يـازيـن مربـاع الفياض المجيـــده
--------------------------------
تتــوق. نفسـي للشـــمال وتــريــده = والبعــد عنــه اليــوم مــاعــاد ينطـاق
وشـــعــاد انـا لـوقـلـت ميـة قصيـــده = وطــرزتــهــا ياصـاحـبي فــوق الاوراق
مـا جـبت نصف اللـي بقلبي رصــيده = الشوق صعب ولاهب الشـوق حــرّاق
قـلبي علــى هــاك الــديـار البعــيـده = يشـتاق شــوقً مايـوصّـف بالأشــواق
زودً عـــلــى قـلبـــي ونـابـض وريــده = تتــوق لــه نفسي وفكــري والاحـداق
عسى عليهـا الخيـر يـظـفـي مــزيـده = ومن كل صـوب يجيلها البـرق شـعّـاق
وبــلً مــن المــنشــأ تصــافـق رعيــده = وكم من محـبً منظـر السـيل له لاق
والنفس من شــوف الخبـاري سـعيده = واليــّا تــحـدر ســـيـلـهـــا. لــه تـدفـاق
ومنـاظـــر .. الغــدران عنــدي فـريــده = تشـفي خفـوقً هــم الايــام لــه عـاق
وشـوف الــربيـع اللي مطـرهــا يعـيـده = في شـٰـايـة اللــي للمخـــاليـــق رزاق
يـازيــن ...مــربــــاع الفيـاض ...المجيــده = والعشب من كل نوع في كل الاشـناق
ريــح النفــل يشــفـي الكبـــود ويفـيده = ربـلـــه ومــنـبــوت الـقـــريطــا ورقــراق
ونبـــت الخزامــا بالسـٰهـول المـديـــده = والشـٰيح ريحـه يشرح الصدر وان ضـاق
وابــي اتـمـنى يــالــعـقــول الـرشـــيده = مـيتـيـن شـقر انعيم مع عشــرة انيـاق
وابـعــد عــن اخبــارً تــلاشــى أكـيــده = نمسي عـليهــا ثــم تـرجــع بالاشــراق
علُــوم المصــايــب كـــل يٰـــومً يــعـيـده =بــث الجـزيــره والحـدث يـجـلب ارهــاق
الجــرح منــهُــا اليــوم ينــزف صــديـــده = والبعــد اطيّـب مــن هــذَر كـــل لقــلاق
هــذا هـوى نفـسي وشـــفـي وعـيــٰده = وهـذا المــراد اللي لـه الـقُلُـب ينســٰاق
أمــــا تــــرى الــدنـيـــا مــتــاعً زهيـــده = حـلــمً وفـــي تـالـي خــواتيمــه افـراق
الــعــمــر ســاعــــه والليـــالـي عـنيــده = ولابــدهـُا مـن لـفـة السـاق بـالســٰاق

محمد سوعان الربيّع

أخينا الشاعر الفذ محمد سوعان الربيّع يتمنى مأتا نعجه نعيمية شقر وعشرة نياق ويتمنّى الربيع وشوف الخباري والغدران وهذه أمنية من أسهل الأماني ولكن أين النجع الذي يكون بوسطهم يرحل وينزل معهم فقد هاجروا وتحضروا بالمدن ولو حصلت هذه الأمنية فأنه سوف يقضي وقت الربيع ثم يعود وهنا تذكرت أبيات من قصيدة للشاعر الراحل عايد بن ضافي بن جلوي رحمه الله عندما دوّج بالديار التي كان يخبرها نجوع ثم خليت من سكانها فقال من قصيدته رحمه الله :
هـذا القـلـيـب الـلي وردنـاه يا حـمـود *** وهـذاك مـنـزلـنـا ومـنـزل عــربـنـا
وهـذا السمـاد ومـوقـد النـار موجـود ** وهــذاك مـنـزل بـيـتـنـا يـوم يـبـنــا
قــدام بـيـض أيـامـنـا تـنـقـلـب ســود *** قـبـل خـبـيـثـات السـنـيـن تـحـربـنـا
يا مسنـدي مـا ينفع الـلـوم يا حـمـود *** عـلى السنيـن الماضيـه لـو عـتبـنـا
والـلـه يـلـولا بـهـلـت الـدمـع منقـود *** لأشكي زمـان طـيـب وقـتـه عـقبـنـا
وقتن تخبره يوم أنا وأنتت يا حـمـود *** يــامـا ضحـكنـا بـه ويـا مـا طـربـنـا
يـوم الغـنم تسرح بـهـا نـوف ولهـود *** مـستـانـسيـن مـع طـوارف عـربـنـا
ومـكـيـفـيـن بـونـسـةٍ مــالـهـا حـدود *** لأيـام تــالــي وقــتـنـا مـا حـسـبـنــا
وياما وردنا صبح الأمطـار يا حـمـود *** ويـامـا ملينـا من الخـبـاري قـربـنـا
بالصيف مع صفقات عمري ومحمود *** نشـره نجيب الكسب لـو مـا كسبنـا
والـيـوم مـا يـسرح لهـم نـاعم العـود *** وش عـاد لـو نرقى الرجوم وتعبنـا
رعـيـانـهـم صـاروا بكستـان وهـنـود *** قـلـب عـلـيـنـا وقـتـنـا وانـقـلـبـنــــا
الشيـب مـا يحـتـاج تـثبـيـت وشـهـود *** يا حمـود عـقـب شبت العـمر شبنـا
مـن كـمـّل الـسـتيـن لا يـرجـي الـزود *** غـيـر السجود وقـول يـا رب تـبـنـا

