اهداء كتب جديده - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

12-08-2019, 07:11 AM

أهداء كتب جديده

أهدى لنا البروفسور فارس بن قليّل بن بادي العنزي مشكور كتابه القيّم ( سير من اعلام الوطن ) ويقع الكتاب في 516 صفحه ويحتوي على ترجمة ل 89 شخصية اعتبارية من رجال ونساء الوطن من أصحاب الشهادات العلميه العالية والذين لهم انتاج مفيد للوطن وقد رتّب الأسماء على حروف الهجاء ليسهل البحث عن كل صاحب سيره وقد أجاد وأفاد سعادة البروفسور في هذا الكتاب من حيث التعريف بشخصيات لها دور في جميع المجالات من العلوم والمعارف ومن ذوي المناصب المهمة في الدولة وهو قد اصدر هذا الكتاب بمناسبة رؤية 30 في بلدنا الغالي المملكة العربية السعودية بقيادة خادم الحرمين الشريفين الملك سلمان بن عبدالعزيز حفظه الله وولي عهده الأمين صاحب السمو الملكي الأمير محمد بن سلمان بن عبدالعزيز حفظه الله
نسأل الله أن يحفظ وطنا وقادته وشعبه وأن يوفق ولاة أمرنا لما يحبه ويرضاه وشكراً لسعادة البروفسور فارس على الأهداء ونسأل الله أن يوفقه

كما أهدى لنا مشكور الشاعر المعروف رجاء بن سويلم البجيدي العنزي ديوان شعره ويقع الديوان في 112 صفحة ويحتوي على عدد كبير من القصائد ويتضمن جميع اصناف الشعر من وطنيات ونصائح ووصف ومدح ورثاء ومساجلات ومما يضم الديوان مساجلة بيني وبينه :
قال الشاعر رجاء بن سويلم بن شداد البجيدي هذه القصيدة يسند على زميله عبدالله بن دهيمش بن عبار :

يا الـلـه يـا جـالـي ظـلام الـغـداري *** يا رب تحمينـا من الـبغي والشرك
يا الآدمي تمـضي سنين العـماري *** تمشي بأثر ناس وناس على أثرك
لابـد ما تـرحـل رحـيـلـك اجـبـاري *** بالواسطة والمـال ما أحـدٍ يـدبّـرك
ولابـد مـا تسفي عـلـيـك الـذواري *** ويدعي لك الـلي من دناياك يقبرك
آخـر مصيـرك للفـنـاء والـدمـاري *** تـسعـى وصـيّـاد المـنـيـه يـداورك
ولابـد مـن بعـد الطلوع أنـحـداري *** مابـه طريـق غـيـر دربـك يحـّدرك
من عاش بالدنيا يشوف الغـيـاري *** ناس تناضر زين زولك ومضهرك
شعبـانهـا تمشي بعـكس المجـاري *** تـحتـار مـنـهـا والتـقـلـّب يـحيـرك
صار الرخـم يشره لصيد الحبـاري *** والثعـلبي يـا غـار على الغنم درك
عصرٍ بـه الثعـلب يضد الضـواري *** يـلعـب بقطعـان الغـنم ما ينـاضرك
يـقـول لـلسـرحـان ذيـب الـمساري *** دورك مضى يا ذيب لزوم أوخرك
وأشوف صافي الجو يقلب غباري *** حتى الختوش تحاول اليوم تقهرك
ودنياك لأهل المال وأهل العـقاري *** وأن قل مالك حتى الأنـذال تحقـرك
اليـا فـضت مخبـاك مـالـك وقـاري *** المـال خـلا عفون الأنـذال تـامـرك
من كثـر مـالـه بالـدراهـم يـمـاري *** يصـد عنـك وصابره يفـركـه فـرك
الـلي بـسوق المـال بايـع وشاري *** كـثـرت فلوسه وأرتـفع مـا يقـدرك
وأبعد عن أهـل البلبله والمـزاري *** الـلي لجاجتهم عـن النوم تسهـرك
واللاش خـلـه لا يجي لـك مبـاري *** ولا تعـاشره لـو كان وده يعـاشرك
سـوالـفـه أحـلام لـيـل وهــــذاري *** تجنبه مالـه سوى الخصر والتـرك
وأستثـني الـلي ياصلون المحـاري *** اللي مثل بليهان لحمله برك بـرك
مثـل الجـبـال العـالـيـه بـه مـذاري *** زبن الضعيف اللي على عاتقه درك
ينفـق ويبذل سـر وأيضاً جـهـاري *** لاجيت ناصي ما خصرك وتعـذرك
هـذاك بـوجـهـه للـمـروه شـواري *** الـلـه يـستـر مـن تجـمّـل ويستـرك
وأرسـل لأبـن عـبـار لـيـه يجـاري *** قـرايضه مثـل الـذهـب ما يخسرك
من مصنع القيفان مـا هـو تجاري *** اليـا طـمـك أمـواج تـلاطـم يعبّـرك
سيف عنزة لا سن وقـت الطواري *** يحشر جنون الأنس من قبل تحشرك
وأنا يابو مشعل على الحـظ أداري *** عسى السعادة طول الأيام تغـمرك

