الغاز جديدة في قصائد من شعر عبدالله بن دهيمش بن عبار :

بما أني مكثر من نظم الشعر حتى بلغت قصائدي من خلال مشواري الطويل أكثر من الفين
قصيدة ألا أنني مقل في الألغاز ألا إذا وجهت لي الغاز فأني أحاول أحلها وأرسل لصاحب
الألغاز الغاز وقد اضفت في قروب الويلان الذي يديره الأستاذ المحامي مهدي بن حنيان
الفدعاني ويضم نخبة من رجال عنزة الأوفياء فقد ساهمت في ذلك القروب بعدة الغاز
نظمتها شعراً ويسرني أن انشرها في هذا الموقع .

1- اللّغز الأول :
أنشـدك عـن ثـلاث يجمعـهـم البيـت *** يامـن لـك بـحـل اللّغـوز استـطاعـه
لا هــم بـنـي آدم ولاهــم عـفـاريــت *** ولا بـيـنهـم نـسبـه ولاهـم جـماعـه
أولـهـم الـلـي لـهـا بالـلـّيـل تـوقـيـت *** تاقف حرس لوهي شرود ورعاعه
حذره وتوصف بالذكا كل ما اطـريت *** مـا تـلحّـق والـبـر تـطـوي ريـاعـه
والثـاني الـلي من سطابه وقـع ميـت *** يظهر صوابه دون كشف وأشاعه
تخـشـاه كـانـك بالصحـاري تـمشيـت *** باتـع جسور وفيـه نشط وشجاعه
والثـالـث الـلي بالـدلالـه لهـم صـيـت *** يطوون مئية ميل في ظرف ساعه
أصواتهم تفـرح بهـا لـو لهـا أوحيت *** تـهـوز بسلاحـك تـدور الطـمّـاعـه
2- الغز الثاني :
أنشدك عن عـذرا عـلى الـدوم حـيـه *** آمنـت بـالـلـه زولـهـا تـقـل عـاجـه
تــدوم حــيــه لـــو تــزور الـمـنـيــه *** مـوت الـرجـل منهـا ومنها علاجـه
نـوب تحضـر وأحـيـان تبقى مخبيـه *** وللناس فيها بحـزة الضيق حـاجـه
ولـهـا أخـت صـارت للمخاليق سيّـه *** الـرجل يخشاها وتخشى الـدجاجـه
3- الغـز الثالث :
الـرجـل الـلي عـن الوظيفـه تـقـاعـد *** مـاهـو كـبـر لـكـن تـغـيّـر زمـانـــه
من عقب ما نجمه مع الناس صاعد *** الـيـوم بـار وقـل بـالـنـاس شـانـــه
والـبنـت الـلي دايـم تصيح وتـراعـد *** الـيـوم صـارت بـالـوظيفـه مـكـانـه
لاشـك هــو وصـويـحـبـاتـه تـواعــد *** الـكـل مـنهـم صـار يـاقـف بـخـانـه
يوضع لـهـن عـنـد الحمايـل قـواعـد *** ورجـالـهـن مـعـهـن مـدلّـع لسـانـه
4- هذه اللغز الرابع وهو يتألف من ستة الغاز :
وش هـو الـلي ملفظه بأربع حـروف *** وأن حـكـوا باسمـه يشبّـه للبخيـل
وش هـو الـلي بالقـوايـل لـه تشوف *** وأن قـربـت لحروتـه صابـه جفيـل
واعرف اللي صاحبه لو هو عطوف *** يضرب الصاحب ولا يحفظ الجميل
وش هـو الـلي كـل مـا شفته يطـوف *** صـاحي ولا هـو سفيـه ولا هـبيـل
وش هـو الـلي مـا تـدانـيـه الـرفـوف *** لـه ثلاث عـيال في راس الطويـل
وش الـلي مـع صاحبه دايـم يـطـوف *** صاحب ولا هـو صديق ولا خليـل
5- اللّغز الخامس :
عـندي عن السبعه نصيحه وتحذيـر *** منهم خطوره واجـب الحـذر منهـم
يـهـابـهـم عـنـتـر ويخـشاهـم الـزيـر *** واشجـع شجاع بقـوتـه مـا مهنهـم
لكن تـرى السبعه بعضهم بهـم خيـر *** والقسم الآخـر يفتخـر من طعـنهـم
القـصـد يـالـويـلان يـحـتـاج تـفسيـر *** أبـي الخبـر والعلـم يالـربـع عـنهـم
هـيـا عطـوني حـل مـن دون تـأخيـر *** لهم اسم واحـد بالوصايف قـرنهـم
6- اللّغز السادس :
وش الأمـوات الـلي بوسط المحافير *** شـاهـدهـم الـلي بالمـقـابـر دفـنهـم
