هاتفني عدد من الأخوه يذكر أن قصيدتي الآتي بيانها قد كتبت ونسبت لأحد الشعراء كما نسبها البعض لبركات الشريف وهذه القصيدة من أهم قصائدي وقد أنشد جزء منها في أشرطة إسلاميه بأصوات منشدين كما أنها قد سجلت بأشرطة بصوتي وقد القيتها في أحد القنوات في مجلس العقيلات وسجلت من قبل بعض المهتمين بالمواعظ والحكم ونسخت في ديواني وهي تحتوي على عدد من المقاصد وهذه القصيدة :

هذه القصيدة تبلغ مائة وخمسة أبيات من شعر عبدالله بن دهيمش بن عبـار العنزي

( مقطع الدعاء والتضرّع )

مبداي باللي بقدرته تجري الأفـلاك *** عـازل نـهـاره عـن ديـاجيـر ليـلـه
يالله يا مضفي عـلى الخلق حسنـاك *** يا منـزل الـلي يدهـج القـاع سيـلـه
يا مرسل الهوج العواصف ابشراك *** غـيث تغيـث ابـه العجـاف الهزيلـه
يا حامي البيت العـتيق مـن الأدراك *** يا مهـلـك الطـاغي وجيشه وفيـلـه
يا سامع الـلي في دجـا الـيـل نـاداك *** يـدعـوك بأسمـاك العـظـام الجليلـه
يالـواحد الـلي لـك سجدنا وعبدنـاك *** أنـت البصير الـلي امرنا ينتهي لـه
يـالـوالـي الـلي كـل مـخـلـوق لـبّـاك *** تـوحي صـدى تكبيـرهـم واتهليلـه
يالـخالـق الـلي كـل خـلـقـك تـرجّـاك *** تـطلـب حنـانـك يـا مزبـّن دخـيـلـه
يا فـارج الشـدات بالضيـق نـنصـاك *** عـليـك تخـفيـف الحمـول الثـقيـلـة
يـا غـافـر الـزلات لطـفـك ورحـمـاك *** مـن لا رحمتـه خـاب واعـزتي لـه
يا مجيب دعوة من تضرع وناجـاك *** لا رب غـيـرك يالـولي نـلـتجـي لـه
يـامـن تجيـر الملتجي لـذت بحمـاك *** بـك استجيـر مـن الأمـور المهيـلـه
يا رب ما نملك عـلى الحـول لـولاك *** أنـت للطيف بـحـال مـن بـاد حيـلـه
الطـف بحـالي يـا ملـك كـل الأمـلاك *** يـا مشفي اسـقـام الجسام العـليـلـه
اتوب لك يا خالقي واطلـب أرضـاك *** وأعـوذ بـك يـا رب مـن كـل غـيلـه
تغـفـر لمن يرجي ثوابـك ويخشـاك *** حـمـل الـذنـوب بكـاهـلـه ما قـويلـه

( مقطع في الوعظ )

يالعـبـد لا تـشكي مصابـك وبـلـواك *** الا لـمـن كـرب الـشــدايــد يـزيــلـه
أوجدك ربك سامك العرش وانشاك *** من الطين اللي كل البشر تنتمي له
هو الحفيظ الـلي يصونك ويـرعـاك *** وقت الحرج منه الفرج تحتري لـه
ربك على الطاعه بالأحسان يجـزاك *** يـنجـيــك مـن نـارٍ تـوقــد شعـيـلـه
اطـلب عظيم الشان يغـفـر خطايـاك *** فـي يـوم مـا يـنـفـع خـلـيـلٍ خليـلـه
تب للولي واعـدل مسيرك وممشاك *** من سار في درب الهدا يهتدي لـه
اتبع هدى من وضح الدين واهـداك *** لا تقـتـدي بـأهـل العـقـول الضليلـه
اغـنم شبابك بأول العـمـر واصبـاك *** قـبـل خـضـار العـود يذبـل قصيـلـه
وأن طال عمرك داير الوقت سـّواك *** مـثــل الـقـرنـبـع لا تـقـدم مـديـلــه
ولا تأمن الدنيا تـرى الموت يقفـاك *** العـمـر يـفـنـا بـيـن ساعـه وليـلـه
تـسيـر بـك غـبـر السنيـن لمنـايـاك *** ومـن طـوّل المـنـزل لـزوم رحيـلـه
لابــد مــن يــوم عــذاراك تـنـعـــاك *** ولا بـد مـا تـردم عـلـيـك الـنـثـيـلـه
وآخـر مصيـرك يحملـونـك لمثـواك *** مهما تعـيش مـن السنين الطـويلـه

