((ضيّع صهيل الخيل كثـر النباحي))
.................................................. ......
وقـتً بــه المنعــور ينصــاب بجنــون
,,,,,,,,,, وينـقــالـه غـلطـــان لـو كــان صــــاحــي
يـصيبــه الاحبـاط واليـأس واغبـــون
,,,,,,,,,, وتـضيـق بـــه فـجــواتـهـــا والنــواحــــي
اللي نشوفه شيّـب الروس واعيـون
,,,,,,,,,, ومـع القهــر يـــزداد حـجـــم الجـــراحـي
مـالـه شــبيـه ولا ظـهر لـه بعـد لـون
,,,,,,,,,,, لـغـــزً يـحيّــر يـا وجـيـــه الفــــلاحـــي
يحيــر بــه رجــلً معـه عقـل مـوزون
,,,,,,,,,, ولا عــاد يـفــرق جـدّها مــن المـزاحـي
تساوت الجمّه مـع اللـي لهـا اقـرون
,,,,,,,,,, وضيّــع صـهيـــل الخيــل كــثر النبـاحـي
اخـتلطـت الاوراق والسـرّ مـكنـــون
,,,,,,,,,, والحــل اصبــح فــي مـهــب الـريــاحـي
والحال اصبح دون من دون فـي دون
,,,,,,,,,,, والكــل منـــا غـــــاطً بـالــمـــراحـــي
مـادري ردا او خـوف بالجوف مدفـون
,,,,,,,,,,, او انـهـــا الغيـــره بعيـــدة مشـــاحــي
ســاد الانــا مـابيــن الاخـوان بالعـون
,,,,,,,,,,, وكلـن يقــول انــي قــــوّي الجنــاحــي
واقــع مــريــر وعـاث باركـانـه الهــون
,,,,,,,,,,,والــذُّل غطـــى مُدنـهـــا والضـــواحــي
وان مـا وعـيـنا للـذي كــان وايكــون
,,,,,,,,,,, مـا ظـنتـي نـحظــى بــذرّة نـجـــاحـي
وترى التغاظي بعض الاحيان ملعون
,,,,,,,,,,,, ولو حاز من بعض الرجال امتـداحـي
بـقـلمـــي ........

تـسـاوت الـجـمّى مـع الـلـي لـهـا اقـرون *** وضيّــع صـهيـــل الخيــل كــثر النبـاحـي

صح لسانك الين كلامك صحيح والشي بالشي يذكر فقد ذكرتني بقولي :

يا الله يـا محيي الغصـون الميـابيس *** يا منبـت الشتلـه بساتين وأغروس
نعـوذ بـك من كيـد الأشرار وإبـليس *** من لاذ بك يا مبدع الكون محروس
المسعـد الـلي مـا بـقـلبـه حـواسيس *** ولا هام فكره مع روابع وهاجوس
مـن أيـتـذكـر بـالعـهـود المـراميـس *** يـأخـذ مـن الـدنيـا تعـالـيم وأدروس
دنياك هذي من عصر نوح وأدريس *** فيهـا الخلايق بين رايس ومريوس
نـاس بـهــا تـربـح ونـاس مـفاليـس *** نـاس عـلى مـلـة ونـاس بـفـردوس
ويـن الـرجـال الـلي تحـل اللـواليـس *** قـريبهـم مـا يشتـكي ظيـم حاسوس
صـيـد الحمـايـل مدركين النـواميـس *** ما يقبلـون الجـور والحـق ملموس
لا هاجـت الهيجاء بالأكـوان فـّريس *** شجعان يسقون المعادي من الكوس
زالـوا وصـارت للخباث الـمناحيـس *** الـلي مذاهبهم عـلى عشرة أجنوس
اللي عـلى عـلـوم الـرذايـل بـلالـيس *** أذنـاب لـكـن يـدعـون أنـهــم روس
خـلان سـلـم وبـالـلـوازم حـمـالـيـس *** وإلى وردت لجالهـم مارد أرسوس
أهـل الدنس والـدنـفسه والدنـافـيس *** داسـوا كرامتهم بخـف القـدم دوس
يـا صاح مالـك بالهـدوس الهلابيس *** لو كـان تسكـن وادي غيـر مانـوس
أبعـد عـن الهـلباج والنـذل والهيـس *** حثال الرجال قلوبهم سود وأنجوس
أوصـيك لا تـزرع جـمـايلـك بغـليس *** ينكرك لو كثـر عـلى خشمك البوس
* وقلت :
أشوف بالـدنـيـا بهـاديـل وأتعــوس *** ولا تـاجـد الـلي مـا زمانـه تعـايـس
دنـياك يا غافـل بها الوضع منكوس *** دنيـا الشقـا مـاساسهـا كـل سايـس
ما خلدت من يلبس الدرع والطوس *** وين الشجاع عقاب والشيخ هايس
أجيـال زالـت بالفـنا مـا لهـا رموس *** بـس العـظـام البـالـيـه بـالمحـايـس
والحتف مخلابه مثل شاطر الموس *** يـودع عـناتـيـت الخـلايـق فـرايـس
عمر الفتى يـبلا كـما جـرد ملبـوس *** ومـن غـرتـه دنـيـاه معـدم وبـايـس
وش عاد لو يملك عـقارات وفلوس *** ما ينفعـه خـزن الـذهـب والنفـايس
ومن لا يعز النفس خايب ودنفـوس *** شبه الرخـوم الـلي تـروم الفطايس
كان الـرجل ما بـه شهامه وناموس *** ماتـت بـه الـشيـمـة وللسلـم دايـس
وحنا بفضل الله لنا أخلاق وأنفوس *** مبـطي عـزيـزه مـا تحـب اللحايـس
وإلى تساوى قـدر الأذناب والروس *** تسـاوت الجـزلات هـي والطفـايـس
والغرس مايثمر إلى صابه السوس *** والـطيـب سنـدا والجمايـل غـرايس
وأشـوف بالعالـم هلابـيج وأهـدوس *** يحـضـون بالتقـديـرلـوهـم هلايـس
أصبح يـوجب كـل فاســد ومنحـوس *** شين الضمير الـلي يكـن الدسايس
حتى الذي وجهه من العيب مدنوس *** يلـقـا الوجب مع كل فاسـد وخايس
والسلـم الأول صابـه اليـوم فيروس *** فيروسه الموضه ومعـهـا دعـايس
وقـام أيتبجـح كـل ساقـط وخنـفـوس *** ملس الشعـور مقـلديـن العـرايـس
ولاني على غـرات الأجواد جاسوس *** ندخـل عـلى الله ما نـدور البلايس

