قال من وصى عياله =ودَه إلهم بالشكالَه
خابرِ راعي الرزاله = بالمجالس تشنعه*
يامهلي شوف إخوانك =شانهم من صوب شانك
عند ما يزعل لسانك = عنهم الغيظ إدفعه
وانت ياعلي إفتكر =خلْ قولي لك ذِكرْ
رِبعة الطيب شكر= والردي لا تتبعه
يامسلم وانا ابوك = العرب لو صاحبوك
ما يسرك غير اخوك = كل ما يآمر طعه
ياعيالي كلكم = إفطنوا فى حالكم
التنازع ذِلكم = والتصافي منفعه
إجهدوا لله بطاعة =واتبعوا راعي الشفاعه
قبل يومِ فيه ساعه = عند ربي مرجعه
القصير إمشوا بحقه = لو بدت منه المشَقه
وان كِثر بالقلب دقَه=اُطوْ بيتك واشلعه
ما دواه إلا مرَاحه = فى فراق السوْ راحه
لا تجازيه بقباحه = يوم ربي صرقعه*
والخوي حقَه عليكم = تجعلونه من حديكم
كل شغله فى يديكم = لين ياصل مربعه*
إن تمرجل كيِفُوا به= وان ترداَ عبِرُوا به*
لو يصير إلكم عقوبه =غصةٍ بالمبلعه
والحمقْ يخِرْ مضرَه = يلحق العِقّيلْ شرَه
وان طروا راعيه مرَه= قالوا الله يقطعه
والصبر عند البلاوي=أخير من كثر الشكاوي
لو تصيح ولو تلاوي =ما بغى الله يصنعه
واحذروا حقرْ الفقير=دعوته يمكن تصير
أدخل الله واستجير=قبل يذرف مدمعه
التكبر للرخوم=يحسبون أهم القروم
عند مايبدي اللزوم=عشرهم نصف أربعه*
والعدو لو زان باله=انقلوا منه الحماله*
لو*مغط لكم حباله=بغضكم يبقى معه
والصديق بكل حال=عند حظرات المجال
مدحكم عند الرجال=كل ماجاه أشبعه
والصديق ليا نكركم=مادواه إلا*ظهركم
وان خضعتو له حقركم=صرتواعنده*مضفعه
والتمني مايفيد=لو تزيده ما يزيد
مثل بقِ طار من إيدْ=بالهوى من يجمعه
والحلوف بغير حاجه=كلها ذنوب وسماجه*
واجد اللي باللجاجَه*=دوم حلفه يمطعه*
كم صِبيِ بالرخا=ظنكم فيه الصخا
وان*كربتوه إرتخا=كل عذرِ ياسعه
جاز من كل الصداقة=والمحبه واللباقه*
والسبب نفسه رقاقه*=حتى ألانه تضلعه*
والمغفل يحسبنَه=دوم فى نعمه وجنه
ماخذِ دنياه ظنه=لين بقعا تصقعه*
ثم يقعد من منامه=ملحقِ نفسه ملامه
عقب ماشاف الملامه=يوم هاك الكعكعه*
والرجال إبهم فهيم=لا يضام ولا يضيم
عند ما يبدي حليم=والحقوق مشرَعه
راعي الصبر محَمُودْ=لين*مُولمْتهْ تعود
ثم*ينزل بالحدود=*والمطمًنْ يرفعه
والرجال ابهم ثقيل=كل عمره مايعيل
وان طمع فيهالجبيل*=دون حقَه يصفعه
إن بغيته بالمُروَه= شفت نوْ الخير نوًه
وان بغيت الحق قوه=طز عينك باصبعه
وان بلاك الله بعاقه=من مقاريد الرفاقه
لا توريه الحماقه=لين ربك يقلعه
خلْ شوفاتك بعيده=عند *نفخاته وريده
ثم عقب لا تعيده=*السعه ثم السعه
كم صِبيِ كل يوم=يعتزي من غير قوم
وان تناطحت القروم=مايداني الفرقعة*
صايرِ للشر سِبَه=لين يلقى من يدبه
ثم يبرك للمسبَه=يوم جاه من أشبعه
والسفيه ليا نهيته=عن طريقِ مابغيته
لو تجرَه ماقويته=والندا مايسمعه
راح فى دربِ يضره=وانت شورك مايسرَه
