( وفاة الشيخ الأديب صالح بن سعود بن عميره النتيفي )

تلقيت رسالة عبر الجوال تخبّر عن وفاة الرجل الفاضل والصديق القديم صالح بن سعود بن عميرة النتيفي رحمه الله وأسكنه فسيح جنّاته وإنا لله وإنا إليه راجعون ونتقدّم لأبناء الفقيد وأسرة آل عميره بالعزاء والمواساه وهذا الرجل رحمه الله عرفته من خلال بحوثي عن أنساب قبيلة عنزة فقد زرته في منزله في سفح جبل حوطة بني تميم وكان وكيل أمارة الحوطة ثم نقل إلى أمارة الرياض وترقّى في المرتبة الثاني عشر وعيّن مدير البرقيات وكان رحمه الله يفتخر ويعتز بقبيلته الجميلات من عنزة وسبق وأن كرّم الشيخ حمود بن شامان شيخ قبيلة البجايدة التي منها قبيلة الجميلات وذلك في منزله بحي الفواز بالرياض كرامة تليق بمقامه ومن ذكراياته رحمه الله
كنا قد قمنا بزيارة لأسرة آل ماجد الهزازنة أهل النعاثل بمدينة الأحساء بصحبة الشيخ مشاري بن محمد الهزاني وأبنه سعود بن مشاري
ومجموعة من رجال الهزازنة وذلك من الأربعاء 20- 22/ 1417هـ وأقمنا في قصر جبرين أكثر من أسبوع وبعد أن عدنا وجه لي هذه الأبيات:

يا زيـن والله خـوتـك يا ابـن عـبـار *** الا وزيـنهــا مـخـاوى الـهــزازيـن
جينا الحساء يم آل ماجد هل الكـار *** وأنـا خـويا ذربين وضيوف ذربين
ترثت رشيد يجـيـره الله عـن النـار *** كسابت النوماس وأهل النبا الزين
الـلي لهـم بالماضي علـوم وأخبـار *** صاروا بها في راس وايل عرانين
حق الخوي والضيف وكذلك الجـار *** ما فرطـوا به من قديمٍ وذا الحيـن
هـل ديـرة تختـال مـن بيـن الأمـدار *** معـتـزة بعـلـوم أهـلهـا العـزيزيـن
يـوم الديـار تخطف أيميـن وأيسـار *** يأمن بها جيـرانهـا أيسار وأيميـن
والـلي بقـلبه شـك أو عـنـده أنكـار *** ينشـد هـل الخبرة ويقـرأ الدياويـن
يخبرعن اللي في قديم الزمن صار *** مدين حقوق الدار منهم ومن وين
ودي بشرح أمجاد وافيـن الأشبـار *** لكـن تـبي شـرح طـويـل وعناويـن
ولا لـلـتيمـم دور بحضـور الأنهـار *** ويقـضى مـع التجـار دور المقليـن
أرجـو يا أبـو مشعـل ولانـي بأمـار *** تفصيل بيضاً تطـرب الأذن والعين
سجل بديع القاف يا نسـل الأحـرار *** بأبيات شعـرٍ ذات معـنى وموازيـن
أشكر بهـا عـنا هـل الكيـف والكـار *** أهل الحسا وأهل الحريق الميامين
يستاهلون الشكر مع طيـب الأذكـار *** الـلـه يـوفـقـهـم لمـرضـاتـه آميـن

وقد جاريت الشاعر صالح بهذه المنظومة حيث أرخت بها تلك الرّحلة وهي منشورة في كتابي ديوان الوائلي :

