلون نرضى بالخطا وذبح الإحرار

ويش اللي بقى عندنا نستشيره

وحنا عرب ننهج على نهج الإخيار

بيننا عهود ومواثيق ٍ كثيره

ياناس عيب ٍ وياعرب بصمة ٍ عار

وإيمان تصرخ بالدموع الغزيره

مثل اللي يشكي من اهل الغار والنار

يالله دخيلك عن إعماة البصيره

خوذو من القرآن حكمه وتعبار

ونهج الرسول وسيرته وتعبيره

وإطلبك يالله تحمي الدين والدار

وتحمي ملكنا من وجيه الشريره

وتفكنا من شر حاسد وغدار

بظل إبومتعب قايد ٍ للمسيره

إقولها وصلوا على سيد الإبرار

يالله تجعل بإخر الإمر خيره