اخوي ابو مشعل يسعدني مرورك الرائع والذي هو كـــ رشــة العطر على عباءة الابداع حيث تنقلها من جمالها الى الاجمل والاروع
لكن يابو مشعل ربي يبارك فيك انت احبطتني وجعلتني اتراجع الى ما كنت عليه ان لم يكن الى الاسوء .... لان البر فيه سعة صدر وترويح عن النفس
وكنت مخطط ان اعمل تلك الامنيه وابعد عن اخبار الحدث والجزيره

وابــي اتـمـنى يــالــعـقــول الـرشـــيده = مـيتـيـن شـقر انعيم مع عشــرة انيـاق
وابـعــد عــن اخبــارً تــلاشــى أكـيــده = نمسي عـليهــا ثــم تـرجــع بالاشــراق
علُــوم المصــايــب كـــل يٰـــومً يــعـيـده =بــث الجـزيــره والحـدث يـجـلب ارهــاق
الجــرح منــهُــا اليــوم ينــزف صــديـــده = والبعــد اطيّـب مــن هــذَر كـــل لقــلاق
هــذا هـوى نفـسي وشـــفـي وعـيــٰده = وهـذا المــراد اللي لـه الـقُلُـب ينســٰاق
أمــــا تــــرى الــدنـيـــا مــتــاعً زهيـــده = حـلــمً وفـــي تـالـي خــواتيمــه افـراق
الــعــمــر ســاعــــه والليـــالـي عـنيــده = ولابــدهـُا مـن لـفـة السـاق بـالســٰاق

ترجمت مايدور بنفسي بهذه الابيات البسيطه المتواضعه ..... لكن هالحين خلاص دام هذا رايك يابو مشعل
سابقى كما انا عليه مقابل الحدث والجزيره لين ربك يفرجها

اشكرك على مرورك العطر وعلى ايراد قصيده المرحوم عايد بن ضافي بن جلوي

تقبل خالص الموده والتقدير .

الأخ الفاضل محمد بن سوعان الربيّع حيّاك الله ونسأل الله أن يحقق أمانيك قبل سنين في بداية مشار الحياة كنا نقضي أغلب أوقاتنا في لعب الورق فزارنا الشاعر لافي بن محمد بن عبدالدائم الجعفري ووجدنا نلعب ورقة وكان ما يعرف لها فكتب هذه القصيدى لافي بن محمد بن عبدالدايم ينتقد الذين يلعبون الورقة :
يا شيب عيني كل أبوهـم لواعيـب == فازوا عـلى لعـب الورق يا خساره
ما فكـروا يا مسندي وشـو العـيـب == العـيـب الـلي مـا يـلـتـقـابـه نـمـاره
العيـب عيـب وكـل عيـب عـذاريـب == لعـب الورق يا نـاس مابـه سفـاره
لا صار ما تلاعب حسين التراحيب == لـعـب الـورق يـرث بكبـدك مـراره