( مقطع أختيار الصحبه )

ابي انصح اللي عندهم فهم وادراك *** ومـن تـاه بصـره مـا يفيـد الدليـلـه
عـن رفقـت الهلباج والنذل حـذراك *** مـن صاحب الخايـب يحـطه زميلـه
قريـن سؤ إبليس مغـويـه وأغـواك *** عـمـيـل شـر ولا يــربّـح عــمـيـلــه
خاو النزيه اللي على الطيب خاواك *** ولا تخاوي الفـاسد علـومه رزيلـه
تـرى حليـف السؤ لـو كـان صافـاك *** لا بـد يـنكـر بـك خبـيـث الـدغـيـلـه
يـزرع عـلى دربـك منابيل الأشـواك *** والشوك ما تجني الثمر من شتيله
الشـوك مـا كـنـّك ظـلالـه ولا اذراك *** ولا تـاجـد الـلي يستـكـن ابمـقـيـلـه
وراعـي النقيلي لا تعـزه الـيـا جـاك *** ما هـو صديق الـلي يجيب النقيلـه
غثـك بنقـل الهـرج كوبان واغـثـاك *** أقـشر ضميمـه ضـمهـا فـي شليلـه
دهـوى رفـيـقـك بالنميمـه ودهـواك *** بـيـنـك وبـيـنه شب نـار الـفـتـيـلـه
والحاسد المنكـود عـده مـن اعـداك *** الـيـا شافـك بنعـمة تـزاود غـليـلـه
ضميـره أسـود والحسد داي فـتـّاك *** حـقـده بمكـنـون الضمـايـر يشيـلـه
مدحك يغـيضه كـل ما جيـب طرياك *** وعـليـك يـفـرح بالخـزا والخـذيـلـه
حيثـه يـغـار ولا يـسـوي سـوايــاك *** اليا طاب علمك بالعرب مارضي له
وقـريـبـك الـلي مـا يـثمـن احـميـاك *** ويضـد مـن ضدك اليا شاف عـيلـه
الـلي اليـا جـاء لازمـه جـاك ينخـاك *** والـيـا بـدأ لا زمـك مـا يـنعـني لــه
تـرى الـردي عـنـد الملازيـم ينفـاك *** لو هـو ولـد عـمك من أدنا فصيلـه
مـن لا يــودّك لـو تـبـسّـم وحـيـــاك *** يضحك وفي جوفـه سوات المليلـه
لـو بش بك ما يريد شوفك وحليـاك *** يـكـره قـبـالـك لا تـكـرر هـضـيـلــه
كانـه قـطع حبـل المواصل وجافـاك *** اقطع احبـالـه واخصره لا تجي لـه
ابعـد عـن اللي ما يبي غيـر فرقـاك *** والـلي صـفــالـك لا تـّدور بـديــلــه
صديقك اللي بحزت الضيق واسـاك *** قريب لك لو هو من اقصى القبيلـه
أركن على الطيّب اسنادك ومركـاك *** يـوقف معـك لا صار بالوقـت ميلـه
الـحـر كـانـه هـد بـالـصـيـد عـشّـاك *** ولا الـحـمـامـه مـا يسـرك هـديـلـه
ولا تـنخـدع بالـلي تملـق وضاهـاك *** يخـدعـك بسلـوب الدجـل والختيلـه
تـراه يـنصب لـك محـابيـل واشـراك *** يدرق لغـرت صاحـبـه وايحبي لـه
لا تجامله حيثه عـلى مقصد اغـلاك *** محـتـال يـلعـب بالقـلـوب الهبـيـلـه
تـراك مهما جـدت لـه خاب مسعـاك *** مجهـودك الـلي تـبـذلـه مـا دريـلـه
كـان اغـتنـا يجحـد جميلـك وينساك *** ومن يصنع المعروف ينكر جميلـه
اليـوم الـلي بالكـذب للسالـفـه حـاك *** وسط المجالس هرجته ينصغي لـه
ذرب اللسان الـلي لعـذب الـلغـا لاك *** تـوحي بـلمـات المحـافـل صهـيـلـه
غـرك كـلام منمّـق الهـرج واغـراك *** يجـمخ وزومـه مـا تشيلـه تـريـلـه
يـزوم كـنـه مـن سـلاطـيـن الأتـراك *** ولا زبـون الحـرد حـامـي الدبـيـلـه
واليـا بخنته ما سوى قطـف تـنبـاك *** فـعـايـل المـثـبـور عــنـد الحـلـيـلـه

( مقطع النصيحة في عزّة النفس )

