‏
المراجل دربها عسر وشـطـيط= تـلـة تـتـعـب قـدم مـن نـطّـها
المراجـل واسـعـه مثل المحيـط= يعجزالغــواص يعـبر شـطّـها
ومن سـمع لزعيط هو ويا معيط= الـقـوافــل تنحرف عن خطّها
لاتجالس من يحطك بالحطيط =قـيـمة الرجـال هـو يـحـطّــها
لاتكن جبار ولسـانك ســليـط= وط نفسـك للضـعـيف وطّــها
الغلط ون جاك من بعض السقيط = كلمته من خلف ظهرك قطّها
والخطا من صاحبك كانه بسيط =كان تـنـغـطى الخطـيه غـطّها
الغـشـيـم الى عـذلـتـه يستشيط= ون بداك بـشـور كـبـدك بـطـها
انحصل فرقاه قل هـفـت مـقـيـط= جعل عينا تفقده الرمـد يلـطـهـا

الأخ طالب الونيس صح لسان ويسرني أن أجاريك بهذه الأبيات القلائل :

الـزمـان الـيـوم مـن حـظ العـبـيـط *** الهـذور الـلي البراطـم مطهّـا
من زمان حـزيـل والفارس صميـط *** مـا تسـاوى نـمـرها مع قطّها
كيف يا أبن ونيس وأن مال الغبيط *** والليالي ما عـرفـنا اخططـهـا
البشـر يا مسنـدي صـارت خـلـيـط *** ما تعرف صقورها من بـطهـا
يالـزمـيـل الـكـل مـن بـقـعـا يـعيـط *** الـولـي يـكفيـك شـر أورطـهـا
والـلي مـن الغـطـرسه لهـم نحيـط *** يا حـلو عـلى الصوابر سطها
الحصان الـلي رهـيـمه لـه عطيـط *** جاب كدش مـا تعـدى حوطهـا
كـم نـسـل اجـواد عـن ستره يميط *** ما فـرق بين السحابه والطهـا

صح لسانك ابو مشعل على هالمجاراه الجميله
والحقيقه انني افتخر بذلك بان يجاريني شاعر بقامة بن عبار

الله يقويكم ويزين مساعيكم وعن ما اشرتم اليهم يحميكم ومعهم ابليس - مجارات رائعه نقد بناء وتخلي الواحد يحك صوابره ويقيم نفسه ويرجع لواقعه اذا به فكر صح لسان الاخ الكريم طالب الونيس-- والاخ الكبير ابو مشعل الذي لايهمل اخوانه ويجاري من يستحق والكلمه ميزان عقل الانسان وفقكم الله ورعاكم