وهـبهـم الـرحمن مـيـزه عـن الغـيـر *** حـييـن لـوهـم مـدرجـيـن بكـفـنهـم
7- اللّغز السابع :
وش الـذي ترقص من أجله جماهير *** عـنـده بعـال الصوت جـروا لحنهم
شانـه عظيـم وفـيـه ربـح ومخاسيـر *** بـه نـاس يسعدهم ونـاسٍ يغـبنهـم
8- اللّغز الثامن :
وأنشد عـن الـلي فيـه كـره وتباشير *** بـه نـاس يفرحهـم ونـاسٍ شحنهـم
بشـرى مـن المـولى ولـي المقـاديـر *** وكره من الـلي رب الخلايق لعنهم
9- اللّغز التاسع :
وأنشد عن الـلي كـل ما نوشح المير *** صاروا هزالا حين يفضى صحنهم
يـفـنـا البشر ويـكـدر الصفـو تكـديـر *** وخـلا الأوادم يـزهـدون بـوطـنهـم
10- اللّغز العاشر :
وش الـذي في صولته يزعج الناس *** يـاكـل وهـو بعـض البشـر ياكلونـه
اليا أكل يضرس وهو ماله اضراس *** ولا تاجـد الـلي شاف لمعـة سنونـه
الـكـل شـافـه بـالـسـمـاهـيـد نــوّاس *** واليـاهجـم يقضي عـلى كـل مـونـه
من داج حولـه للخطر دق الأجراس *** ونـادى بعـال الصوت يـبي المعونه
يسبق سريعـات الركايب والأفـراس *** والـيـا هـرب هيهـات مـا يلحقـونـه
11- اللغـّز الحادي عشر :
وش المهـان الـلي بـالأقـدام ينـداس *** والنـاس فـي غـال الثّـمن يشترونه
اليـا طعـن يطعـن تقـل موس كبّـاس *** ويخـلي الصاحـب تـبـارق عـيـونـه
تشوف بأصحابه تقل لـون محماس *** مـا أظـن يـتـركـهـم ولا يـتـركـونــه
فيـما مضى لباّست الـدّرع والطـاس *** فـرسـان وأبطـال العـرب يرغبونـه
12- اللغـزّ الثاني عشر :
وش الـذي يا ربعـنـا ينعـش الـراس *** عـلـمـه شهـيـر وكـلـكـم تشتهـونـه
طـاريـه يـذكـر في مفاخـر ونوماس *** وأصبح ولع ما تسلك النـاس دونـه
هـذاك يحـضـر والمنـاعـيـر جـلاّس *** وأن مـا حـضـر لابـد هـم يحتـرونـه
لـه بالشجاعـه دور مع قـوة البـاس *** وقـت اللـّزوم اليـا حضر يكرهـونـه
لا تكثرون مـن الهقاوي والأحـداس *** اسمه بـذاتـه مـقـصـدي تـرمعـونـه
13- اللغز الثالث عشر :
انشدكم يـا أهـل الديـوان *** عن الـلي قالـوا ما شيف
ثـنتيـن بمـاضي الـزمـان *** أشباح وذكرهـن مخيـف
منـهـن تهـاب الشجعـان *** مـجـهـولات بـلا تعـريـف
ما عاشن وسـط السكان *** بالمثـل طـاريـهـن هـيـف
أنشرهـن يا أبـن حنيـان *** للمجموعه يا أخو سيـف
14- اللّغز الرابع عشر :
وابـي انشـد عن شي كـان *** ما أدري واقـع أو تصنيف
دايــم تـطــريـه الـشـيـبـان *** للقـاضي عـون وسـعـيـف
يـوجـد مـع كـل الـعـربـان *** يستعمل في محي الحـيـف
لــه عــلاقـة بـالـنـيـــران *** لـكـن فـي وضعـه تـزييـف
مـا يصبـر عـلـيـه انسان *** كيـف الـرجـل يحمله كيـف
15- اللّغز الخامس عشر :
وأبـي انـشـدكـم يـالـويـلان *** عـن مكان بغـرب طـريـف
طـريـف بـوقـت المـقـطـان *** ودك تـزوره بـالـصـيــــف
نـسـيـمـه يـشـبـه لـبـنـــان *** ولا يـشـبــه جــو جـنـيــف
بـه آب يـشـابــه نـيـســـان *** يـنـشـعـك الـجـو الـلّـطيـف
مـراتـع عـلـيـا وعـلـيـــان *** مـفـلاهـا فـي وقـت الـريـف
والـلـي أبـي حـلّـه مـكــان *** واضـح مـا يـبـي تـوصـيـف
مـن وطـاه مـن الـركـبـان *** مـا عـوّد مـهـف الـضـيـــف
مـا هـو رمـل ولا ضلعـان *** ولا يـردم فـوقـه رصـيـــف