يا مستمع قولي عسى الـرب ياقـاك *** خذ من صمال الهرج صافي ذبيلـه
أسمع كلام اللي عـلى الخير وصاك *** قـولـه يحـثـك للشرف والفـضـيـلـه
يـرشـدك لـدروب المكـارم ويـنهـاك *** عـن الـدنس والـعـايـزة والـرذيـلـه
يالـلي حطـام المـال عـذبك واشقـاك *** تركض وراه وكل صوب اتعدي له
دايـم عـلى البـلغـة تـراقـل مطـايـاك *** تسـري وتجـري مـا يـوني ذميـلـه
تسعـا تبي تملأ من السحت مخبـاك *** ومن هان نفسه ما يحوش النفيلـه
المرزق اللي مصدره سحت مغـناك *** مثـل السراب الـلي بعـينك تخـيـلـه
وش الـذي يـا نسـل الأجـواد خـّلاك *** تجهـد عـلى غـربـال مكـرم نـزيلـه
يدفعك خطوالأجودي خوف من فاك *** ويغريك تبحث بالعـرب عـن مثيلـه
ارفع عن الهـزلات قصدك ومعـناك *** لا خـيـر فـي رجـلٍ تسّـول ابـقـيـلـه
لا تجعـل الحـيـلات منهـج ومسـلاك *** مقسوم رزقـك مـا تحوشه بحـيـلـه
احفظ شرفك وعزتك واقصراخطاك *** عـن العـلـوم الـلي تعـقـب خجـيـلـه
وكانه نضب قطر الندى من محيّاك *** مـن لا حفـظ كرامتـه وش بـقي لـه
أوصيك لا تـدعس كـرامتـك بحـذاك *** بـيع الشرف لأجل التكسب فشيـلـه
عـليـك بالعــفـه عسى المـال يفـداك *** لا تجعـل اسلوب الحرا لـك وسيلـه
لا تجلب الشيمه ترى الناس تشناك *** خـل العـواري مـا تـفـيـد الـنحـيـلـه
حـافـظ عـلى منهـاج جـدك ومبـداك *** ياللي مـن شخوص الحمايل سليله
أن خاب فعلـك زال مجدك وعـليـاك *** لو انت نسل اهل السيوف الصقيله
ما كل ملبس ياابيض الوجه يزهاك *** الـحـر ثـوب العـار مـا يستـوي لـه
الحيـف مـا يـرهـم لمثلـك وشـرواك *** أرفـع مـقـامـك للـهـداف الـنـبـيـلـه
يمنعـك عـن ذل الحرا طيب مجنـاك *** وترفعـك عـادات الجـدود الأصيـلـه
لا يـنحـني راسـك بتـدنـيـق عـلبـاك *** غـيـر الـولي مـولاك لا تـنحـني لـه
أكبح جماح النفس لا تخـلف اريـاك *** لـوكـان ما تمـلـك مـن المـد كـيـلـه
أقـنع وعـز النفس لـو عـن دنـايـاك *** والـرزق خـلاق الخـلائـق كـفـيـلـه
لا تـحـتـمـل مـعـروف هــذا ولا ذاك *** لـو قــل مـالـك والـمـوارد قـلـيــلـه
من قال هات لكـل مـن قـال له هـاك *** يـصبـر عـلى المنـة ونفسه ذلـيلـه
وأن التزمـت وجايـر الوقـت وازاك *** وجرت عـليك من السحايل سحيلـه
أصبـر ولـو جـار الـزمـان وتحـداك *** مـا يـقـنـط الـمسـلـم وربـه وكـيـلـه

( مقطع الأتكال على الله والأغتناء عن البشر )

اعنـزعلى اللي بالبحرقات الأسماك *** والطير قاتـه مـن خشاش الخميلـه
لا تشتحن والـرزق بـيـديـن مـولاك *** رزقـك عـلى مغيث البـلاد المحيلـة
الـرازق الـوهـاب مـن مده اعـطـاك *** رب الملأ معـطي العـطايا الجـزيلـه
مـا هـو لبـابـه دون ناصيـه صكـاك *** فضلـه عـمـيـم ولا يـديـنـه بـخيـلـه
أرفـع لربـك سامك العـرش شكواك *** مـا ينفـع المخـلـوق لـو تشتكي لـه
رب الـعـبـاد لـعـقـد الأبـلاش فـكـّاك *** مـاهـي عـليـه المعـضله مستحيلـه
ما دام ربـك سامك العـرش عـافـاك *** اسلك طريـق الرزق واسع بسبيلـه
وأن كـان مـا تقتـات من كـد يمنـاك *** النـاس مـالـك مـن وراهـم حصيلـه
مـا يشبع الجـايع لحاويس واحكـاك *** ولا يـروي الظـامي حثـال الثميـلـه
الـرس نـبـعـه مـا يــورد ظـمــايـاك *** مـن يـارده مـا اظـن يـمـلأ صميلـه
والحسو مهما جم بالقيـظ ما ارواك *** يـغــور جــمـه لا يـغــرك نـضـيـلـه
أوصيـك لا تـغـتـر بـسحـوت دنـيـاك *** قـارون زال وزال مـلـكـه وجـيـلـه
واختام ما سجـلت بسطور الأبـواك *** صلوا عـدد قطـر المـزون المخيلـه
على الرسول اعداد ما طاف نسّاك *** وعـد الـرمال الـلي الـذواري تهيلـه