قال عبدالله بن دهيمش بن عبار هذه القصيدة رداً على الشاعر رجاء ابن سويلم البجيدي :
خـط لـفـانـي زاد فــيـه أفـتـخــاري *** جاني جوابك يابو نواف وأشكرك
حيثـك يا أبـو نـواف كاتـب وقـاري *** والكـل يالمنعـور بالخـيـر يذكـرك
من ساس لابه يـوم قـص الأثـاري *** خيالهم لـو كنت بالأسـر يضهـرك
عـزوة هـل البلها اليا صار جـاري *** تدحـر عـدوك بالمعامع وتـنصرك
والمرجله ما هي بغـلـض العتـاري *** تدريبها من دون أعلمك وأخبـرك
مـن شام للعلـيا يـدوس الخطـاري *** أن طـاب علمك بالمخاليق يشهرك
هـرجك وكـاد وشفت كـل المواري *** وحيرني الـلي يا أبن شداد حيـرك
كما ذكـرت اليـوم عصر المصاري *** الـعـز بـالـدولار والمـجـد بالمـرك
هـذي حقيقه وأنـت بالوضع داري *** لاشك من رامك على المال ينفرك
الثعـلـبي لـو نـال منـصـب وزاري *** كان أنت صاحبته نكربك ودهورك
ابعد عن المذموم غادي القطـاري *** ترى الرزيل بصبغت العيب يمغرك
بعـدك عن أهـل البلبلـه والهـذاري *** يبعـدك عن كل المشاكل ويضهرك
والله مالومك لـو تجـوب البـراري *** تبعد عن اللي من العرب مايوقرك
تـنـزل بـوادي ما تشوف الكبـاري *** ولا تسمع أصوات تـلجك وتسدرك
ما تستمع تفحيـط جيـب السفـاري *** لا فـر دولابـه مـع القـار له صرك
تسعى بسماهـيـد الديـار القـفـاري *** وعشب الربيع اليـا تلفـت يـبهـرك
مـابـيـن غـدران الـفـلا والخبـاري *** تبحث عن الـلي بالخمايل يصورك
عنـدك جليس لطيّب السلم ضاري *** مثل أبويوسف بالسوالف يخاشرك
صادق صدوق وبالعلوم استشاري *** أن حرت شاورته وأن أحتار شاورك
تشرح لـه ظروفك وما كان جاري *** موثوق تبـدي لـه خفـايا سرايـرك
أمـا قـصص ولا حـديـث البخـاري *** له ينشرح صدرك وينسر خاطـرك
نطلب من المولى اصلاح الذراري *** يـاعـل ربـي يا أبـو نـواف ياجـرك
اليوم أشوف البـاز هـاب الكـداري *** يلبد مع فروخ الدجاجه ولـه كـرك
والنمـر يجفـل من نبيح الجعـاري *** وجـرو الثعل هو الفهد بينهم عرك
تعادلت حصن الـرمـك والشهاري *** أنظر وعاين وش مع أيمنك وأيسرك
أنظر على الشاشه تشوف العواري *** الغـرب وده بالعـماهـيـج يسحـرك
والسيف اللي ثـلمّ شطير الشباري *** تـراه ما غـمد هاك السيف أبشرك
مـا ظنـي السكتون مثـل السواري *** ولالاعب الكوره مثل لاعب السرك

وهذا اللغز للشاعر رجاء بن سويلم بن شداد البجيدي يقول :
وش الـذي ينقـل ومخـفي ويجـري *** يمشي وهو ينقل ومشيه بالأرماش
مـواصـل مـشـيـه نـهـاره ويسـري *** ولا يـشـرب الا دم لـولاه مـا عـاش
يمشي سنين مطوله دون حصري *** واليا وقـف يموت ولا يفيده انعـاش
مـائـة سنـة يعيشها قـلت ما أدري *** واليا وقف من ينقله طاح ما عاش
قال عبدالله بن عبار في حل اللغز :
لغزك ترى حلّه بصدرك وصدري *** وبصدور جميع البشر داخل الجاش
يـرف دايـم تـقـل جـنحـان كـدري *** بالـجـوف دقـاتـه تـقـل دق مهـبـاش
لـك احـتـرامي يالسنـافي وقـدري *** يالـوايـلي يـفـدونـك النـذل والـّلاش
حليت لغزك يا أبـو نـواف بـدري *** حـلـّه تـراه الـقـلـب خـذ ردنـا كـاش