16- اللّغز السادس عشر :
انشدك عن عـذرا تشيل اثقل الشيل *** حـيـن يتعـاون راسهـا مـع جسـدها
تـشيـل حـمـل مـا قـووه الرجاجـيـل *** ولا تـنهـض ألا كـود تـومي بـيـدهـا
17- اللغز السابع عشر :
أنشد عـن الـلي عادتـه يجمع الكيـل *** فـي جـفـره لمخـزون كيلـه مهـدهـا
دايـم هـو وربعـه يـبـيـد المحاصيـل *** من دون منجل في سنونـه حصدها
حـلّـوا بكيله ناس في ماضي الجيل *** بالوقت الأقشر يـوم الأفـكـار شدهـا
18- اللّغز الثامن عشر :
أنشـد عـن الـلي كـان بانت لهـا ذيـل *** بعـض البـدو تسبهـا مـا اتحمـدهـا
هـذيـك الـلي لا شافهـا الـبـدو بالليـل *** تـوقـعـوا بـالـلي يـجـيـهـم بـعـدهـا
قالـوا تجينا سنين يفـتـر بهـا الحيـل *** والنوق هي والضان ينقص عددها
لـكـن سـوالـفـهـم هـقاوي وأقـاويـل *** تـروى حـكايـه مـا عـرفـنـا سندهـا
19- اللّغز التاسع عشر :
بـه قصر ما حـولـه بنايـات وقصـور *** نسمع ذكـر طـاريـه لـو ما نـزوره
راعـيـه يـذكـر بالـروايـات مشـهـور *** لاشـك عـلمـه بالسوالف اسطـوره
قـبـيـلـتـه بـيــن الـقـبـايـل لـهــا دور *** لا زال تـعـرف فـي ديـار مـخبـوره
20- اللغـّز العشرون :
وأنشدك عن عـذرا لها أسم مذكـور *** شـاهـدت لـهـا بالـقـروبـات صـوره
الأسم لـه مدلول لـوهـي مـن القـور *** مفعـولهـا مبـطي محـاه أخـو نـوره
مع ربعنا تذكر لهـا سنين واعصور *** واليـوم صـارت مهملـه ومخصوره
21- اللّغز الحادي والعشرون :
وأبـي انشدك عن لغز حلّه ومشكور *** وش الذي عـلى البشر بـه خطوره
فيما مضى مـا ينعـرف كـان مغمـور *** واليـوم يـا كـافي الـبـلا حـان دوره
كـم واحــدٍ دالــه مـكـيّـف ومـسـرور *** عقب الفرح والكيف خرب شعوره
22- اللّغز الثاني والعشرون :
وبـه موقع اللي أسسه ليس ماجور *** من يتبع الـلي انشاه يلـزم حضوره
حوله تطوف القوم والعقل مسحور *** وبـه هيكـل واضح بشكلـه خضوره
قالوا براس المرتفع حاط بـه سـور *** وأن جيت ربعه خـل نفسك صبـوره
23- اللّغز الثالث والعشرون :
انشدك عن خـفـره من البيض ترفـه *** بـنتٍ جميلـه زينهـا يشبـه الشمس
متشنطحـه فـي راس رجـلٍ تـعـرفـه *** يا كثر الـلي شافوه باليوم والأمس
بالحل شف لك ياأبن الأجواد صرفه *** ولا تـراهـم يركبونـك عـلى الجمس
24- اللّغز الرابع والعشرون :
وانـشدك عـن شـي بـكـفّـك تـغـرفـه *** مـا يـنـمسك لـكـن تـحـرّاه بالـلّمـس
ما أظن عـن وجهـت نـويـه تحرفـه *** البيـر مع طول المدا يطمسه طمس
حـتى الثـّمـر مع قو غرسه يخـرفـه *** ألا ويسطي بالجـدث داخـل الـرمّس
25- اللّغز الخامس والعشرون :
انشدك عن رجاّل من ضمن الأموات *** لاشـك بـيـن المجـتمع لا يـزل حـي
يـذكـر مع الحيين في بعض الأوقـات *** يسكن بجفرة بـيـر في داخلـه طـي
تـفـخـر بـذكـره عـزوتـه والقـرابـات *** لا تعـتجـل بالـحـل فـكّـر بـه شـوي
26- اللّغز السادس والعشرون :
وانشدك عـن رجـل يضـم الجنيهـات *** ويرفض يطلعهن اليا قلت لـه عـي
طبعـه كتـوم وعادته صمت واسكات *** وأحيـان لازم يعـتـذر ما معـه شـي
بالـجـود يـبـذل لـه طـبـايـع وعـادات *** وأن كـان باشر بالفلس قـلت يا لي