وسوف يليها قصيدة بركات الشريف للمقارنه

وهذه قصيدة بركات الشريف للمقارنه :

يا الـلـهْ يَا الـلي كُـل الأُمّـاتْ تَرْجيكْ *** يـَا واحِـدْ مَـا خــّابْ حـيٍّ تَـرَجَّــــاكْ
يّا رُبَّ عَـبْـد مَـا مَشَى فـي مَعَـاصيكْ *** وَلا يَمْشَى إلاّ فـي مَحَبَّتـْكْ وِارْضاكْ
يا مـرقـب بـالـصبـح نـطـيـت راقـيـك *** مـا واحـد قـبـلـي خـبـرتـه تــعــلاك
يـاذا الـزمـن وليت مـا أكـثـر بلاويك *** الـلـه يـزودنــا السـلامـه مـن اتـلاك
ياللى عـلى العـربان عمت شكاويـك *** ولـيـت يـا دهـرالشقـا ول مـااقـواك
والـيـوم هـالكـانـون غـاد شـبـابـيـك *** تـلعـب بـه الأريـاح مـن كـل شـبـاك
يا مالـك اسمع جابتى يـوم أوصيـك *** واعـرف ترى يابوك بآمرك وانهاك
وصـيــة مـن والــد طــامــع فــيــك *** تسبق عـلى الساقـه لسانـه لعـليـاك
أوصيك بالتقوى عسى الـلـه يهديك *** لـهــا وتـدركـهـا بـتـوفـيـق مــولاك
الـلـه بـحـق أجـدادك الـغـر يعـطيـك *** مـرضـاتـه مـع مـا تـمـنـى من منـاك
احفظ دبشك اللى عن الناس مغنيك *** الـلى إليـا بـأن الخـلـل فـيـك يـرفـاك
واعـرف تـرى مكـه ولاهـا بناخيـك *** لـو تشحـذه خـمسة ملاليـم معـطـاك
اجـعـل دروب المرجـلـة من معانيك *** واحـذر تميـل عـن درجهـا بمـرقاك
لا تـنسدح عـنـهـا وتبغـينى أعطيـك *** جـميـع مـا يكـفيـك مـا حـاصـل ذاك
أدب ولـدك إن كـان تبغـيـه يـشفـيـك *** لـو زعـلـت أمـه لا تـخـلـيـه يــالاك
امـا سمج واستسمجك عـنـد شانيك *** ويـفـر مـن فعـلـه صديقك وشرواك
وإلا بـعـد جهلـه تـرى هـو بـيـاذيـك *** وأن ماربـيتـه ماتجي فـيـه رجـواك
ويـامـالـك ارفـق بالخـدم والمماليـك *** يرفق بك الـلـه يوم ترفـق بضعفاك
واحـذر تضيع كل من هو ذخـر فيك *** معـروفـه لاتـنساه وأوفـه بـعـرفـاك
تـرى الصنايع بين الأجواد تشريك *** الـيـا طـمـعـت بـغـرسـهـا لا تـعــداك
واحـذر سـرور بغـبـة البحـر يرميك *** ولاهـو مـفكّـر فـي تشكيك وأبـكـاك
واوف الـرجـال احـقوقها قبـل تاتيك *** لا تـوفيهـم بالقـول فالحـق يـقـفـاك
وهـرج النميمـة والقـفا لا يجى فيك *** وإيـاك عـرض الغافـل إيـاى وإيـاك
تـبـدى حـديـث لـلـمـلا فـيـه تشكيـك *** وتهيم عنـد الناس بالكذب واشراك
واليـا نـويـت احـذر تعـلـم بـطـاريـك *** كم واحد تبغى بـه العـرف وأغواك
واحـذر شماتت صاحب لك مصافيك *** واليا جـرى لـك جـارى قـال لـولاك
ولا تحسب أن الـلـه قطـوع يخـليـك *** ولاتفرح أن الـلـه على الخلق بداك
والضيف قـّدم واجـبـه حيـن يلفـيـك *** مـما تطـولـه يا فـتى الجـود يـمنـاك
أكـرم اقـبـالـه فـإنها مـن شواريـك ***وابـذل لـه الـمـجـهـود مـادام يـعـنـاك
