السلام عليكم ورحمة الله وبركاته

تفاجأت بوجود قبيلة في الحجاز تحمل نفس اسم قبيلتنا السّبعه وايضا نفس العزوه اهل العرفاء ، ولكن ينسبون الى بني ذبيان من غطفان القبيله القيسيه المضريه.
هل هناك علاقه لهم بنا من قريب او مجرد تشابه اسم وعزوه مثلهم مثل قبيلة سبيع الغلباء ؟

حيّاك الله يا راعي العرفا لا تفاجأ فأن العرب تتشابه بالأسماء والأبل كذلك ونحن نكتفي بسبعتنا وبعرفاهم ولست بحاجة للزود ولو أن هذه القبيلة التي ذكرتها من السبعة لابد أن يكون هناك خبر يفيد ومن خلال البحث الطويل ما أذكر اسم يطابق اسم السبعة وقد ذكرت :


السبعة

على صيغة العدد فخذ من الرحمة من الجمعة من النصار من الربشان من القعاقعة من الرولة من الجلاس من ضنا مسلم من عنزة

وإذا يوجد بالحجاز اسم قبيلة مطابق لاسم قبيلة السبعة فلا علم لي بذلك

السلام عليكم ورحمة الله وبركاته ،،،
تحيه طيبه للجميع وتقبل الله منا ومنكم صالح الاعمال وكل عام وانتم بخير على طاعة الله ،،،،

بعد التحيه ،،،


الحقيقة مصادفه بعد انقطاع عن المنتدى قرأت موضوعك اخوي عنزي العنزي ، واقول مستعيناً بالله ،،،،

لم اسمع في حياتي من الشيبان الأولين وعلوم الرجال اللي يتناقلونها بالانساب ، ان السبعه من عنزة انهم من سبيع او اي قبيلة اخرة ولو كان هذا الأمر له رس او علم موجود لذكروه ولايوجد به معيبه وكثير من القبائل بها نزائع ولكن المسأله تقف عند حقيقة الأمر ذاته لا على الاهواء والتكهنات ، عندك بعض الاخوان من سبيع هداهم الله يبونا منهم باللي هي به ومستميتين على هذه المسأله وحنا والله مادرينا عنهم ، ادخل في منتدياتهم وتجد سوالف ماتدري وين وجهها ، واعتقد والله اعلم ان هذه المسأله بدأت بعد ذكر الامير السديري الله يرحمه ان السبعه ينتخون برتيّجات ٍ يم الطايف ، رضيمات ماشفتهن ليومك ذا ،
وهو مخطي وهذا يمكن النظر له من جهتين ، الاولى ان السديري الله يرحمه ماذكر القصص عن رواة من السبعه والا عرف ان السبعه اهل العرفا والعرفا ناقه ، مما يجعلنا نقف عن المرويات المذكوره في حق السبعه من جهة ومن جهه ثانيه الخطأ المذكور عن العرفا ، والمسأله حنا ماحنا مختلفين على العرفا لكن اسال ابناء سبيع وشي عرفاهم وشف وش يقولون لك ،

الامر الاخر السبعه من ذبيان من غطفان انا والله اول مرة اسمع بهم وبعد بحث بسيط لم اجد مايكفي عنهم ويبدو انها قبيله صغيره او فخذ من بني ذبيان وقد اطلعت على ماكتب عنهم انهم سبيع من بني ذبيان من غطفان ولعل تسمية السبعه عاميه مثلها لدينا لكنها عندنا من قديم ولااعلم ان كانت قديمه فيهم ام حديثه ،ولقد قرات رد لااحد الاخوان تحمس وقال ان السبعه من عنزة من السبعه من بني ذبيان من غطفان فرد عليه اخر بان السبعه من عنزة قبيلة كبيره والسبعه من بني ذبيان من حيث العدد لايقارنون بالسبعه وربما سبيع الغلبا نفسها السبعه من عنزة توازيهم كقبيله رغم ان السبعه فخذ من قبيلة وسبيع قبيلة لحالها وعنزة فخوذها قبايل تطاحنت فيما بينها قبل ، لو وقفت مع بعضها في قديم الزمان لما استطاعت القبائل الوقوف ضدها ،،