27- اللّغز السابع والعشرون :
نـويـت اصيغ اللّغـز وأرغب حلولـه *** ونـويت أبسّـط حـلهـا لمـن رمعـهـا
مطـلـوب كـل أنسـان يـركـب ذلـولـه *** ويسـوح بالبـيـداء يـدّور طـمـعـهـا
وش الـذلـول الـلـي تشيـل الحمولـه *** رب الـخـلايـق جـل شـانـه بـدعـهـا
28- اللّغز الثامن والعشرون :
انـشـدك عـن شـي تـعـجـب بـطـولـه *** وسوالـف العـالـم بصـدره جمعـهـا
شفـتـه وقـلـت أهـب يـا طـول زولـه *** يـنـقـل محامـل في جنوبـه وضعهـا
وأن ما حضبوا ربعه بقربه وحـولـه *** اهـل الـلّـوازم ضـرهـا مـا نـفـعـهـا
29- اللّغز التاسع والعشرون :
وأنشدك عـن رجّـال عقـلـك يـهـولـه *** به ناس يفرحها ونـاس ايخـرعهـا
ما كنت اعـرفـه في زمـان الطفـولـه *** واليـوم كـل النـاس موجـود معـهـا
أحـيـان كـانـه قـال يـصـدق بـقــولـه *** ونـوبٍ أقـوالـه مـا عـرفنـا سنعهـا
30- اللّغز الثلاثون :
وأنشدك عـن منهـج كثيـره خـلـولـه *** بـه نـاس طـمنـهـا ونـاسٍ رفـعـهـا
يـصـدح بـوصفـه بالكـرم والرجولـه *** بلحـون شاعـر بالمحافـل سـجعهـا
مـاهي عـن الخالـق ولا عن رسولـه *** أنصحـك يامن تقبل النّصح دعـهـا
31- - اللّغز الحادي والثلاثون :
نـشـدتـكـم عـن لـغـز يـا أولاد عـنـاز *** أربـع قـرايـا مـقـابـلاتـن بعـضهـن
وحدّهـن الـلي بـاق بالخـال وانـحـاز *** خـان وغـدر وعهود خاله نقضهن
وجـاه الـذي خـلاّه مـن قـربهن جـاز *** بالسيف واحجـج المعانـد دحضهن
عـن الـثـلاثـة هـاتـوا الحـل بـأيـجـاز *** وألأربـع التـاريخ مبـطي حفـظهـن
اسمن جمعهـن تـتـعـه نجـد واحجـاز *** واسماهن الأربع تـوفّـر عوضهـن
32- اللّغز الثاني والثلاثون :
نـشـدتـكـم يـالـلـي تـحـلـون الألـغـاز *** عن معـلم موجـود في جنـب بطحـا
راعيه مبطي في مجـال الفخـر فـاز *** مـا يـوم دنّـق للـمـعـادي ولا أطـحـا
هـيـا عطونـا الحـل يا ثقـال الأرواز *** مـن قـبـل يـركبكـم دغـيّـم ابـسطحـا
33- اللّغز الثالث والثلاثون :
أبي أنشد اللي معنا الألغاز يفهمها *** عن محفظه من يشكي الراس يدخلها
أمنـت بالله تلقم الشخص في فمها *** ويسمع أصوات مجلجله ما أيتحملّها
يشعر بضيقه حتّى الأنفاس يكتمها *** كـنّـه ابـرزخ ضيقتـه مـا تـخـيـلـهــا
34- اللّغز الرابع والثلاثون :
الـبـنـت الـلـي تـمشي بـلـيـا قـوايـم *** لاشـفـتـهـا صـوره ولاهـي بصـوره
في وجهها الأسود خطوط وعـلايـم *** منـهـا حكيـم الـراي يـاخـذ مـشـوره
مـا كـل عضو من الجسد لـه تـلايـم *** ويحتاجهـا الأنسان عـنـد الضروره
35- اللّغز الخامس والثلاثون :
الـستّـه الـلـي مـن قــديــم الـزمـانـي *** جانـا الحـذر عنهـن وهـن بالحليله
يفهـمهـن الـلـي يـفهـمـون المعـانـي *** والـلي غـفـل عنهلـن بليـد وهبيلـه
حديهـن من اسبـاب قـطـع العـوانـي *** كـن الـرجـل مقطوع مـالـه فصيلـه
والبـاقـيـات بـوصـفـهـن عـلـم ثـاني *** الكـل مـنهـن تـتصـف فـي وسيـلـه
36- اللغّز السادس والثلاثون :
وخـوذوا كـذلـك بالعـجـل لـغـز ثـاني يا ربـعنـا يـا أهـل الخـلاق النبـيلـه
سـمعـت بـالحـفـلات والـمهـرجـانـي *** الـكـل يـبـي الـعـلـم بـاسـم القبـيـلـه
