أضرب على الكايد بقوه ولا اتخاف
..........................................

هذي الابيات موجهه لي من الاخ الكريم : منصور بن ظاهر البخيتان الشمري

اليكم الابيات عسى ان تنال اعجابكم

سجلـت بالقرطـاس قـاف علـى قـاف = عسـى الولايـف يسـمعـون بضروفـي
مــن دونـهـم الفـيـن كيـلـوا ولـفــاف = وستـيـن كيـلـوا للـوعـر والـجـروفـي
بينـي وبينـه لاتـواصـل والا اطــراف = ولا عــاد لــه رقــم بهـاتـف كـفـوفـي
شـرط لبوهـا يمسـح بقـدر الانصـاف = ولازم اوريــهـــم مـقــفــى كـتــوفــي
عنـي يقولـون ابتعـد يابـن الاشـراف = لاعـــاد شـوفــك يـتــوازن بـشـوفــي
ابـوه غثيـث وضيـقـوا صــدره الاف = لــو يــدري بحـالـي يـعــز ويـروفــي
لاكـن اخوهـا مسـرف فينـي اسـراف = مـن قـول اخوهـا مـا تلامـع سيوفـي
وعمـه مشينـي وانــا مـابـي اخــلاف = خـلانــي اضـيــع مـجـلــة صــدوفــي
عـزاه هــذا وماحـصـل بـكـل سـيـاف = كــل يـبـي يسـحـب جفـيـره بـجـوفـي
لا عــاد حــب ينـشـرى ثـــم يـنـعـاف = ولا عـاد حـب مــن وراهــم يطـوفـي
وش رايـك بحكـم الزمـن والتـخـلاف = بالـلـي وصايفـهـا تـشـل الـوصـوفـي
احلا مـن السكـر طعـم حلـو الاريـاف = تنتـج مـن الـروح العـزيـزه حـروفـي
عنـي حداهـا حـي مخلـوق مايضـاف = من اللي حرم نواف مـن دون نوفـي
عزربـي الدنيـا وانــا منخـلـق جــاف = ومـن عقبهـا قامـت تعاكـس كتـوفـي
بـان الـهـلاك وبــان شــي بالاكـتـاف = وضلـوع صـدري تقـل فنجـال توفـي
حـرك بقلبـي بـلـف بسبـايـك الـهـاف = وانـــــا بـلـيـاهــم تــقـــادح بـلــوفــي
يامحمـد السوعـان طافـوا ولا طــاف = ياعـزتـي للـحـال عـقــب الـوصـوفـي
يابـن ربيـع العلـم شوفـه ولا يـشـاف = وش حيلـتـي عطـنـي حـلـول تنـوفـي
والله وامــان الله ان كــان مـايـشـاف = كـبـدي يقلقـلـهـا ضـعـيـف الكـفـوفـي
تـحــدوا الــلــي مـايـتـحـداه ســيــاف = وتمتـعـوا بالـحـال عـقـب الضـروفـي
تكفـى يابـن سوعـان مانـي بـخـواف = عـلـة خـفـوق صويحـبـي مـاتـروفـي
اسـرع بحـل المشكلـه قبـل الاخـلاف = قبـل يمـوت ابـوه واخـوهـا وجـوفـي
من يزرعون السنبله عقب الاعجاف = تعـلـكـهـم ام السـنـبـلـه والـعـجـوفــي
وان مافزعـت اليـوم للنـون والكـاف = افـداه انــا فــي ســل سبـيـل يهـوفـي
واختامهـا مانـي وانـا اخـوك نــواف = ولانــي بـعـد مـنـه يـحــب الهـنـوفـي


الشاعر / منصور ظاهر البخيتان الشمري

.................................................. .................................................. .......
أضرب على الكايد بقوه ولا اتخاف
ردي على الأخ منصور ظاهر البخيتان ...... اتمنى ان تحوز على على اعجابه واعجاب الجميع