المهم ، القول ان عزوة السبعه من ذبيان العرفا محل نظر لاني لم اقف عليه ، وحتى لو صح فهو ليس دليل ، ومن الامور التي طرأت بعد الحياة المعاصره من ثمانينات الهجريه من عام 1385 وجاي وبداية اجتماع ابناء القبائل ببعضهم بالعسكريه ،انتشرت مثل هذه الاقوال ان السبعه من سبيع او سبيع من السبعه رغم ان الشيبان من عنزة لايذكرون ذلك الا من اناس لايكون عندهم المام ممن ينقلون السالفه مشان ينقلون السالفه ، وهذي مثار للشائعات وترويجها وتلفيق القصص ، مثل سالفة مخاوي الذيب اللي كلن يحطها له ، ماتلقى قبيلة ماتدعيها ،
والبعض يسولف السالفه للمغالط لو قلت اكالسنه يوم نغرب قال لا بالله شرقنا ،
اما الشيبان البدو اللي بقوا على باديتهم الى عندي بهذا وهم ماعرفوا العسكريه وناس عندهم عناية بالنسب والقصص القديمه لم يذكروا بتاتاً طاري ان السبعه نزيعه السالفه المشهوره والمتداوله
ان عبيد له ثلاث ابناء سليمان اصغرهم واوسطهم فدعان واكبرهم سبيع ، ويوم مات ابوهم ورثوا منه ناقة على ضيار ، اللي هي ناقة سبيع وناقة فدعان وحدرها بكيره مضيرينها على ناقة سبيع مشان
ماتقطعهم من الحلب ، وانت ياسليمان له مركوبه ، الجدعا ،والبكره بنت ناقة فدعان مار انها لسليمان مشان عدل القسمه ، والسالفه لها تكمله اذلّي اكملها يزعلون عقب سبيع ويزعلون عقب سليمان
هنيا سالفه لها تكمله ،
هذا اللي حنا نعرفه ، اما الجزم بصحته من عدمه لانجزم به لكن نقول هذا هو المتوارث والمعروف يسولفها السبيعي والجعفري والفدعاني وكل عنزة ماهي خفيه على احد، لو فيه رس ان السبعه ماهم عنزة غير يطلع العلم وغير يبين ، لكن هذي سوالف حديثه ماطلعت غير عندي بهذا من العسكريه وجاي ،والمشكله انهم يقولون ان السبعه مثل وسم سبيع
مجرد حكي مشان الحكي مافيه حقيقة ، العام طلعنا يم هالبر باول الوسم وشابين نارنا بالبر ومع جذوة الدله على النار الا راع اكالبل يميّل علينا وينزل ، وينشد له عن اباعر وهو صيده يتشوّف ماصيده البل ، وعطيناه علم اباعره وتقهوى عندنا ونشد والرجال من بشر بدون تحديد ، ويوم دري انا مسكا قال انتم يالسبعه ماانتم من سبيع؟ على صيغة السوال ، قلت له عاد وش يدريك انا من سبيع قال الوسم نفس الوسم
قلت لا بالله لا الوسم نفس الوسم ولا افخوذهم من فخوذنا مار تعرف وسمهم ، يامار مايدري ، بس سالفه تنقال هاللون شاهدها هالكلمه يوم يقول ان الوسم مثل الوسم هذي هي دليله بالكلام وبنفس الوقت دليل ضده مار المشكله انه مايدري ، وهم غادين عن الهجار وسم العرينات انه يشادي المسيكي وهو يفتخت عنه المسكا يفحجونه على الفخذ الايمن ومايجي مثل الاتش بالانجليزي لان المسكا يظهرونه ، يعني تستطيع القول مطرقين بشكل متوازي على الفخذ الايمن افقيات يتمثناهن مطرق عمودي يظهر من الثنين فوق وتحت والسبعه ماهي المسكا هذولا عقب مسيك والسبعه قبايل كل قبيله لها وسم اضف الى ان العرينات يضعونه على الخد وصغيّر ماهو مثل المسيكي ولاهو بديرته ، وبغض النظر عن هذا كله الوسوم تتشابه بين القبايل ماهي دليل الا اذا كان هناك قرائن واضحه والوسوم من قديم متوارثه وبعضها هميله وبعضهم يبدع له وسم ماهي قرآن منزل ، اكالسنه صارت مشكله بين قبيلتين انهم ياسمون الوسم نفسه وهم مايدرون عن بعضهم قبل وهذا شي وارد

والدنا ابو مشعل كل الشكر لك على الرد وحرصك على التجاوب مع شباب ابناء القبيلة

البناخي فهد المسيكي شاكر لك يابن العم على الرد لاهنت وربما حصل اللبس مثل ماذكرت عند الاخوان من قبيلة سبيع بني عامر بن صعصعه .
واتمنى من يكون له العلم عن قبيلة السّبعه من بني ذبيان ان يرد علينا، عرفت القليل عنهم بأنهم من تهامه وان لهم حلف في الحجاز مع قبيلة حرب

ياهلا بك اخوي عنزي العنزي

الله اعلم ان اللي من هذولاك ، تقل ذولا انتم ياللي مع حرب همزوا مبطي وتقل شفت موضوع تعارف بينهم او شي من هذا القبيل

ودنا انا نعرف عنهم اكثر وبالنسبه لسبيع الغلبا عندي بهذا قبل كم يوم صار نقاش بين واحد مسيكي من الجماعة قريب يعلمني يوم تطارينا وصار كلام وقال ان هنيا رجل قال له انتم ماانتم عنوز وهي على سبيل المزح والكلام يجيب بعضه
يقصد انا من سبيع

قاله طيب انت يارجل ابيك تعد لي لجدك الخامس او السابع ،يامار تبرجم الرجل وتغير وجهه ماردها ،وانحرج بنفس الوقت ، فهذا الرجل اللي مايدري عن جده يجي ويفتي بنسب قبيلة كامله ويقول انتم كذا وكذا وهو مايقدر يعد لجده الخامس ، ولو كان يعتني بهذا الجانب عد الرجل ، فصاحب العلم اما انه يسنده ويكون مطلع ويجيب العلم المقرون بالدليل ، اما سوالف المجالس على تشابه الاسماء انتم كذا وكذا وبالهرج والهذرمه وليا جاء الصملي ، مثل الزبده اللي طلعت عليها الشمس ، هذا ماينفع ولايودي ولايجيب

طبعا هذا الرجل لم يتوقع مثل هذا السؤال وربما انه قال ماقال فقط لمجرد التسليه والكلام ، رغم ان السؤال عن الجد الخامس والسابع هذا امر بديهي واللي مايعرفه عزتي له ...