مـبـداي بـسـم الـلـه عـلام الأسـرار *** الـواحـد الـلي لـه عـبـاده مـلـبـيـن
رب العباد الـلي عـلى الخلق ستـار *** يـوم البشر توقـف عـرايا وحافيـن
سجلت من فيـض الروابع والأفكار *** ونظمت من بدعي فـنون وتلاحين
هيضني الـلي لفـظ هرجه لـه أثمار *** صالح يشيـد بطيب كـل الهـزازيـن
شاعر فحـل مشهور بالشعـر بيطار *** يبدع جزيل القاف من غير تفطين
ما كـاده المعنى ولا قصـده أعسـار *** بس أختصر كما يقـول ابن حثليـن
شعره نهـر سيله إلـى سـال مـدرار *** لا شـك قـصـده يكتـفي بالنياشيـن
منظـوم صالح مثـل باقات الأزهـار *** أرق وألطـف مـن عبيـر الرياحيـن
قافه كما الأصداف في جوف محار *** من صافي النيروز مسبك وتعديـن
عـاقـل ولا هـو بـالديـاويـن ثـرثـار *** الله وهب له حسن الأخلاق والدين
مع الصخى والطيب بارع بالأشعار *** النادر اللي من شخوص الزقاحين
يا بن عميرة شاقني صحب الأخيار *** من لـذت الدنيا مخاوى الشريفيـن
أدري بها تجلي عن الكبـد الأمـرار *** خوة هل المعروف تسوى ملاييـن
من رافق الأخيـار ما شاف الأكـدار *** والنعـم والله بالـرجـال الحشيميـن
حنـا أعزاز وعـندهـم قـدرنـا أكـبـار *** وهم عندنا يانسل الأجـواد غاليـن
يا الله عساهم من طويلين الأعمـار *** النخبـة الـلي مثـل ما قـلت ذربيـن
أبـو حمـد مقـدامهـم وافـي الأشبـار *** مجناه من عقب الرجال العـريبين
مثل القطامي من صورايـم الأحـرار *** طيرالسعد مرن على الصيد تمرين
فـعـلـه يـنـومس بالهـدد كـل صقـار *** مضراب كفه يقسم الخرب قسمين
مصقر حرار رشيد من ماكـره طـار *** جـميعهـم مـا فيهـم التـبع صافيـن
منهم مشاري طـاب علمـه بالأذكار *** سهل الجناب وطبعه الرفق واللين
حيثه عـلى العـدوان قاسي وجـبـار *** وفيه التواضع للضعوف المساكين
ويوم العرب صاروا بالأموال تجار *** يسعـون ما هـم للمـواجيب فاضين
مـا هـمـه بـدنـيـاه درهــم وديــنـار *** لـو يفـقـد المـلـيـون كـنـه ريـالـيـن
وعن الكرم ما يمنعه غلو الأسعـار *** يرخص حلالـه لـو غـلي بالتثامين
عـوايـد الـشـغـمـوم لـلحـيـل جـزار *** وعن الحشو ما سد ذبح الخرافين
يا مـا ذبـح للضيف مفرود وحـوار *** لـو حـنـت أمـه قـال خـلـك تحـنيـن
حـاشيـك يـالـنـاقـه تعـشـوه خـطـار *** حـني عـلـيـه ولا يبـاتـون مقـويـن
تسمع حنين الخلج من كـل معطـار *** تعول وحاشيها على جفنت الصين
إلـى عـزم مـا يقـنعـه كثـر الأعـذار *** عنـد أبـو حمد كل يـوم امعـزومين
قصـده كـرم ما هو مـنـافـق ومكـار *** وعـن الريا عنده مناعه وتحصين
كريم سبلا ويبـذل الجـهـد باصخـار *** فيه الصخى شفناه بمجـرد العـيـن
عـوايـده وقـت الجـفـا شبـت الـنـار *** الـلي بجـوده يشهـدون المبـاخيـن
الـلـه يفـكـه من صـواديـف الأقـدار *** سرنا معـه لمشاهد الربع مشفيـن
عصـر الربوع لسفرنا صـار تذكـار *** بآخر جماد بمبتدى شهـر تشريـن
من العاصمة سرنا لأهل هجر زوّار *** مع الرفاقـه فـوق بنـز وصواليـن
