أن زان لـك وقتـك تخيـر بالأصحـاب
وان شـــان وقـتــك كـلـهـم مـايـبـونـك

أن جيتـهـم قـامــو يـحــدّون الأنـيــاب
وان رحــت عنـهـم بالقـفـا يشذبـونـك

لا..دبّــرت دنـيــاك والـحــظّ مـاطــاب
النـاس لا..مـن طـحـت مايرحمـونـك

أهل السيوف اللـي يقصّـون الأرقـاب
أمّــــا كـفـاهــم واقــعـــك يـظـلـمـونـك

لا..تـامـن العـقـرب ولاتـامــن الـــداب
الـســمّ واحـــد لا..رقـــا فـــي مـتـونـك

يـاجـاهـل الـدنـيـا ودورات الأسـبــاب
أعرف ترى مـن خـان غيـرك يخونـك

لو كان لك ربع() مواليـن واحبـاب
لابــدّهــم عــقــب الــغــلا يـنـكـرونــك

وقـت(ن) يشيّـب بالمخالـيـق مـاشـاب
أســأل رجــال) جـرّبــو يخـبـرونـك

واحـذر تخـاوي كـل هافـي وكــذّاب
أهــل الــردى بطبـوعـهـم يطبـعـونـك

أرفـع مقامـك عـن رديـيـن الأ نـسـاب
لـو شفتهـم فـي حضرتـك يمدحونـك

فارق ثراهـم وارق فـي راس مرقـاب
أبـعـد عــن الـلـي لونـهـم غـيـر لـونـك

خــلاّن مــال ومـالـهـم ربـــع واقـــراب
لاقــــلّ مــالــك عــدّهــم يـكـرهـونـك

أعتـاض فيهـم مـن طويليـن الأشنـاب
الـلـي الـــى مـــال الـدهــر ينفـعـونـك

لاصـكــتــك دنـــيـــاك وافـــتـــرّ دولاب
بــانـــت مـواقـفـهــم ولا يـرخـصــونــك

هـذا رفيـقـك مــن قريبـيـن واجـنـاب
ذخرك وهم فـي واجبـك يذخرونـك

عنـدك قريبيـن ) ولـو قـلـت غـيّـاب
على صدى صـوت النـدى ياصلونـك

ياللـي سمـعـت العـلـم لاتفـتـح الـبـاب
لاتنحشـر فــي شــي مـاهـوب شـونـك

ربعك ألى من شفتهـم صـارو احـزاب
وتــشــاورو بــالــراي والـعـلــم دونــــك

لاتـبـدي بـرايـك عليـهـم ولـــو صـــاب
لو صحت باعلى الصوت مايسمعونك

ومـن لاحسبّلـك لاتسـوي لـه حـسـاب
لو كان يسوى وحدة) من عيونـك
.
.
منقول

وقـت(ن) يشيّـب بالمخالـيـق مـاشـاب
أســأل رجــال) جـرّبــو يخـبـرونـك

-----------------------------------------------------------------------------------------------------------

نعم ابو زياد كما ذكر الشاعر صحيح . ابقاك الله ورعاك يا ابو زياد زادك الله من نعمته وصحته ورضائه

	شـــــــــــــــكرأ لك أخوي أبو زياد نقل جميل تقبل تحياتي

ربعك ألى من شفتهـم صـارو احـزاب
وتــشــاورو بــالــراي والـعـلــم دونــــك

لاتـبـدي بـرايـك عليـهـم ولـــو صـــاب
لو صحت باعلى الصوت مايسمعونك

ومـن لاحسبّلـك لاتسـوي لـه حـسـاب
لو كان يسوى وحدة) من عيونـك

* * *

بيض الله وجهك على هالأبيات الكريمة أخي أبو زياد ولو كنت أتمنى معرفة قائل هذه القصيدة الباذخة يا رعاك الله عز وجل ..

وذكرتني يا حفيظ السلامة بقصايد بدر الحويفي حين قال:

:: وزن الرجال اعقولها يا فتـى الجـود ::