احـذر تلـقى الضيف مقرن عـلابيك *** خــلـه مـحـب لـك صـديـق إذا جــاك
وأوصيك زلات الصديق إن عثافيك *** مـازال يغـطاهـا الشعـر فاحتمل ذاك
راعـه ولـو مـا شفت انـه يـراعيـك *** عـساك تخـلـف نـيـتـه عـن مـعـاداك
واحـذر عدوك لو ظهر بى يصافيك *** خـلـك نبـيـه وراقـبـه ويـن مـا جـاك
لاتأمـنـه واطـلـب مـن الـلـه ينجيـك *** ويـكــفـيــك ربـك شــر ذولا وذولاك
شفنى أنـا يـا أبـوك بآمرك وانهيـك *** عـن التعـرض بـيـن الاثنين حـذراك
إوذا حضـرت أطـلابـه مـع شرابـيك *** اسـع لهـم بالصلح والـّلاش يـفـداك
ابـذل لـهـم بـالـطـيـب ربـك يـنجـيـك *** ولا تجـضع الميـزان مـع ذا ولاذاك
أمـا الشهادة فـأدهـا إن دعـوا فـيـك *** بـيـن عـمـود الديـن لاعميت أريـاك
بـالـك تـمـاشـى واحـد لـك يــرديــك *** طـالـع بـنى جـنسك وفـكـر بممشاك
رابـع أصيـل فـى زمـانـك يـشـاكيـك *** لا شاف خملاتك عن النـاس غـطاك
وأحـذرك عـن طـرد المقفى حذاريك *** عـليك بالمقبــل وتـرك إلـلى تعـداك
ثـم الـعـن الـشيـطـان لـيـاَّه يـغـويـك *** تـرى إن تـبـعـتـه للشـرابـيـك وداك
وأوصيـك لاتـشكى عـليـنـا بـلاويـك *** أنـت السبب طـرفـك عيونك بيمناك
واعرف ترى ماواطي الفعر واطيك *** ولا أنـت أعـز من الجماعة هذولاك
المسك يا راسى عـن الـذل واخطيك *** واحـذر تـكـلـم يـا لـسـانـى حـذاراك
والطف بجارك وقـم من دون عانيك *** وافطن لما يعنيك عن ربعة أخـواك
يا ذيـب وإن جتـك الغـنم فى مفـاليك *** فاكـمـن الـيـن إن الـرعـايـا تـعـداك
في ما مضّى يا ذيب تفـرس بأياديك *** واليوم جاء ذيب عن الفرس عداك
يا ذيـب عاهدنى وأعـاهدك مـرميـك *** ما ارميك أنا يا ذيب لو زان مرماك
والنفس خـالـف رأيهـا قبـل تـرميك *** تـرى لهـا الشيطان يرمى بالإهـلاك
ومن بعـد ذا لا تصحب النـذل يعديك *** عـن صبحة الأنذال حاشاك حاشاك
تـرى العشير النـذل يخـلف طواريك *** وأنـا أرجى أنـك مـا تجى دون أباك
والهقـوة إنـك مـا تـجى دون أهاليك *** ولا أظـن عـود الـورد يثمـر بتبناك
والحـر مثلك يستحي يصحب الديـك *** وأن صاحبه عاعا معاعات الأدياك
لا تستمع قـول الطـرف يـوم يلـقيـك *** بالكذب يقضى حاجته كـل مـا جـاك
مـن نـم لـك نـم بـك ولا فيـه تشكيك *** وأيــلاه قــد أزرا رفـيــقــك وأزراك
عـنـدك حكـا فينا وعندي حكى فـيك *** وأصبحت كارهـنا وحـنـا كـرهـنـاك
ما اخطاك ما صابك ولو كان راميك *** وإلـلّي يصيبك لو تتقيت مـا أخطاك
ميـر استمع منى عسى الـلـه يهديك *** النصح يـا مـالـك لـك الـلـه لمـولاك
عـنـدى مـظـنـة مـا تـمثـلـتـهـا فـيـك *** واطلب لك التوفيق من عند مولاك