( مساجلات جديدة ) - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

08-04-2017, 06:32 PM

( مساجلات جديدة )

قال فحاط بن عشبان العريفي هذه القصيدة من شعر الهجيني يسند على عبدالله بن دهيمش بن عبار :

أبـدي بـالـلي يـعـلـم الأسـرار *** مـن يـطـلبـه يلـطـف بحـالـه

الـلـي خـلـق جـنـّتـه والـنـــار *** والـنـاس كـلـن لـه اعـمـالـه

هـو الـمـصّــور وهــو الـبـار *** بـامــره نـفـذ كـل مـا قــالــه

حـنــا بــرجـا ربـنـا الـغــفــار *** كـل عــقــده الـرّب حــلاّلـــه

أنجـا رسوله من وسط الغـار *** مـن دوره ضــاع دلاّلــــــــه

سبـحـان الـلـي لـلـفـلـك دوّار *** مـجـيـب عـبــده الـيـا سـالـه

والأرض يحييها من الأمطـار *** ويـخـلـي الـسّـحـب هـطـالـه

والعـشـب يـزهـر مـن النـوار *** وكـلـن يـربّـع عـلـى فــالـــه

مـن بـعـد ذكره للقاف اخـتـار *** واهـديـه لـلي الـفـخـر نـالـه

حيث أنـه مـن ربعـنا الأخيـار *** أبـو مـشعـل تـكـثـر أمـثـالـه

جهـزت أنـا الـلي وقوده نـار *** يسوى مـن الـدراهـم عـدالـه

لا دق سـلـفـه واكـرنـكـه دار *** كـنـه شيـهـان نصى عـيـالـه

اسبق من الـلي عـلى الأوكار *** الـلـي بـشـولاح يــومــالـــه

سواقـه مـرسول معـه أخبـار *** يـم الـلي يهلـي بالـلي جـالـه

عند أبن دهيمش نسل عـبـار *** مـن يـوصلـه يـنشـرح بـالـه

يـذبـح الـيـا جـولـه الـخــطّـار *** والــبــن يــفــوح بــدلالــــه

كـل شي مقيّس عـلى المقدار *** وايـكـيّـف الـراس فـنـجـالـه

وفضايله ما انحصاها اكـثـار *** عـنـد اللّـزم يرخص امـوالـه

واشرح لـه من وقتنا محتـار *** ومـن يـفـتكـر حـالتـه حـالـه

النـاس استغنت عـن المسيار *** كـلــن يــفـتّــش بـجـــوالـــه

كـثـر تـلـميسـه نـعـتبـره عـار *** ولـو جـولـه الناس ما شاله

شاهـدت شـي مـاهـو بـذكـار *** راعي المجلس جالس لحاله

مـن قـبـل نسيّر على المختار *** لــو أنــه بــعـيــد يــعــنـالــه

يا قبلت الله عـلى أهـل الكـار *** الطـيّـب مـا تـنـسـي افـعـالـه

قـلـتـه ولانـي مـن الـشّـعــار *** ولـلـخـطـأ الأجـواد حـمّــالــه

وعـلى النـبي نصـلّي بتكرار *** بــعــداد مــا كــتــب بــالآلــه

وقال عبدالله بن دهيمش بن عبار هذه القصيدة رداً على الشاعر فحاط بن عشبان العريفي :