لا تـازن الرجـال لاشفـت زولـه=وزن الرجال اعقولها يا فتـى الجـود
دلايـل الـرجّـال فعـلـه وقـولـه=تحكم عليـه بمنطقـه علـم موكـود
ما ينفـع الرجـال جسمـه وطولـه=لا صار ما يدري عن النقص والـزود
كسب المعالي مـا يجـي بالسهولـه=يصعب على اللي ما يجامل على الكود
المجـد عشـاق الكسـل مـا ينولـه=دربه على اللي يجهل الطيب مسـدود
وحفظ الشرف مبدأ صفات الرجولـه=والمتزن ما هـو علـى درب منقـود
ومرافق الجهـال يـا بـن الحمولـه=نقص ٍعلى السمعـه وتعقيـد وعقـود
كـل ٍجليسـه يقتـدي فـي فعـولـه=المعتدل واللي عـن الخيـر مصـدود
ومع الأسف بعض العقـول معزولـه=مـا تقـل بالدنيـا لهـم رب معبـود
ما خافوا المولـى وطاعـوا رسولـه=اللـي لـه العبـاد خشـاع وسجـود
مـا حسبـوا يـوم ٍحسابـه وهولـه=يشيب راس اللي هاك اليـوم مولـود
يطـرق منافيـذ الخوافـق ذهـولـه=يوم الحساب اللي به العبـد موعـود
بآخـر نفـس لانوخـت بـه ذلولـه=يـوم التفاهـم بيـن ناشـد ومنشـود
عند الضريح آخـر محطـة نزولـه=النفس تصعد والجسـد مرتـع الـدود
يأهل العقـول المبصـرات احسبولـه=ترى الحياة بلا عمـل مـا بهـا فـود
اعمل عمل واطلـب مـن الله قبولـه=منهج طريق الخير واضـح ومحمـود
دامـك نشيـط وكـل شـي ٍتنـولـه=ترى السفر له حد والعمـر محـدود

:: عيال الحرار اللي بها تضرب امثـال ::

يالمنتقد مالك علـى النـاس مدخـال=شوري توقع واقصر الحبـل للغـوج
راجع ضميرك قبل احطك على البـال=إن كان ما راسك عن الشـور مصنـوج
ما دام مكنونـي ورا عجـم الاقفـال=ترى الهروج الفاضيه ما لهـا حـوج
حنا عـرب مـا همنـا نقـد الانـذال=نحمـى كرامتنـا ولانقبـل الـعـوج
اجـواد ماننقـص للاجـواد مكـيـال=اهل نقى ماهـي سواليـف وهـروج
ياللي تحيـل والدهـر فيـك محتـال=هاك الزمان اللى به الوجـه مسهـوج
ايام فيها عشـت فـي خـوف واذلال=مثل المريعي يسبـر الحـوم ويلـوج
واليـوم مامثلـك ولا صـار رجـال=وعندك لتحريـف السواليـف كتلـوج
عن جيلنا الحاضر وعن ماض الاجيال=تخفاك عادات العرب وانت مرجـوج
وان طعتني تعرض عن القيل والقـال=تراك مهمـا غـرك الـزود مفلـوج
انعم بظـل اللـي لنـا درع واظـلال=للـي يقـودون السفينـه مـع المـوج
قيـاد رايتـنـا صنـاديـد الابـطـال=اهل السيوف اللي بها السـم ممـزوج
عيال الحرار اللي بها تضرب امثـال=والا انت لو يضرب بك الوصف فروج

:: ومـن عمـي قلبـه ماتفيـده عيونـه ::

يارجـل لا تنقـل نبـأ كـل نـقـال=به نـاس حتـى الميـت مايتركونـه
والقيل عنـدي لـه مفاتيـح واقفـال=معنـاي ماكـل العـرب يفهمـونـه
ولا اقول انا زايد علـى كـل رجـال=كم واحـد مايقصـر العـرف دونـه
خص الرجال اللي يجيـدون الامثـال=البيـت عـن معنـاه مـا ينقصونـه
اخص لي نـاس يحوسـون الاقـوال=البيت لـو هـو معتـدل يكسرونـه
لو هم كبار اعمـار بالعـرف جهـال=ومـن عمـي قلبـه ماتفيـده عيونـه
ينبيه عـن حظـه تواريـخ الاجيـال=يجهـل خبـر والنـاس مايجهلـونـه
يشوف نفسه ويـن مـا مثلـه امثـال=ترميـه باحضـان الجهالـه ظنونـه
والناس تعـرف بالطبايـع والافعـال=واللـي تعـزه سمعـتـه يمدحـونـه
والماء يجيبه عـذب ويجيبـه احثـال=والكون به مـن كـل كايـن نمونـه

:: عليك بالطيـب ليـا صـرت عسّـاس ::