والله لو انك تجرَه=مايبي غير إسنعه
والرجال ابهم كذوب=مايهاب من العيوب
لو يفجر مايتوب=*والخزا مايوجعه
والرجال ابهم صدوق=فى كلامه مايتوق*
يفتهم كل الحقوق=والكريم إمسنعه
والرجال ابهم كريم=لاخطر خِلفت رزيم*
وان طرش قلبه سليم=كل زادِ يشبعه
والرجال ابهم بخيل=لاخطر مدَه قليل
وان طرش ماله مثيل=يشَره الله ينزعه
والحريم ابهم طبايع=فيهن*التخميل ضايع
لو بهم عاصي وطايع=كل الأكثر مندعه*
النصاح ايبيننه=والخمال*يدمدمنه
وان بغن دربِ يجنه=لو عليهن مسبعه*
ثم فيهن من حبيبه=رجلها تشهِر بطيبه
واهني منهي نصيبه=لو متاعه سْلَوعه*
وان طرش وابطى مراحه=أمنن قلبه براحه
ماتطيع أهل القباحه=والجهل والُلودعه*
ثم فيهن*شلبديه=تاكل الطليان حيه
والردى ماهي رديه=مير ما جا تبلعه
رجلها لو جاب واجد=عندها ماهو بياجد*
إن سكت فى الفقر ساجد=وان تكلم تسبعه*
ثم فيهن من تحوفك=كنها تفرح بشوفك
وان تبيَن عرق جوفك=بين يديه اتمصعه*
تنصحك وهي العدوه=وانت تحسبها حمُوه
لا تظن ابها مرُوه=حبل وصلك تقطعه
ولاتقول إن العجوز=عن طبايعها تجوز
عند طاريهن تفوز=تضحك أم الدعدعه*
لو تصير بزي ضبعه=مالها بالعمر شبعه
كل مخلوقِ وطبعه=ضايعِ من طبعه
ثم فيهن من تعينك=دايمِ يدها بدينك
عندها مامثل زينك=لو عليك مرقعه
تفتهم حق الرجال=عند زوجات الحلال
الدقاق مع الجلال=كل شيِ بموضعه
ثم فيهن من *تحلوى=شرها يبلاك بلوى
لين*بلحجة تعلوا=فى ثياب مطوعه
ماهي من تعطيها سدِكْ=وانت كتم الَسد ودِكْ
تصبح الهرجه بضدك=فالندا مصلعه*
ثم فيهن من تحبك=واقشر ماتشوف*جبِك
*وْلحَمْتها لو تسبك=فى جسِدِكْ مربًعه*
إن تكلمت افضحتْك=وان تغاضيت أجرمتْك
وان تساكَتْ انْتنفتْك=نتف ريش القوبعه*
بع أقاصيها بداني=*زدتها والعمر فاني
لاتحط ابها مثاني=سوْ بيع مقلفعه*
ثم فيهن غشمرية=*صايبه ومجادعيه
عند ضحكات الثثنيه=من يجيها تلقعه*
والسفيه ليا نظرها=دايمِ يلهث باثرها
وان بغاها ماقدرها=بس يلهث مدلعه*
مايطيع أهل النصيحة=لو لبس ثوب الفضيحه
ولاعضاه بمستريحه=والعيون مولَعه
والذهين ليا عرفها=كفْ *روجه من ظرفْها
جاز منها *ماخرفها=لو تكون مهينعه*
ثم فيهن من وثيق=سدَها سدِ غريق
*مالناشدها الطريق=قولها ماتطلعه
سدَها مثل الأمانه=عند رجالِ تكانه
مايهوجس بالخيانه= رابحِ من ودعه
ياعيالي جعلكم= يبعث إسمي اسمكم
النصَاح أطيب لكم=والردى به خرفعه*
أمنُوا ترى النيَه=مثل ماقالوا مطيه
لاتصير ابكم رديه = فى محول أوزولعه*
الضعيف ليا نصاكم=لاتشحون بعطاكم
فى رجا الله ثم رجاكم=كل ماجا أقنعه
والعطا ماهوى بالله=*كوبةِ كثره وقله
ضايعِ راعيه ضله=ضاع والله ضيعه
إفهموا قول المجرب=مابقى وقتٍ يِطرِب
باقي الدنيا تخرب=محدِ تصفي معه
والزم ماعلى الصبي=طاعته والمذهبي
والصلاة على النبي = والأمور*مشمعه