مـبـداي بـسـم الـلـه الـجـبــار *** رب الـمـلأ نـشكـر أفـضـالـه

وبـعـد ذكـر الـواحـد الـقـهّـار *** أخـتـار مـن قـافـي اجـزالــه

قـم يالنـدّيـب أركـب الفـكسـار *** الجـيـب مـن يـنـظـره هـالـه

الـجـيـب صمـم يـبـوج الـقـار *** والـحـيـد والطّعس يـعـبـالـه

الـلـه يـفـكّـه مـن الأشـــــرار *** ومن حادث الدّرب وأهوالـه

تــوّه ورد والــعــداد اصـفـار *** مـن ورد الـجـيـب يـدعـالــه

نويت أنـا أبـي ارسله مشوار *** للقـرم الـلي وصـل مرسالـه

ود الـرسـالـه عـزيـز الــجـار *** بـيـت أبـو فـرحان مـدهـالـه

الـفـيـن دونــه مـن الأمـتــار *** شــمــال أبــن بــاز مـنـزالـه

فـي مـجـلسـه تـدلـه السّـمـار *** مـن جـاه مـسـتـانـس ودالـه

فـحـاط قـرم وصلـيـب أشـوار *** الـكـفــو والـنّـعــم يــزهـالـه

عـن رد قافه مـا جبت أعـذار *** ولانـي لـريف الخـوي زالـه

حـيـثـه فـهـيـم وبعـيـد أذكـار *** وعـريـب مـن عـمّـه وخالـه

مـن ساس عـزوه لهـم تعبـار *** عـوارف الـيـا حـصـل قـالـه

والطيـب لهـم هـدف واشعـار *** وبـهـم حـمـيّـه وزعّــالــــــه

فـحـاّط يـنـشـد لـه استـفسـار *** عن حاضر العصر واحوالـه

يـقـول مـن هالـزمـن محـتـار *** شـاف الـمـخـالـيـق شـغّـالـه

لاحـظـت مـا يـلـفـت الأنـظـار *** من يسمع الهرج ما اصغاله

الـلي ذكـرتـه شـفـنـاه وصـار *** الــكــل يـنــظــر لــجــوالــه

بجهـازه تـلـقـا اصبـعـه فـرّار *** لاهــي ولا طــاع عــذّالـــــه

مـا فـاد بـه نـقــد واسـتـنـكـار *** والـعـصـر هـذا لـه رجـالــه

أنـظـر تـرى كبارهـم وصغـار *** كــلــن يــغــنــي بــمــوالــه

بـه مـدح بـه سـب واستهتـار *** واليوم الـلي يسكت اشوالـه

مجـيـوب مـن مصنـع الكـفّـار *** والـكـل بـه يـنـفـق ريـالــــه

الـلي صنـعـه راهـب الأحـبـار *** يلـبس صليبـه عـلى ابـدالـه

لاشـك لـه مـنـفـعـه وأضــرار *** كـم واحـد اشقـاه واغـتـالـه

قال الشاعر نايف بن عبدالله السليمي الحربي هذه الأبيات يسند على عبدالله بن دهيمش بن عبار :

وفـيّـت مـا هـفـيـت يـا مـنـبـع الـعـز *** كــل الــذي قـدمـت لـلـنـاس وافــي

فـيـك الـجـزالـه والـمـعـانـي تـعــزز *** تاريخـكـم معـروف مـاهـو بـخـافـي

عـبـدالـلـه الـعـبـار مـجـدك تـمـيّـــز *** شاعـر كبـيـر وطـيّـب القـلب صافي

هـزيت عرش الطيب والمرجله هـز *** ومن بعدهـا هـزيت عـرش القوافي

يا أبـو مشعل شرواك للطيب مـركـز *** يا عـزوة الـويلان خـيـرك يـشافـي

أنـت الـوفي ولا الردي قيـل مـا عـز *** يـفـداك يـا راعـي الوفـاء يالسنافي

وتـم الـكـلام الـلي لـلأخـبـار مـوجـز *** مـا قـل دل وزبـدة الـهـرج كـافــــي

قال عبدالله بن دهيمش بن عبار هذه الأبيات جواب لأبيات الشاعر نايف بن عبدالله الحربي :

حـي الجـواب وحـي مـن للشّعـر كـز *** مـن نـايـف الحـربي بعـيـد الهدافي

القـرم الـلي لا طـالع الضيـف لـه فـز *** يـفـرح ويذبـح لـه سمين الهـرافي

من حرب عزوة كان قدح الشررشز *** يـثـنـون دون مـنـيـلات الـشـعـافـي

يـوم السبايا فـي نهـار الـوغى اتـلـز *** يـروون حـد مـصـقـلات الـشـلافـي

أدنـاهـم الـلي ينطـح الخـصم مـا نـز *** رجـالهـم يـوم الـلـقـاء مـا يـخـافـي

ويوم العرب تاخذ على المونه افـرز *** ريـف الهـواشـل بالسنيـن العجافي