صح لسانك الاخ الكريم الشاعر محمد بن سوعان 0 ابدعت في الوصف وصح لسان شاعرنا الكريم والاديب ابن عنزه البار ابو مشعل على الاضافات الشعريه والذي تشير الى الواقع

ولكن هذه حال الدنيا اذا خليت بليت قولتنا يالبدو رعاكم الله ونبارك لكم في هذه الايام المباركه نتمنى لكما الصحه والتوفيق ورضا من الله تعالى

شكراً للشيخ متعب بن عبدالهادي الفققي أبو عبدالله على مروره وتذوقه للمعاني الوارده في هذا العصر ,نسأل الله أن يديم عليك الصّحه والعافيه وكل عام وأنت بخير

الشاعر القدير محمد بن سوعان الربيع أبو فهد وأديب وايل العزيز صح الله لسانكم وبنانكم حتى ترضون..

وما تخلا بإذن الله من الأجواد دام بها من الأكرام والمعدن النفيس شرواكم..

لا خلا ولا عدم وأدامكم الله بعز ومعزة وبحفظه ورعايته دائماً وأبداً..

اشكر الاستاذ والاديب
المرجع التاريخي والمدافع الاول عن هذه القبيله العزيزه بل هذه المملكه العريقه ((عنــــزه ))والساهر الاول على شموخها وعزتها
في جميع المحافل والصعد
اشكرك استاذنا العزيز على ما جاء بردك الرائع من معاني مرموقه تلامس الوجدان والمشاعر لاهنت لاهنت يابو مشعل
ادامك الله وابقاك ذخراً لنا لايزول
وما انا الا تلميذ من تلاميذك استاذي الكريم واتمنى ان كل ما اخطه بقلمي المتواضع ان يصل الى مبتغانا المنشود وان يعالج او يخفف من الألم الذي تعانيه امتنا وما وصلت اليه من هوان وتدني وضبابية الواقع المفروض وتدني الرؤى للاسف من محدودي البصر والبصيره
لاهنت اخوي واستاذي ابو مشعل
وتقبل خالص الشكر والتقدير
اخوك ابو فهد

اخوي متعب الفققي
هلا والله وشهادتك اعتز وافخر بها مرورك وتواجدك ينور صفحتي
لك كل الشكر والتقدير
لاهنت وبارك الله فيك وعسى يجملنا معكم ويوفقنا لما يحب ويرضى
هلابك مليووووون

محمد بن دوهان
هلا وكل الغلا
مرحبا ومسهلا بالاخ العزيز والصديق الوفي
مرورك يسعدني ومتابعتك تهمني جـداً
وما عليك زود اخوي الكريم
لاهنت وكثر الله امثالك
تقبل تحيتي وخالص مودتي