"صقر النصافي"

يتبــــــــــــــــــــــــــــع

تشنعه = تنتقده وتزدريه
صرقعه = إبتلاه بالذى هو فيه
مرْبعه = مكانه الذى يقصده
عشرهم نصف اربعه = أي يصفي من العشرة أربعه
عبروابه = بمعنى أكملوا معه وتحملوا منه
الحماله = أي تحملوا منه
مغط = أي مدَ وأرخى الشىء
ظهركم = الحقران والتجاهل
مضفعه = المساكين الضعفاء
السماجه = الخرابيط والأشياء التى لاتعني شىء
اللجاجه = الصجه واللجه والأصوات المرتفعه
يمطعه = بمعنى يخرج الشى بسرعه دون تفكير
كربتوه = الشد والربط بقوة
اللباقه = الذرب اللبق الذى يٌحسن الكلام
ارقاقه = كناية لمن فيه رقه وضعف
تضلعه = توجعه وتؤلمه
تصقعه = تصيبه
الكعكعه = تقال لمن يكون اَخر أمره خلاف أوله
مولمته = حاجته وغرضه
ينزل = أي ينزل ويرضى بالحق ويقر به
المطمًنْ= الضعيف المظلوم
الجبيل = الشخص المقابل له
نفخاته وريده = أي فى حالة غضبه
السعه = البعد والتوسع
الفرقعة= الأصوات التى لايعرف مصدرها
مايتوق = لايغير ولايبدل
رزيم = الشىء القليل
مندعه = الغثا والهم
التخميل = الحكمة والرأي السليم
يدمدمنه = يخفينه ويكتمنه
مسْبَعه = الرجال الشجعان
سلْوَعه = القراشيع الباليه
اللودعه = الهذره والكلام الفاضي
ياجد = لايجد حاجته
الشلبديه = كثيرة التذمر التى لايعجبها شىء
تسبعه = تذله وترهبه
تمصعه = تخلعه بشدة
الدعدعه = الادعات الكاذبة لغرض التفاخر
تحلوى = تتجمل وتتصنع الشىء
بلحجه تعلوا = بمعنى لو ترقى فى حجا البيت والحجا هي المظلات العلوية دون السطح
امصلعه = عديمة الحياء التى لاتخجل من شىء
جِبك = مفارقتك
ولْحمتها = أي بكل جوارحها
مرَبْعه = أي معتاشه ومتنعمه
القوبعه = طير صغير
زدتها = تخلص منها
مقلفعه = البيع بقصد التخلص من الشىء بأي ثمن
صايبه = سليمة النيه
مجادعية = النشمية هابة الريح
تلقعه = تكعمه وتنهره
مدْلعه = فمه
روجه = مبتغاه وهدفه
ظرفها = أخلاقها وحُسن طباعها
ماخرفها = ماقطفها
مهينعه = اللينة الغشمرية
خرفعه = مهونه وذل
مالناشدها الطريق = كناية تطلق على الثقيلة الكتومة
زولعه = الشدة والكرب
كوبةِ = بمعنى التشنيع بالشىء إن كثر أو قل
مشمعه = محفوظه ومعلومه

بيّض الله وجهك يا أبو مشاري على نشر هذه الموعظة البليغة التي يردد أبياتها الكثير من المعجبين وبالمناسبة فكثيراً ما سألت عن بيت وكنت أرجح أنه لصقر النصافي ولا أعرف قائله وإذا وجدت هذا البيت من قصائد النصافي نأمل أيراده مع كامل القصيدة والبيت هو :

الصبر زين وفيه مقضات ثنتين *** تكسب جميل وتاخذ الحق وافي

اقتباس : المشاركة الأصلية كتبت بواسطة عبدالله بن عبار [ مشاهدة المشاركة ]

بيّض الله وجهك يا أبو مشاري على نشر هذه الموعظة البليغة التي يردد أبياتها الكثير من المعجبين وبالمناسبة فكثيراً ما سألت عن بيت وكنت أرجح أنه لصقر النصافي ولا أعرف قائله وإذا وجدت هذا البيت من قصائد النصافي نأمل أيراده مع كامل القصيدة والبيت هو : الصبر زين وفيه مقضات ثنتين *** تكسب جميل وتاخذ الحق وافي

حياك الله يابومشعل وأشكرك على المشاركة وإيراد هذه الأبيات الرائعة التى تدل على شاعرية قائلها وإن شاء الله سوف أبحث لك عنها فى الفهرست وديوان الشاعر وأوردها حسب طلبك"

دائماً تتحفنا بكل ما هو جميل عزيزي أبو مشاري ، فلله درك ودر الشاعر الكبير صقر النصافي ورحمه الله وأنزل على قبره شآبيب رحمته، فهو بكل جدارة فحل من فحول الشعر النبطي في الجزيرة العربية ..

بكل شرف ننتظر كل ما تجود به علينا وفقك الله .

اقتباس : المشاركة الأصلية كتبت بواسطة محمد بن دوهان [ مشاهدة المشاركة ]

دائماً تتحفنا بكل ما هو جميل عزيزي أبو مشاري ، فلله درك ودر الشاعر الكبير صقر النصافي ورحمه الله وأنزل على قبره شآبيب رحمته، فهو بكل جدارة فحل من فحول الشعر النبطي في الجزيرة العربية .. بكل شرف ننتظر كل ما تجود به علينا وفقك الله .