كـنـه يــقــديــنـا مـع الـــدرب رادار *** نمشي على توجيه والخط سيدين
نـبي هـجـر عـانيـن سجـه ومسيـار *** يـم الرجـال الـلي للأقـراب داعيـن
الماجـد اهـل الطيب والسلم والكـار *** بحي النعاثل شيدوا قصـر جبريـن
شـاده محمـد بالخمـايـل والأشجـار *** بيـن الغصـون اليانعـه والبساتيـن
بنى المضيف وثم أحاطه بالأسـوار *** لأجـل المراجل زيّن القصر تزييـن
أحـفـاد مـاجـد طيبهـم مـابـه أنـكـار *** وقت القصى ما يقفلون الصياوين
حطـوا سلوم جدودهم تاج وأشعـار *** مبطي على فعـل المراجل امعييـن
اكـبـارهـم لـهـم وجـاهـة ومـقـــدار *** واصغارهـم عـقـّال ما هـم شقييـن
قاموا بنا بحشمـة وشيمـة وتعـبـار *** وتـداورونـا النـافـلـيـن الصخيـيـن
الشيـخ ابن موسى دعـانـا للأفطـار *** قبل أرتفاع الشمس مقدار رمحين
والقـويـزانـي مـن بعيـديـن الأذكـار *** من روس لابة باللزوم امعروفيـن
وابن عفـالق بالمـواجـيـب مـا بـار *** وجميعـهـم والنعـم مـاهـم رديـيـن
والشاهـد الله مـا بـهـم قـول معـيـار *** مبطي على فعل المراجل مضرين
ما قصـروا بالحـق صلبين الأشـوار *** الـكـل يـدعـي والمساييـر عجليـن
والمعتجل في وضع الأجـواد يحتـار *** الفرصة اللي جت لنا بس يوميـن
والضيف حين مغادره عـد ما صـار *** ولولا المشاغل كان نبقا أمقيميـن
يـلهـج لساني بـالـثـنـا لكـل الأنـفـار *** اثـني على كـل القرايب والأقصين
ما أقدر أعـد افضالهم حيثهـا أكثـار *** جميعـهـم عـن المـدايـح غـنـيـيـن
وأخـص نسل الوايلي سـر وأجهـار *** من مارثـت عـنـاز مـا هـم خفييـن
نسل الرجال اللي على الكود صبـار *** وقـت اللـوازم ينطحون المغيريـن
هـزازنـة يـوم الحـرايـب والأشـرار *** كانوا على من دور الشر شرسين
يوم المغازي من نطح جمعهـم نـار *** لديارهـم مـن كـل الأضداد حاميـن
يـوم المغـازي فـوق زينات الأكوار *** بالكون ضد اللي على الدارغازين
هـزان من دور الصحابة والأنصار *** عـلى بريـك وبرك كانـوا سلاطيـن
تشهد لهم بالطيب سكـان الأمصـار *** تشهـد تميـم ويشهدون القحاطيـن
يشهـد سليمـان العـفـالـق بالأخبـار *** وعبيد يذكر فعلهم من هاك الحيـن
حـامـيـن واديـهـم بـصـارم وبـتــار *** عدوانهم شـدوا عـن الـدار مقفيـن
الـلابـه الـلي عـلمهـم عـم الأقـطـار *** أهـل نـعـام بـدار الأجـداد مبـطـيـن
لـهـم بـواديـهـم مـغـاريـس وأبـيـار *** حطوا فلايح غرسهم بين ضلعيـن
اللابـة الـلي جمعهـم مـلـي الأنظـار *** من صلب وايل بالمناسب عريبين
من لا بنى جداره على ساس ينهار *** صم الصخر ما يشبه لرمل يبريـن
عسى يعـل ديـارهـم وبـل الأمطـار *** مـنـازل الـلـي يلحـقـون المخـلـيـن
منـازل الشجعـان بالمـوقـف الـحـار *** هزازنة دايـم على الخصم صلفين
يا ما بـهـم من كـل فـارس ومغـوار *** فوق الأصايل يودع الخيل خيليـن
تلقـا مضايفهـم بهـا ابهـار وأكـتـار *** ويرجعون الصاع للخصم صاعين
وصلوا على الـلي للمخاليق مختـار *** قـلتـه وتـم القـاف يالقـرم سبعيـن