بِسْـــم الــذي نـٰـزّل تبـــارك والاعـــراف = ســـبحانـه اللـي يشــوفنـا ولا يـشــافي
بديـت انا بســــمـه وحضرت الاصـحاف = وأسـرجـت انـا بـالحــال خيــل القٰـوافـي
هـاضــت هـواجيسـي وحـددت الاهـداف = واخٰـــذت انـا لــي ســــجـةً واانـعـطـأفي
ردً على اللي خصـني وارســل الـقـــاف = عبــر الوســايـل ضيف الاجــواد ضافي
ضــيفً عـزيـًز وعـادة الـناس تنـظــاف = وللضيـف حشـــمـه واحتـرامً إيـضـافـي
يـا مـرحـبـابٰـك عــد مـنـبـوت الاريــاف = ومااهــتـزت غـصـون الشـجر بالـفيافي
حــزة لــفـا جـفـني لـزيـن الـكـرا عـــاف = لـيـن انتـصـف ليــل الـغٰـرام انـتصـافـي
منصور ابــن ظاهــر لــه القــاف ميـلاف = لاشــك عنيــده ينعـسٰــف لٰــه اعسٰـافي
شـاعــر ولـه قـيفـان جــزلــه بٰالاوصاف = مـثــل الذهـب عـن كـل عـذروب صـافي
قـافً كــمــا اليـاقــوت والٰــدر ينـشــاف = ومـثــل العـسـل لاذيـب بيــن الاشـــافي
ما كــنــــه الا قــاف مطــلــق وصـيّــاف = وفٰــرايٰـــد اللعـبـــون وابـــٰن النـصــافي
ولاِ كـمـا التـيٰـجـان مــن فٰــوق الاكـتاف = مـــن صـاحــبً قــدره تـعـــلا. ونـافــي
سـرابـي الهـوجــاس فـي كـل الأطـراف = يــومـن خـلـــي الـقـلــب بالنـُوم غــافـي
قـضـيـتهــا مــابيـن مـوجـات الاطُــيـاف = طـيــفً يـعـيـيـبه وطــــيـفً يُــــوافــي
لـعيـون مــٰـن صـٰــاغ المعٰـاني على آف = واصــفى مـن الـصافي بـوسـط المصافي
نسـل الطــنايـا خلــفـة النَّاس الإشــراف = حـفيــد قــــومً يـكـــرمـون الضـــــعــافي
قٰــومً لـهــم بالـقـلــب تـقُــديرً بٰـاســراف = شــمـر هـــل الطــولات حـمٰــر الكـفـافي
يشــكي هـوى المجـمول منبـوز الأرداف = اللــي عـلـيــه الــوقــت يـفـرض تجــافي
بينــه وبيـنـه حــالــت اظـروفً اعـجـاف = مــا بيــن جـــزر ومـــــد والانكــســـافـي
وان كــان خـلـك يالبخــيـتـان مــا عــاف = رغــم الــذي قــد صـار مخـلـص ووافـي
ابــذل لــه المجـهــود والــــود بــانصاف = وبـالشــك قـلـبــك لايـجــٰيـــه ارتـجــافـي
اضٰرب عـلى الكٰــايــد بقـــٰوه ولا اتخاف = لـعــلـهــا يــالــقــرم تـصـــبـح عـــوافــي
ياللــي كـمـا حـــرً عـلـى راس مشــراف = ابـشــر بـعـــزك واصـطــبــر يـالسـٰـنافـي
وانـا مـعــك يـالـقــرم فـي كـٰــل ميـقـــاف = يـمـنـاك مــا هـــاب الـخـطــر والكــلافـي
بعــون الـكـريـم وعٰـون ذربـيـن الاسلاف = قٰــرومً وعـــدهٰـم مـٰا يـجــيٰــه اخـتـلافـي
بٰـٰالـجُــاه ولاّ فـي خـشٰــم شــيك صــراف = نـجــمع شـٰتـاتـك مــع حسـين الــوصافي
حسُـب الاصـول وســنـة الله والاشـٰـراف = نـاتـي بخــلك. مــا يجــيــٰك اخــتـطــافـي
ولا لا يـهــزك. هٰــرج نــايـــف ونـــواف = وبــاقـٰي هـــذاريــــم الـعـــرب للـــذلافــي
وتمت وصــل الله عـلى خـيـر مـن طــاف = نبـيـنـا اللــي بــأطـــهــر الارض طـــافـي