لا صار ما ترقـب بروس المراقيـب == وتنظر على فياض تطارد خضاره

وتشاهـد الغطروف زيـن التعاجيـب == وإلى حصل فرصة تجي له زيـاره

وإلى وصلت لصاحبك طاهر الجيب == عـد الصحـيح ولا تـقـول القـمـارة

قـله عن اللي صار لك من عواقيب == يـا زيـن بـعـدك بالضمايـر حـراره

حـتى يبـيـّن لـك جـمـيع المـواجيـب === وإلى عـطاك العـلم عـطه الأشـاره

عطـه الوكاد ورتـب الهـرج ترتيـب == والعـبـد وقـتـه مـا يجي باختيـاره

ولا كـل من هاوى البنات الرعابيب == يـاخـذ شـفـات الـبـال بـأول نهـاره

ولا كـل مـن دار الشلايـا غـدا ذيـب == الذيـب الـلي لا غـار ياخـذ اخيـاره

الذيب ذيب ويفهم الصوب وايصيب == ما هو الذي يجبر ضلوعه اجباره

مـا هـو الـذي يطـلـب بلـيا مطاليـب == الـلي عـلى الجـيـران يـشـب نـاره

الخايـب الـلي مـا يجيـب المكاسيـب == تـمضي حـيـاتـه كـل يـوم بـعـزاره

عسى الذي جنب عـن الحق تجنيب == عـلى صـفـات الحـق يـقـرأ قـراره

تكتـب عـنـاويـنـه ويـأتـيـه تـعـذيـب == ويركى على جمرن تقادح شراره
وعسـاه دايـم مـهـزلـة لـلأجـانـيــب == حـتى مـع الأقـراب تـنشر اخبـاره
أقـولـهـا ولا فـيــه شــك ولا ريـــب == وزودٍ عـلى هـذا نسـوق الـبشـاره

وقلت هذه القصيدة مجاراه لقصيدة لافي بن محمد بن عبدالدايم أوضح له أننا لو يحصل لنا ما نريد كان ما اضطرينا للعب الورق فقلت :
قـال الذي يعـرب من القيـل تعريـب == يخـتـار مـن زيـن المثايـل خـيـاره
يـا لافـي المنعـور يـا ماكـر الطيـب == أسمـح لـنـا يـا عـز ضيفـه وجـاره
مـن قـلـة الونسة غـدينـا لـواعيـب == لا شـك مـن يخـطي يجـوز اعـذاره
نـلعـب ولكـن مـا نـكـب المـواجيـب == ونفهـم سلـوم الباديـة والحضـاره
أخيـر مـن لعبـه مماشي العبـاعيـب == بالروض اللي تنعشك بنة ازهـاره
مع الفلا وتصعـد بروس الشناخيب == ويمضي نهـارك بيـن قـاره وقـاره
وأخيـر من لعـبه تحـدي النواصيب == إلـى تـلاقـوا عـنـد خطـو السمـاره
والكـل يبغـي حـظـوتـه بالمعـازيـب == مثـل الجمال الـلي طليقـه اهجـاره
وأخير من لعبـه إلى رحـت خطيـب == هويـان والمطلوب تقـدر احضـاره
تلقـا عشيرك يكرب الطنب وأيليـب == مـشـتـاق مـا عـنـده لـودك نـكـاره
وأخيـر مـن لعبـه شطير المخاليـب == مقـناص صيرم مـن نـوادر حـراره
تعجـبـك هداتـه عطيـب المضاريـب == راعـيـه مـبـطي عـوده لـلـصقـاره
وأخير من لعبـه محاظى المحاديـب == يفرح بهن الـلي شبت النـار كـاره
فـي ربعـة تلـقـابهـا العـود والطيـب == فيها الرجال اللي سوات السعـاره
وأخيـر من لعبـه ملاقى الأصاحيـب == الـلي عـلى يـمـنـاه والـلي يسـاره
فـي مجـلس مـا يـلتـقـابـه أجـانيـب == مـن عـزوة ما هـم هذاليـف حـاره
وأخير من لعبه إلى رحـت تغـريـب == مـن فـوق هـاف مـا يـوني غيـاره
لـفـه شمـال ولا تـميّـل عـن البـيـب == حـتى غـريب الـدار يوصـل ديـاره
ولالي على مـا قـلت يالقرم تعقيـب == وأخيـر مـن كثـر الكـلام أختصـاره

هالله ... هالله يابو مشعل صح لسانك الحقيقه درر ومن راس اديب
مشهودله بالجزاله ودقة الاختيار للمفرده الراقيه
تسلم ربي يحفظك ويطول في عمرك ..
صح لسان الشاعر اللي هيّض هواجس ابو مشعل
وجتنا تلك الديمه المحمله باجمل تباشير الخير ....
تقبل خالص مودتي وتقديري لاهنت .