لا شفت لك مغرور يضحك على الناس=تـراه مايسـوى المغـفـل لبـاسـه
لا تمنعـه شيمـه ولا يمنعـه بــاس=بعض العقول يصيـر فيهـا التماسـه
يرى بنفسـه مثـل عنتـر وجسـاس=وعند المره مايقطـع السيـف راسـه
ولو الرجولـه وزنهـا قـدر وقيـاس=مـازاد عـن مثـقـال ذره قيـاسـه
من غرته نفسه حصد زرع الأفـلاس=الـزود ينقـص لا يغـره احسـاسـه
والكبر للي قدرتـه تحيـي الانفـاس=عـلاّم مابصـدور جِـنّـه ونـاسـه
النـاس تفرقهـا الطبايـع والاجنـاس=فيهـم سبـاع وبــالاوادم بسـاسـه
المجد للـي سمعتـه ترفـع الـراس=والا الـردي فرعـه يعـوّد لساسـه
كثر التجارب بينـن غيـب الارمـاس=وعرفت مثمون الذهـب مـن نحاسـه
عليك بالطيـب ليـا صـرت عسـاس=طلق الحجـاج اللـي بقربـه وناسـه
اللي ليا مسـك مـن الوقـت مسّـاس=ينعشك مـن طيـب المـروّه وباسـه
والا الردي لو شـام للطيـب ينحـاس=الطيـب كايـد مايـجـي بالطفـاسـه

:: مافيه داعي لسوء الظـن والشكـه ::

الجاهل اللي ضحك له واحدٍ هكـه=يمـس نباطتـه ويقـول بازوكـه
مافيه داعي لسوء الظـن والشكـه=وافكار من معدن القصدير مسبوكه
اللي ظنونه من الاوهـام منزكـه=نفسه لشيطانها تخضـع ومملوكـه
يالله ياللي وضعت البيت في مكـه=انك تسلط علـى النمـام وسلوكـه
اللي يجّمع كـلام النـاس ويعكـه=من سوء ظنه ينوبه ريب وشكوكه
يطرق لسانٍ من العـدوان مافكـه=نعارته في نحا الاجناب مفروكـه
عوجا عدوه تدقه نطـح وتشكـه=وان وقعت في صميمه قال مبروكه
وعلى الرفاقه يحد الموس ويحكـه=كلمة صديقه يحلل وضعها شوكـه
وان ميزت هيئة التمييز في صكـه=ماله وثايق من المعقـول منسوكـه
نفسه خفيفه مع الداكـوك لا دكـه=ومشارك اللي يبيع العلك بعلوكـه
قصده يكافخ صدى الهوجاس لا تكه=وذكراه عن طاعة المعبود ممسوكه

:: انا على مجـراي الاول وطبعـي ::

انا اكتفيت بعـز راسـي وربعـي=ماهو مخافـه يالسنافـي سكاتـي
انا على مجـراي الاول وطبعـي=وفي حـال وفـي حـال عاتـي
ليا عوى الذيب المناحـر لسبعـي=اقيس بالحاضر مـدى المقبلاتـي
ما أشّر على هذا وهـذا بصبعـي=ولا انفخ على ذرعان جسمي لهاتي
ولا اقول بالمنتوج نصفي وربعـي=ولا اقول انا ابو زيد ولا الزناتـي
عن درع ابو عمار قانـع بقبعـي=وشرار ضوي مالفزه في عباتـي
لو مادخل قولي نظر كـل تبعـي=تجوف الزول الغشيـش طعناتـي
ماني غديرٍ يرشح القيـض نبعـي=انا من الصافـي تصـدر رواتـي
ولاني بحال اللي ضحك عقب شبعي=واصبح يحلل منطقـي وكلماتـي
قانع بعرفي لو ضحك كـل هبعـي=نـاسٍ يحركهـا النسيـم لشماتـي
ادامها مـن حلـق دبٍ وضبعـي=ادرجتهـا فـي سلـة المهملاتـي

:: والجزاله مستوى الرجل النبيـل :

الكريم اللي نزل عنـد البخيـل=ضايقه مايحتمـل فعـل الخيـار
الكرم يصعب على الرجل الرذيل=ضعف نفسه عيّفه حسن الجوار
والكديش يهس عن شوط الاصيل=والصويتـي مايجاريـه الثبـار
الجزيلـه مايحصلهـا الهزيـل=والتحـرص مايطّـول بالعمـار
الردي مثل السراب بلا حصيـل=بالمثل قد الجحـش در احمـار
والتوبيع لا طلع ماسـال سيـل=والكرم كالغيث والبخـل الغبـار
والجزاله مستوى الرجل النبيـل=والردي يمناه محسـوب ايسـار
الرجوله سلّّمٍ صعـب وطويـل=يمنع الرديـان عنهـا الانهيـار

:: والا الغشيم يخلـي الطيـر بـوار ::