كل ماهو جميل ورائع نهديه لكم ولهذا المنتدى فأنتم أهلاَ له
الشكر موصول لك أخي ابوعبدالعزيز على هذا الترتيب والتنظيم
وأهديك والقراء هذه القصيدة للشاعرالنصافي مع خويه الذيب"
صقر
ياذيب وش علمك تهيض لساني
بعواك يوم المخاليق غافين
الذيب
أنا بلايَه قو جوعِ حداني
الليل قمره والضواري فواطين
صقر
ياذيب حِسِك فى منامي شعاني
لولا الحيا جاوبت صوتك بصوتين
الذيب
عزي لمن مثلي جداه اقنباني
ماله جدا والناس ماهم بمعطين
صقر
ياذيب ياللي بالخلا ماتداني
ماشفت لي حول الثميلة بويتين
الذيب
مريت لي بيتينِ يامودماني
عنها شمال وفى ظبطها مقيمين
صقر
ياذيب ماقاربتهم بإختلاني
ياكود تبخص فى فريق أريش العين
الذيب
أنا اللي من شاف زولي نحاني
مااحرزت أجيهم خابرِ غيبهم شين
صقر
ياذيب ماعينت صافي الثماني
عند الغنم ولا يرد البعارين
الذيب
أنا مااعرف الصاحب المرحباني
الناس واجد والعذارا مزايين
صقر
ماريتِه ياذيب عوده لِياني
والنور بين قذيلته والحجاجين
الذيب
هذاك انا قبل امس شفته وجاني
من كثر دمعه محفيِ مِحجر العين
صقر
الله يوفقك الشياه السماني
من مال كرهين الوجيه البخيلين

رحم الله الشاعر صقر النصافي وأموات المسلمين فهو من شعراء الواقعية والعواطف الصادقه"

الله يوفقك الشياه السماني=من مال كرهين الوجيه البخيلين

اللهم آمين ، عز الله إنه عطاه مناه، وياليت دنياك يا أبو مشاري على المنى والمناوي كان ما يبقى من حلال البخيلين لو هو رغيف، حتى يعلمون أن الله هو الواهب والمعطي وهو المغني سبحانه..

وألا ياليتها على الكيف والهقوة كان كسب بها طعّام اللقمة وملفى الخطار كنوز الدنيا وما عليها ولو إنه صرفها كلها بلا حسبان فهي والله ما هي خسارة بأهل الصخى وأهل العطى وأهل النبى الزين ..

سلمت وغنمت ولا هنت يا أبو مشاري ولا هآن منطوقك وأبلغك مبتغاك ومرجاك ..

ولنا الشرف كله يعلم الله بالتشرف بمعرفتك يا إبن الأكرمين ومعرفة النشاما أللي مثلك وشرواك ..

جزاك الله كل خير

الصبر زين وفيه مقضات ثنتين - تكسب جميل وتاخذ الحق وافي"الإستاذ الفاضل أبومشعل أسعد الله مسائك يبدوا أن هذا البيت قيل على سبيل المثل وهو بيت يتيم قديم لايٌعرف قائله وقد أُدخل هذا البيت ضمن قصيدة حديثة لأحد الشعراء يدعى محمد العمري من دولة الإمارات وهي كالتالي:
قال المثل فى سابق الوقت ياحسين
فى ماسمعنا حسب نظم القوافي
الصبر زين وفيه مقضات ثنتين
تكسب جميل وتاخذ الحق وافي
حذراك تستعجل طريق الصلف شين
إمش برويد ويتضح كل خافي
احمل علوم الناس ياخي على الزين
واياك من ظن وراه اختلافى
مهما توالت بك عيون المعادين
لاينشغل بالك وخلك سنافي
ان شفت شيِ يخدش العرض والدين
قاوم بحكمة كل طافى وهافى
لاتنخدع فى مغريات الشياطين
ارفع يدك للي للضرار كافى
خلك شجاع ساعة العسر واللين
لاترتجف عند الزحام ارتجافى
وان شفتها كثرت عليك الميادين
احرص على درب وراه العوافى
هذى حكم سجلتها للدواوين
تبقى على طول السنين العجافى
والخاتمه ياخيى على الراس والعين
نصيحتك يافارسِ مايخافى

السلام عليكم ورحمه الله وبركاته



أستمتعت في هاذه الصفحه




قصيد جزل من الووزن ثقيل جزاك الله خير