والـعـلـم فـازوا بـه كـبـار الصيـانـي *** أهـل العـلـوم الغـانـمـه والفـضيـلـه
قـلـت أخـبـروني يا عـراب المجـاني *** وش اسم الـلي بالطهبله شد حيلـه
يـرثـع كـمـا يـرثـع قـعـود العـمـانـي *** ويـقـول بـكـل النـاس يـنـدر مثيـلـه
يـمكـن حـلـول اللّغـز بـأربـع ثـوانـي *** وضّـحـت لـلـرامـع مـبـادي دلـيـلـه
37- اللغز السابع والثلاثون :
يـاربــعــنـا لا تـواخــذونـي تــرانــي *** مـا ودي الـغـازي عـلـيكـم ثـقـيـلـه
أنـشـد عـن الـلي من العلوم اتخفاني *** مـن حـيـث معلومات فكـري قليلـه
ثـلاث تــذكـر فــي رفـيــع الـمـكـانـي *** الـلي يشيـدون الـرجـال بـجـمـيلـه
وثـلاث تـذكـر مـن صفـات الهـدانـي *** من يوجدن بـه مـا بقـربـه حصيله
هـيـا اعـرفـوهـن يـا طـوال اليمـاني *** نـبـي الخـبـر والـعـلـم هاتـوا ذبيلـه
38- اللّغز الثامن والثلاثون :
يـا الـربـع أنا لقروبكم جـيـت عـانـي *** حيثـه يضـم الـلي يحـوش النفـيلـه
أولاد وايــل عـدهــم مــن اخــوانـي *** ربـعـي سـلايـل مـقحمـيـن الـدبـيلـه
وش الـذي مـابـه لـك الـلـه مـثـانـي *** نـتـج اسبـاب الـلي يـبـوق بعـمـيلـه
مشهور عـلمـه عـنـد قاصي ودانـي *** ثـلاث اسـامـي كـلـهـا تـنـتـمـي لــه
يتبع

39- اللّغز التاسع والثلاثون :
الأسـم الـلي يـذكـر بـكـل الـتـواريـخ *** هـو اصلنـا وهـو جدنـا وهـو نسبنا
ينسب له الفارس وينسب له الشيخ *** وعرفوا به اربع من نوادر عـربنـا
مـنـهـم الأربـع يالـرجـال المطـانيـخ *** مبـطـي ذكـرنـاهـم وعـنهـم كـتـبـنـا
مامنهم الـلي طبعـه الجـمخ والميـخ *** ومـن طيـب شرواهم نفلنـا وطـبنـا
40- اللّغز الأربعون :
وأيضاً ثلاثه من شخوص المجاويخ *** منهـم تـزايـد حـرصنـا واحـتـزبـنـا
لـهـم كـرامـه بـالـربـاع الـشـواميـخ *** ولهـم حـقـوق بكـل مسمـوك يـبـنـا
قبل يصير الـزاد عـنـد العـرب طيـخ *** مـن جـالنـا منهـم لـه الكبش جبـنـا
ومـن قصـر بماجوبهـم جـاه تـوبيخ *** ونـقـص بحـلالـه مع لـوايـم عـتبنـا
41- اللّغز الحادي والأربعون :
فـازوا ضنـا عـنّـاز بـأربـع خـصايـل *** هـن الـذي مـنهـن دواعـي فـخـرنـا
والـشـكـر لـلـه كـل الأربـع نـفـايـــل *** من فضل رب البيت حـنـا انتصرنـا
يـلـزمـكـم التـوضيح يا عـيـال وايـل *** عـن نـص الأربع حيث لهن نشرنـا
حـتى عـلى الشامـت نـسـد الخـلايـل *** الـلي بـعـلـم الطـيـب يـكتـم خـبـرنـا
42- اللّغز الثاني والأربعون :
اطـلـب ولـبّـوا طـلـبـتـي يالـحـمـايـل *** أن كـان طـعتونـي عـليـكـم أشـرنـا
الخـصـلـه الـلي عـلمهـا دوم طـايـل *** مـا يـوم عـنـهـا بالنـصايـح ذخـرنـا
الـلـي بـهــا يـلـتـم شـمـل الـقـبـايــل *** مـن أجـلـهـا لابـد نـبـعــد نـظــرنـــا
وش اسـمـهـا يـا طـيـبـيـن الفعـايـل *** أن كـان طـبقـنـا هـدفـهـا اشتـهـرنـا
43- اللّغز الثالث والأربعون :
أبي أنشد الـلي عندهم عرف والمام *** عـن الثـلاث الـلي رووهن صحابـه
أولهـن الـلي طعـنتـه مـثـل الأسهـام *** الـلي طـعـيـنـه مـا تـشـافى صوابـه
والثـاني الـلي سـار مـاشـي بالأقـدام *** رب الـخـلايـق وفـقـه واعـتـنـابــه