لو كل رجلٍ ينقل الطيـر صقـار=كـان الصقـاره ماتغيـر سنعهـا
مير الصقاره تختلف فيها الافكـار=وهذا سبب عيب الطيور ووجعهـا
الطير له عنـد الصقاقيـر مقـدار=عند الرجال اللـي حقيقـه ولعهـا
والا الغشيم يخلـي الطيـر بـوار=يشري من العالـم ويدمـر سلعهـا
ولا تآمنه لا يشوي الصقر بالنـار=كلمة (مثل) كـلٍ بسمعـه سمعهـا
يقوله اللي ماذكـر شـي ماصـار=ابيـات موجـز للجريـدة دفعهـا
توجهت لمراقب الشعـر مسيـار=امـا نشرهـا صـح وإلا منعهـا
واللي يبي يأخذ مع الوضع مشوار=يمكـن يجاريهـا وينسـاق معهـا
وتصير وجهة رآي مابيـن شعـار=واهداف موضوع القصيده جمعهـا
وان كان ماناسب هدفها للاحـرار=صارت يتيمـه مستواهـا قطعهـا
اخطت هدفها واختفت عنها الانظار=واللي درس موضوعهـا مارفعهـا
وكان اعترضها من هلّ الشعر بيطار=يعيش من شاف الفتـوق ورقعهـا

:: حافظ مبـادي سمعتـه والحمولـه ::

يانـاس بالعـادات شفنـا الغيـاره=رخص الشرف والطيش دقت طبوله
بعض شباب اليـوم ضيـع وقـاره=خص الذي درب المعاصي ميولـه
مايفهم اللـي ينفعـه مـن دمـاره=ولا يحتـرم دينـه وملـة رسولـه
يحوم طول الليل فـي كـل حـاره=مابه شرف دنيـا ولابـه رجولـه
يفرض على نفسه اسلوب الحقـاره=ومن شِان فعله مانفع زيـن زولـه
على الخنا يسهـر ويرقـد نهـاره=وأمـه وأبـوه مضيقتهـم فعولـه
عقله ضعيـف ويدّعـي بالشطـاره=ولـه شلـةٍ لا مرهـم صفقـوا لـه
من بينهم معروف رمـز الأشـاره=وان طافهم مـا شافهـم صفروا لـه
سلـك التفاهـم بينهـم والعـيـاره=الفـاظ تنفاهـا النفـوس الخجولـه
قالـوا تعـال وكلهـم بانتـظـاره=نبي لنا مع هجعـة النـاس جولـه
خسـارة ياكبرهـا مـن خـسـاره=ليا عـوّد البالـغ لعقـل الطفولـه
واستثني اللي نهج درب الاخيـاره=كاره المستقيم اللي نزيهـه اسبولـه
اللي مع الطرق السليمـه مسـاره=حافظ مبـادي سمعتـه والحمولـه
العقـل والديـن الحنيفـي شعـاره=وجيران بيته بالصلاة اشهـدوا لـه

:: يالواشـي الله لا يسـنـع سنـوعـك ::

يالواشـي الله لا يسـنـع سنـوعـك=فرقت شمـل بحينـا كـان مجمـوع
ياللـي تبجـح فـي بهـاك وميوعـك=يا مرتدي نوعٍ مـن الزيـف مصنـوع
مغرور يمكن مايجـي شبـر بوعـك=ياسبع ياللـي تدعـي وانـت مسبـوع
وزنك خفيـف وكـل شـيٍ يروعـك=بين الطيور الجارحـه تقـل جربـوع
قاسـي وليّـن للقسـاوي خضوعـك=جنبك كبير بلا غضاريـف وضلـوع
مهمـا تحـاول بالبلاغـه طلـوعـك=حبلـك معقـد لـو تمـده مقـطـوع
اترك صدوع الناس، عالـج صدوعـك=ياللي تلف الـراس والذيـل مقشـوع
وان كان ماغيـرت سيـرة طبوعـك=سمعك عن التوجيه والنصـح مطبـوع
ياللي تمثل مـن هـل الخيـر نوعـك=وانته تقـول لفاعـل الخيـر ممنـوع
تبي تحصـد اثمـار ناتـج ضلوعـك=واللي يودك نجدتـه حـزن ودمـوع
راجع ضميرك قبل تطفـي شموعـك=تحت الثراء يسعى بك الدود مجضوع
عريان تلقى عقـب الانعـام جوعـك=عطشان ماتملك مـن المـاي قرطـوع
ساعة بهـا تقديـر كفـرك وطوعـك=آخـر دقيقـه ينتهـي كـل مشـروع
الحـق باظفـار المنـيـه يلـوعـك=بارخص رخيص تلف والثوب مخلوع
جف القلم واللي بقـى مـن متوعـك=حنزط ينشب فـي لواحيـك وتـزوع
فـي ساعـةٍ ماينفعونـك فـزوعـك=لو لبسوا الفرسـان خـوذات ودروع
لو مسحـوك بدمعـةٍ مـن دموعـك=ما انته على الدنيـا مخلـد ومرجـوع
مضمون من بعـد طيرانـك وقوعـك=يا اللي نسجت من اهزل النكث قنصوع