يتبع

تابع

( وقد نشرت في كتابي قطوف الأزهار بعض قصائد الفقيد رحمه الله وهو صاحب شبّه وعلوم رجال وهذ ما نشرت من شعره بهذه الصيغه )

* الشاعر صالح بن سعود بن محمد بن سعد بن عميرة بن عبدالله بن سعد من عائلة الزقاحين من العرفج من النتيفات من الجميلات من البجايدة من السلقا من العمارات من عنزة ولد في أسفل الباطن بمنطقة حوطة بني تميم سنة 1374هـ ونشأ وتربى في باديتها حتى بلغ سن السادسة عشرة من عمره ثم التحق بالدراسة وتخرج من مدرسة التوفيق عام 1386هـ وواصل دراسته بالمعهد العلمي في حوطة بني تميم حتى حصل على الشهادة الثانوية عام 1392هـ ثم واصل دراسته الجامعية فحصل على شهادة لسانس في الشريعة من جامعة الإمام محمد بن سعود الإسلامية عام 1398هـ ويعمل حالياً موضف في الأمارة بالمرتبة العاشرة وهو من أحفاد فيصل الجميلي وله شعر جزل وقد نشرنا له عدد من القصائد في كتابنا لقطات شعبية وحيث قد جمعنا ما أخترنا من قصائد في هذه الطبعة ومع أختصار شعر المعاصرين على أضيق نطاق بحيث أن تركيزنا على جمع التراث القديم ومن قصائد الشاعر صالح بن عميره قصيدة القاها في أحد الأحتفالات منها قوله :
الضيف له فزعه وتكريم واصحون *** والمعتـدي لـه نـار شـر ومجـاعـه
وخـتـام قـول الـوائـلي لا تـراخــون *** كلـن يقـوم بـواجبـه فـي قـطـاعـه
ومن شعر صالح بن عميرة في القهوة وشبت النار هذه القصيدة :
لا والـلـه الا نـاسـبـت شـبـت الـنـار *** الـبـرد قـام يـحـوفـهـا مـن شمالي
عنـدي لهـا في العايرة كن وأوجـار *** قـربـت بـه عـيـدان سمـرٍ اجـلالي
في مجلس متشطرٍ في ذرى اجـدار *** يلـقـا عـلى يمنـا المسيـّر امـوالـي
يا زين شب النار بـه بعض الأمرار *** متـحـري مسيـار بعـض الـرجـالي
أحـدٍ بـعـيـد الـدار وأحـدٍ لـنـا جـــار *** وذا من بـني عمي وذا من خوالي
وانقضي المجلس سواليف وأخبـار *** مع ما هـوى ببطون صفر الدلالي
ومـربــع بــيـن الـمـنــاعــيــر دوّار *** فـيـه أزرق يلطـم بـلـون الشعـالي
وعقبـه على الميسور قـدرٍ ومقـدار *** وانحـاول العـليـا عـلى كـل حـالي
حـقٍ عـلـي مـانـيـب بـالـحـق بـّـوار *** وأن بـرت به لا حل جوفي حلالي
وإلـى حصـل مجلس ونـارٍ وخـطـار *** أصبح وأنـا بالي مـن الهـم خـالي
أحــب ذا وأحــب غــمــرٍ كــذا سـار *** ولا نيب أنـا اللي بس احبه لحالي
كـلـن يحب الخيـر وأفـعـال الأخـيـار *** الا الردي لا غلي ولا هوب غالي
وقال الشاعر صالح بن عميره النتيفي هذه القصيدة يتوجد على طلعات البر ويسند على أبن عمه سعد بن زيد بن عميرة فيقول :
يا أبـو فهـد هبهب هبـوب البـرادي *** وسهيـل قمنـا مـن جنـوب نشوفـه
مـلـيـت أنـا مـن مـقـعــدٍ بـالـبـلادي *** قـلبي هبوب سهيل قـامت تـلـوفـه
لـي داعي صـوب البـراري يـنـادي *** قال الشجـر قامت تزارق اطروفـه
والغـار ذا الأيـام حـسـب الـمـرادي *** زال الظلام لسهلتـه عـن اقضوفـه
محلكـم مـن العـام يا أهـل العـوادي *** لا تـتـركـونـه دارسـات اعـطـوفـه
مـشـبـكـم طـول عـلـيـه الـرمـــادي *** وبرميلكـم طالت عـليـه الحـفـوفـه