والثـالـث الـلي بالعـرب مقصده هـام *** يـلـفـظ كـلام ولا يـحـسّـب حـسابـه
44- اللّغز الرابع والأربعون :
وأنشد عن الـلي له مجال أول العـام *** صـدر بـه الـتـحـذيـر كـلـن درابـــه
علمه نشر عـبـر الجـرايـد والإعـلام *** لـو كـان يلمس جـنـدل الصّـم ذابـه
أشـد واعـظـم مـن صـواريـخ صـدّام *** نـعـوذ بـالـلـه مـن نـفـيـح التهـابـه
لـه سابقـه تاريخهـا بصـدر الإسـلام *** الـلي سكـن في دار بصرى سرابـه
45- اللغّز الخامس والأرعون :
ونشدتكم عـن لـغـز حـلّـوه يا اكـرام *** يـحـتـاج يـا قـروم النشـامـا اجـابـه
تـراه عـنـد الشيخ يصـدر بـه أحكـام *** مـا يـنفع المحكـوم فـزعـت قـرابـه
مـن يلفظه جـتـه الفجيعه من اشمام *** مـا نـال فـود ولا تـهـنـا بـشـبـابـــه
مـن لا يـعـد الحـق فـي ديـن الإسلام *** خـايـن ويبشـر بالفـلـس والخيـابـه
46- اللّغز السادس والأربعون :
ونشدتكم عـن غـايـةٍ فـعلهـا اجـرام *** تهفي حقوق الناس عـقـب الطلابـه
يا كثر اللي من جورها صار منظـام *** باسبـابـهـا حـقّـه خـصيمـه غـدابـه
والمنهظم يالربع لو صاح مـا أيـلام *** مـاعـاد لـه مـابـيـن ربـعـه مـهـابـه
من الغلب يسمي هيكله جلد واعظام *** أضنـاه جـور الـلـي يـفـتـّل شنـابـه
47- اللّغز السابع والأربعون :
انشدك عـن رجـل جـنوبـه عـريضه *** يا كثـر مـا يأتـونـه النـاس بالقيض
واليـوم واقـف بـس تـنظـر وميضه *** ماعاد جاه من الهواشل خواضيض
راعـيـه يـبـزع كـل مـا زاد غـيـضه *** فيما مضى طعـن ولا سـاق تعويض
48- اللّغز الثامن والأربعون :
انـشـدك عـن شـي سريعٍ فـضيضه *** الـلي اليـا شفته يشبّه عـلى الفيـض
مـثـل الغـمـام الـلي نشاهـد نفيضـه *** من جاه يشكي من نقايص وتقويض
يـقـدم ويـدحـم والـخـلايـق مريضه *** ومعه عـلى قـص الفـوايـد مقاريض
49- اللغز التاسع والأربعون :
انـشـدك عـن انـثى لهـا بـس بـيـضه *** بيضه وحيـده مابها غيرها بـيـض
مـا قـصـدهـا عـاجـز ولاهي مريضه *** ولاعاقها عيون الخباث المباغيض
هـذا حـصـل والعـبـد ربـه حـفيـضـه *** أمر الولي ما بيـن رمشه وتغميض
50- اللغز الخمسين :
انشدك عن هانـوف ماهي حظيظـه *** تغضب على المخلوق من دون تحريض
وش عاد لـو مسكانها وسط فـيضه *** تـاكـل ولا ماكولها عشب وحميـض
مـاهـي تصـوم ولا تعـرف الفريضه *** وعيالهـا فيهم سحام ولا هـم بـيض
51- اللّغز الحادي والخمسين :
انشـدك عـن رجـٍل عـلومـه طريـفـه *** مثـل الصديق الـلي بهرجـه يسليك
احـيـان يـبـدي لـك سوالـف مخيـفـه *** أحيان تزعـل منـه وأحيان يرضيك
كـل الـوظـايـف تـعـتـبـر لـه وظيـفـه *** يضحك بعض أحيان وأحيان يبكيك
52- اللّغز الثاني والخمسين :
وانشـدك عـن شـي يـسافـر بـكيـفـه *** يـمـر مـسـرع مـا يـطـولـنـه يـديــك
أحـيـان يـا كـافـي الـبـلا لـه وحيـفـه *** لـو تعترض له بأسفل القاع يرميك
مـاهـو الـريـاح الـلي يتفـك عصيفـه *** ولاهـو السيول اللي تظن بهقاويك
53- اللّغز الثالث والخمسين :
وانشدك عـن الـلي كتـب بالصحيفـه *** لا ريـب فـيـه ولا بـعـد فيـه تشكيك
مـا مـصـدره حـاكـم ولاهـو خـلـيـفـه *** صـدر بـأمـر الـلي يميتـك ويحييـك