:: وألا النشامـا ماتخثـع إخطاهـا ::

حنـا كـلام الـزور مانكتسبـه=ونساير العالم حسـب مستواهـا
والرزق عند اللي خلق نوح وأبه=علام ماتبدي الصـدور وخفاهـا
والهرج بالغياب من غيـر سبـه=كلمه سخيفـه والفشـل منتهاهـا
والرجل واجب بالكـرام يتشبـه=والناس واضح طيبها من رداهـا
الشخص جسم وثوب والعقل لبّه=وليا جهلت بنـاس قيّّـس نباهـا
نطق اللسان اكبـر دليـلٍ ينبـه=ينبيك عن نقص العقول ووفاهـا
وعمى القلوب هيام مفقود طبـه=وعمى العيون يجوز يلقى دواهـا
من صارع الدنيا دخل لـه بغـبه=سباحها يخشى شواذيـب ماهـا
فيها نوايع جنـد سبحـان ربـه=اللي رفع سبـعٍ وسبـعٍ دحاهـا
سبحان من يخرج من الزرع حبه=وأخرج من الما كل روح وسقاها
والشعر زين وشيـن كـلٍ لعبـه=مثل الضريبه من تسلـح رماهـا
أحدٍ ليا سدد علـى الـزول ذبـه=واحدٍ يثورها وهـو مـا قداهـا
ولا أحدٍ يشوف قصور فيما خطبه=كـلٍ بقولـه يفتخـر ويتبـاهـا
وجهت معنايـه لشخـصٍ مانبّـه=رجّال فاهم جابتـي وش نحاهـا
رجلٍ عن المنقود في راس تبـه=يحفظ كرامة سمعتـه ويحماهـا
ماهوب مغرورٍ غـروره نصبـه=عشاق عميا عنـد وجهـه قفاهـا
يجي لها باللـي عشقهـا مغبـه=وألا النشامـا ماتخثـع إخطاهـا
وراع النميمـه لا تداريـه كبـه=خلـه يـروح بكلمتـه ماحكاهـا

:: يدلي على الخرب النشيط بشطـاره ::

كلٍ شرا له طيـر ويقـال صقـار=غشيـم والا عــارفٍ للصـقـاره
غامر وطامر مع مسافـات واديـار=مع فـرّع الوديـان يكثـح غبـاره
يدبك على الحروة وترويج الاذكـار=امـا الضحـى والا تليّـة نـهـاره
واكثرهم اللـي ماتوفـق بالاسفـار=لا صـاد صيـد ولا ترّيـح بـداره
هـذا وانـا معهـم مسنّـد وحـدار=والطيـر زاوي مربطـه بالغمـاره
يومٍ مع الصحرا ويـومٍ مـع القـار=ونعطي على مصباح الارنب بشـاره
وناخذ مع الجره مسافـه ومشـوار=ومن خوف لا تجحر نسد الجحـاره
كل النهار نحوس وندوس الاشجـار=من حرصنا ناطا الشجـر والحجـاره
اثر الولع حكمه على النـاس جبـار=راعيـه ماتشكـل عليـه الخسـاره
خص اللي لهم بيض الدواغر لهم كار=وقت القنـص ماحسبـوا للتجـاره
قبل صلاة الفجـر قـد شبـوا نـار=والصبـح تالـي ليلهـم بانتـظـاره
وليا اصبحوا كـلٍ نـوى درب دوار=قبل شعاع الشمس يكشـف حمـاره
وعند الحراوي طلعوا عكف الاظفار=اللي على بيـض الدواغـر سعـاره
اللي لهـن عنـد الصقاقيـر مقـدار=فيهن على الخرب المخيـش جبـاره
خص الذي بمصارع الخرب حشار=يدلي على الخرب النشيط بشطـاره

نعوذ بالله وإياكم أعز خلق الله من الدنيا وما فيها ونسأل الله عزيز الجلال خيرها وخير ما فيها إنه سميعٌ مجيب الدعاء ..
وكن أخي أبو زياد برعاية الله عز وجل وحفظه أنت وجميع العزوة الكرام يا أعز خلق الله أجمعين ..

قصيده جميله بارك الله فيك

قصائد جميله جدا مليئه بالحكم والنصائح شكرا لكم جميعا

قصيدة جزلة