شمت هـوى عقب الذرى والقعادي *** يـا زيـنـهـا مـكشوفـة وامحـفـوفـه
مـا مـن قصور الا الطويل العيـادي *** راعي تبوك اللي رمت به اظروفه
وده بــنـا وأنــا بــه أكـثــر اودادي *** لكن ظرف الشخص يخلف شفوفه
وقال صالح بن عميرة هذه القصيدة بمناسبة أجازة الربيع عام 1406هـ يسند على محمد نقتبس منها قوله :
يـا مـحـمـد رح لعـبـدالـلـه وقـل لـه *** لا يـخـلـيــنـا تـرانــا فـي الـبـلادي
قـاعـديــن والـتـّـبــرد زان حــلــــه *** والـلـه أنـا مـا رضيـنـا بـالقـعـادي
نـاخـذ الـلي حـط لـه فـي الـبـر ثـلـه *** كل صبح فوق راس الحـزم بـادي
مـا تعـلـق بالحـضـارة فـي الـمملـه *** ضاهـرٍ يـم الـنـفـاه وفـي الـبـرادي
فـي مـحـلـه مـن يـحـلـه مـا يـمـلـه *** بين روض وبين ضلع وبين وادي
عـقـب مـا عـلمـت كـني فـوق ملـه *** زاد بـي همـي وأنـا قـلبي حشـادي
أتـمـنـى دوجـةٍ فـي الـصـوط كـلــه *** وأتـمنى قـصرت الـربـع الـعـوادي
أشـتحـن لـلــبـر جـعـل الـلـه يـعـلـه *** وعن طلوعه كن في رجلي قيادي
الـمـدرس يـغـتـنـمـهـا فـرصـةٍ لــه *** ايتمشى فـي البلاد وفـي الـبـوادي
والمـوظف مثـل خبـرك فـي محـلـه *** وأن تعـدى مـا عـدا مفـلا البـلادي
وقال صالح بن عميرة النتيفي هذه القصيدة في موطنه حوطة بني تميم :
يـا لايـمي فـي حـب مخبيت طويـق *** خـل الـكـلام شـوي مـالـك امجيـبي
علام أصد من السعه واتبع الضيق *** وش لون ما احب المرب الحبيـبي
مالي غنا عن طلعتي لأسفل الشيق *** واقعادي العصر بـزبـار الحضيبي
أرعى الخشوم النايـفـات المدانيـق *** ومرتـقـب الباطـن عـليـهـا رقـيـبي
أشـوف فـيـهـا للـنشـامـا طـواريـق *** بـايـام فيهـا الـرزق حـظ ونصيـبي
أحـد اجمـال حمـول واحـدٍ تفـافيـق *** جـنـب الحـلال اتـجـنبـه كـل ذيـبـي
أفعـالـهـم راحـت حـلـوم وتعـالـيـق *** وادروبهـم مـا كـن جـاهـا عـريـبي
والـلـه مـا يـنساح بـالي ولا الـيـق *** ولا يطيـر عمـاس راسي واطـيـبي
الا عـقـب خـوت عـيـال مـطـالـيـق *** وامـنـزهـيـن مـا بـهـم كـل عـيـبـي
الـلي يـبـادلـني بـحـلـوا المنـاطيـق *** واللي يقول أومر وأنا بس اجيـبي
وأضهـر لهـم مـعنـا دلال وأباريـق *** وامـربـط لـه فـي ربـاطـه طـريـبـي
نـاخـذ لـنـا في البر سجه وترويـق *** مـع اتـخـاذ حسـاب حـق الحسيـبي
مـزح بـري مـا فيـه دق وتصفيـق *** واعـلـوم أحـلا مـن مـجـد الحـليـبي
مـع طبخـة بنـه يقـّطـر لـه الـريـق *** فـوق الكثيب أو في مجـر الشعيبي
وأهل العشا فرقين من غير تفريق *** كلـن لـنـا مـن زيـن شغـلـه يجيـبي
نضهـر مشافيـق ونرحـل مشافيـق *** ومـن دوّر الـدنـيـا بـهـمـه مـريـبي

رحم الله الفقيد وأسكنه فسيح جنّاته والبقاء في أبناءه وعشيرته

نسأل الله له الرحمه والمغفره ،،،

لاهنت يابومشعل ونشكرك على ايراد نبذة من سيرة المرحوم باذن الله صالح بن عميرة النتيفي

رحمه الله وجميع موتى المسلمين

الله يرحمه وأموات المسلمين ويغفر له ويجعل اَخرته الجنه وإنا لله وإن اليه راجعون