مـهـمـا تـحـمـلـت الـحـيـاة الكـلـيـفـه *** أربـع كـلـمـاٍت عـن الـكـد تـغـنـيـك
54- اللّغز الرابع والخمسين :
وأنشدك عـن بـنـت توصف بصيفـه *** مـاهـي بتـاخـذ منـك لاشك تعـطيـك
الجسـم غـض ومستطـيـل وخفيـفـه *** تـفـرح ضميـر الـلي يحبّـك ويغليـك
تـبـذل هـدايـا لـكـل عـذرا عـفـيـفــه *** تنتـج وأظـن انتاجهـا لـيس خـافيـك
55- اللغز الخامس والخمسين :
انشدك عن الـلي تخافه مـلاييـن *** مبطي وحتّى اليوم كـلن يخـافـه
ما يوجد الا عنـد بعض القـويين *** مخفي ولا في يـوم فكّـوا غـلافه
ماغير مـرّه شيف بمجرد العيـن *** يزداد روعه من سمع به وشافه
فتكه أشد من الذي حـل بالصين *** آفـة عـصـر مـا تشابهه كـل آفـه
56- اللّغز السادس والخمسين :
وانشد عن الـلي حافظ العـلم والدين *** لاشـك هـو يـحتـاج جـهـد وكـلافـه
يـضـم شيـنـات المهـاجي وبـه زيـن *** يجيب صدق ونـوب هرجـه خرافـه
لـولاه مـا نـدري طريق الهدف وين *** بـه نـاس من أجـلـه تبـوج المسافه
فـيـه الـدلايـل واضحـه والـبـراهيـن *** ومـن شهـرتـه تـنـاولتـه الصحافـه
57- اللّغز السابع والخمسين :
أريـد انـشـد بـنـي وايــل *** عـن رجـلاً نـزيـه ونـزه
يـعـرف مع كـل القبـايـل *** وهو ساس القوه لعنزه
شجـاع ويخشاه العـايـل *** ويعبأ للي إبليس انغـزه
بـه تعديل الراس المايل *** كـان أنـه شكّه وخـرزه
موجود بعـصر الرحايل *** واليـوم الـزمان احجـزه
58- الثامن والخمسين :
وش الكفيف الـلي تجوّل ولا يشوف *** أمسح ولـه في داخـل الجلد عينين
بأرض الحمـاد اليـا ذكرناه معـروف *** وبـه طب عن علّه تصيب البعارين
مخـالـبـه مـثـل الـشـنـاكـيـر بكفـوف *** ويغوص باعماق الثـرا تقـل بكلين
يعـمـل ولكـن بالعـمـل لـيس مكلـوف *** مجهـد وفـوق القاع يرسم نياشين
يخبرك أبن عشبان ولا أبن مجعوف *** وقـاسم يخـبـره يـوم كـنـا بـداويـن
59- اللغز التاسع والخمسين :
وش النبـات الـلي بـهـذيـك الأريـاع *** أسمـه يسمّى بـه رجاجيـل بالغـرب
أن قلت رمثه عارف الرمث ما طاع *** لاشـك هـم باحجامهم بـيـنهـم قـرب
باللّـون قـاتـم مـالـه أشكـال وانـواع *** بـه طـب لكـن مـا تعالج به الجـرب
قالوا يفيد الناس عن بعض الأوجاع *** ويستعملـونـه للحيـاويـن بالسّـرب
60- اللّغز الستين :
انشـدك عـن شـي تشـوفـه عـيـونـك *** وأن كان تنشد صاحبه قال نوعيـن
نـوع قــريـب ولا يـتـأخـر بـعـونـــك *** ونـوع تشوفـه عـنـك مقـدار ميلين
61- اللغز الحادي والستون :
أنشـدك عـن نشميةٍ جوفها حار *** ومن حين يبرد جوفها ترّكوها
الخايبه شـرود مـا تـداني النـار *** وأن قـرّبت للّنار يخيب أبـوهـا
خويـت الطرقي بدربـه اليا سار *** وأن كان ماتت بالدرام جدعوها
62- اللّغز الثاني والستين :
أنشدك عن عذرا تعرّض للأخطار *** الـربع الـلي يغلونها عـذبـوهـا
صدّق أن قلت بجوفها دق مسمار *** تجـزي ولا تظمأ ولكن سقوها
سوداء بـدن سوادها يشبه الـقـار *** لاشك ناصع لونها مثل أخـوها
63- اللّغز الثالث والستين :
نشـدكـم عـن سـر بالصـدر مكنـون *** والـلي يـكنـه مـا تـمكـن يـبـيـحـه
ورد حديث من النبي عـنـه تدرون *** بالوصف يذكر فيه ذنب وفضيحه