محمد بن سوعان الربيّع

صح لسان الشاعرين منصور البخيتان الشمري ومحمد سوعان الربيّع
والقصّه الواردة في مظمون قصيدة منصور تذكرني بموقف من مواقف الشيخ الأمعط بن بدر العواجي رحمه الله عندما دخل عليه رجل من شمر يرغب الزواج من فاة من جماعته وكان أبوها ما يطيق شوفه ويكرهه وقد هدده بالقتل إذا عاد لخطبتها فنصى الأمعط ونخاه ليتوجه له عند أبوها وشرح له وضعه فركب الأمعط سيارته وأخذ الرجل معه وذهب لوالد الفتاه وعندما أقبلوا على بيته قال الرجل رفيق الأمعط انزلّني هنا ما استطيع اقابل أبو الفتاة أخشى أن يقتلني فقال الأمعط ؟ خلك معي أما يقتلنا كلنا أو نسلم وعندما وصلوا لبيت الرجل نزل الأمعط من السيارة وقال ( يا راعي البيت معك الأمعط بن بدر العواجي شيخ ولد سليمان ) وكان رفيق الأمعط متلثم لكي ما يعرفه قال يا هلا ويا مرحبا الله يحييك وعندما أماط اللثّام الرجل الرجل الذي يخطب الفتاه وشاهده أبوها قال ( يالأمعط الله يحييك ولا يحيي خويك والله لو ماهو معك غير تثور عليه البندق ) المهم قلطوا وذبح لهم وقال اقلط على واجبك يالعواجي قال ما اقلط الا بتلبية طلبي الذي جيت من اجله قال المعزّب الهدف الذي جيت ما يحصل لو تنطبق السماء على الأرض قال الأمعط بحول الله سيتم والله ما أطلع من بيتك ألا هي معنا أو أموت جوع في بيتك فقام الأمعط وخويه ونزلوا فرشهم من السياره وفرشوا بالربعه وناموا وعندما جاء وقت العشاء قلط المعزّب ذبيحه أخرى ورفض الأمعط أن يقلط عليها وأمرحوا مقوين وعندما أصبح ذبح الذبيحه الثالثه ورفض الأمعط أن يقلط عليها وقال والله لو تذبح غنمك كلها ما أمالحك ألا بتلبية طلبي وفي اليوم الثاني انحرج الرجل ولم ينام حيث ضيفه العواجي ورفض الطعام وهو يكره تزويج بنته من هذا الرجل فذبح ذبيحه رابعه وقال اقلط يالعواجي ومطلوبك تم فأكل الأمعط وخويه وذهب ابوها واحضر المليك وعقد قرانها واركبها معهم وهكذا فعل أبو صالح رحمه الله ورفيقك الشمري يحتاج مثل هذا الموقف لكي يحصل على مطلوبه

هالله هالله

يبشر بسعده الشمري وباللي اقدر عليه
والله ما اذخر من جهدي شي وما تملك اليمنى
ولايكلف الله نفساً الا وسعها ,,,

ربي يسعدك ويحفظك يابو مشعل ومشكور على ايراد القصه
والامعط علم من اعلام عنزه ولنا فيه اسوةً حسنه
وليا قال يفعل واكيد لو الرجل اللي نخاه ما يستاهل ما مشى معه الامعط
وتحمل ما تحمل على شانه على الاقل مغثته
هكذا الرجال وهكذا الشيوخ وهكذا الرجال الطيبين اللي مثلك وشرواك يابو مشعل
تقبل خالص الموده والشكر والتقدير ...