64- اللّغز الرابع والستين :
وانشد عن الـلي كلكم لـه تسّبـون *** كـلّـه قـشر مـا فـيـه خصله مليحـه
مع البشر موجـود لاشك يكـمـون *** مـا يعـفي الآ أهل القلوب النصيحه
65- اللّغز الخامس والستين :
وأنشد عن اللي له بالأسماع توحون *** ينطق بلفضه بالهروج الفصيحه
بـالـوصـف كـنّـه يـالأجـاويـد بـرذون *** مخنـز ولكـن مـا تشمّون ريـحـه
66- اللّغز السادس والستين :
انـشـدك عـن ثـلاث هـن يـلـزمـنـك *** ولا منهن اللي ما وجوده ضروري
ثـنـتـيـن لـو مـا جيتهـم مـا يـجـنّـك *** والثـالـث الـلي تـاجـده لا شعـوري
عـزي لـحـالـك كـانـهـم فـارقـنــــك *** تدخـل مع الـلي يسكنون القبـوري
67- اللّغز السابع والستين :
وانشـد عـن الـلي ما هقيته بظنـك *** تكره تصرّح به بصوت جهوري
سنّـك ولكـن لـيس هـو مثـل سنـّك *** يطلع صعود وثـم ينـزل حدوري
68- اللّغز الثامن والستين :
هـات الأجـابـه يالفهـيـم المحـنّـك *** عن خفرة يشفق عليها التجوري
هـيـهـات مـا تـاجـد بـدلـهـا لأنـك *** بالبيت جالس منطوي ومحشوري
من يوم ماتت عقبها صرت كـنّك *** فقري طرودي ملتجي تقل سوري
69- اللغّز التاسع والستين :
وش الذي ذكره مع الناس نسمع به *** ولولا التصاوير بالتلفاز ما نشوفه
شجـاع يصعـب لقاه ونطحته صعبـه *** ضخم الجسد يشبه الخرتيت بوصوفه
يا كثر اللي من شوفتها صابهم رعبه *** يسكن بديره مغلقه ليس مكشوف
70- اللغّز السبعين :
وش الزعيم اللي تسلّط على شعبه *** اطفال ربعه شفتهم شوف في جوفه
يطمع بربعـه لكن الناس تطمع بـه *** يفرح بـه الـلي يدور القوت لضيوفه
شفنا له مجسّم يشابـه عـلى اللّعبه *** شبّه على أنسان واسمه خمسه حروفه
71- اللّغز الحادي والسبعين :
أنشد عن الـلي تلتهب كـنـها الـنـار *** تسعر وتحرق من يصيبه لهبها
من شبها يبحث عن الخزي والعار *** ولو صح له بعض الأوادم نكبها
توجد مع أهـل الكيد في كل الأقطار *** حـتى السرايا تنكسر من سببها
72- اللّغز الثاني والسبعين :
يالربع نبغي حـل لغـز أبـن عـبـار *** يالـلي عـرفـت حلول الألغاز جبها
وش الـذي دايـم يورد لـه اخـبـار *** بعلوم بعض الناس تحرق عصبها
تشذب عراقيب البشر تقل منشار *** وباسبابهـا العـزوه تـفـرّق شعبها
73- اللّغز الثالث والسبعين :
أنشدك عن الـلي تقل زول مفـرود *** فـي عـصـرنـا مـا تنعـرف قيمتـه كـم
ضنـاه يا كـافي البـلا تـقـل جـلمـود *** سبحـان خـلاّق المـلأ شفـتهـا صـم
تضرب بها الأمثال في حزّت الحود *** اسرع من اللي ساقها الموج باليم
74- اللّغز الرابع والسبعين :
انشدكـم عـن لغـزٍ صعـب *** ومع صعبه يسهل بالحل
عن تلعه تاقف في شعـب *** قـالـوا تـذكـر حـول تبـل
مـن دخـلها صابـه رعـب *** وتـراهـا توصف بالظـل
من جاهـا يرجـع للـدعـب *** حيـث بدربه جـال وتـل
75- اللّغز الخامس والسبعين :
انشـدك عـن رجـال دايـم يوجهـك *** معـك وتسمع هـرجته مـا تشـوفـه
وأن تهـت ولا عـلـت لازم ينبهـك *** ويرشد على درب السّنع ما تطوفه
ماجاب ذكر اسمك ولاشك يندهك *** طبعـه كـذا ما مقصـده بـك مـروفـه

هذه الألأغاز احتفظ بحلهاوسوف انشر منها في توتر

لا تحلها يا ابو مشعل نبي نحاول الله يسعدك