وقال الشاعـر معزي بن طليان الخريصي العنزي هذا المقطع من قصيدة:
يحمل جـواب من ضميري معـنيـه *** للـوايـلي سـاس الفـخـر والشكالـه
مـع التحـيـة والسـلامـات نـهـديـه *** حيـث الـلي مثـلـه طيـبـات خصالـه
عبدالـله الـلي كـل مـا حـل طاريـه *** أفـخـر بـعـلـمـه يـوم يلـفي مجـالـه
وأطرب لقافـه يـوم نسمع معانيـه *** حـيـث أن قـافــه دايـم بـه جـزالــه
وقال الشاعر معزي بن طليان الخريصي :
يا راكـب مـن عـنـدنـا فـوق وانيـت *** دونـك جـواب مـن ضميري بديتـه
وده لأبـن عـبـار كـان أنـت مـديــت *** الـلي بفـعـل الطـايـلـه بـان صيتـه
وصـل سـلامـي للمعـنى إلـى جـيـت *** القـرم أبـو مشعـل أن كانك لقـيتـه
وقال الشاعـر عايد بن رغيان الشراري هذا المقطع من قصيدة طويله :
يـا نـاقـل المكتـوب مـني بـه أخبـار *** تعـطيـه مـن يـفهـم معـاني كلامـي
ملفـاك رجـل مـن صليبين الأشـوار *** يـهـاب فـزاتـه خـطـات الـغـلامــي
عبد الله المعروف مـن نسل عـبـار *** قـرم صميـدع مـثـل حـد الحسامـي
يتعـب عـلى العـليا وبالقـاف بيطار *** ويمسك على زمام الأدب بالبهامي
مـن لابـة يـوم المغـازي لهـا أدوار *** وايـل هـل الـردة نـهـار الـزحامـي
خلفت ربيعـة وصفهم مثل الأحـرار *** وأعـدادهـم مثـل الجـراد التهامـي
صلـفيـن فـي يـوم المـلاقـا إذا طـار *** ستـر البنات معـورجات الوشامـي
المـنـذريـة يـوم صـاحـت بـذي قـار *** جوهـا بـني شيبان فـزعة شمامي
راجوا عـلى الأعجـام بالسيف بتـّار *** اكفوفهم من جيش كسرى دوامي
منهـم أبـن مسعـود بالحـرب جبـار *** مثل الفحل وأن طب ركن الجهامي
اهـل الكـرم بربـاعهـم بـن وأبـهـار *** وصحون تندا من الدسم واليدامي
ومنهم مصوت بالعشا يوم الأسعار *** غـلـيـت بـديـرتهـم وقـل الطعـامـي
ربـيـع لـلـخـطــار والـعـز لـلـجـــار *** وأهـل الأمانـة يحفـظون الـذمامـي
الأمـر كـلـه جـاز لـي بـدع الأشعـار *** وبموجبـه نعـرف عـزيـز المقامي
عرفي بكم هو مقصدي مابها أنكار *** وأمثالـكم هـو غـايـتي والمـرامـي
يـنـوب عــنـي خـطـنــا جــاك زوار *** يـهـدي لـكـم تحـيـتـي وأحـتـرامـي
أحـلا مـن المسك الذي عند عطـار *** العـود من عطـر الرجال الحشامي
وقال الشيخ باتل بن نومان بن أديهم الحازمي هذا المقطع من قصيدة :
مرسل لنـا من الوايلي نسـل عـبـار *** الطيـب ساسه والردى ما انهقابـه
عـبـدالـلـه الـلي دوم للـكـود صبّـار *** حيثـه لفـعـل الطيـب يتعـب اركابـه
اللي لنسب ربعـه مؤسس ومفخـار *** يـفعـل جميـل وموقـفـه لا غـرابـه
ألـف لهـم تـاريخ فـي كـل الأقـطـار *** والـكـل منهـم يـفـتخـر فـي كـتـابـه
يزرع جمايـل في مقاييس وأعـيـار *** وعلم الفخر هـو مربحه والكسابه
والطيب يزرع بين صلبين الأشوار *** بيـن الرجـال الـلي اعـزازٍ جـنـابـه
يـنـمي نمـو الـزرع فـي مطلـع آذار *** ويجني حصيده كل من هو سعابه
ولا الردى من يزرعه يجـني العـار *** مـا فـيـه فـود الـلـه يعجـل ذهـابـه
والمـرجـلـة يـا القـرم تلقـا وتـنـدار *** عند الرجال الـلي تحسب احسابـه
الـلي بهـم نخـوة اليا صار ما صـار *** تلقـابهـم فـزعـة وسـرع الأجـابـه
جمع الشمل مطلوب ما بين الأخيار *** رخـم الجموع اللي عـدوك يهـابـه
والتفـرقـة تجـلـب مهونـة ومحـدار *** ينفـل جمعـك عـقـب تلـك الصلابـه
يمنى بلا يسرى ترى ما لها أشبـار *** ويسرى بلا يمنى صعـيب اكترابـه
والبيت بـلا عمدان مـا شيـد بأقفـار *** ولـولا رواق البيت يصبح خـرابـه
وقال الشاعر مقبل بن عقلا العنزي هذا المقطع من قصيدة :
عـنـاه مقـبـل لأبـن عـبـار بالـقـاف *** من اقصا الشمال خطوطنا ناصياته
من دون بيتـه ما ايتحيّر بالأوقـاف *** بحـي النـظـيـم إلـى تحـرك مـبـاتـه
إليا وصلت الوايلي ريف الأضياف *** عطـه الخطاب ورد الأبيـات هـاتـه
أبو مشعل كزيت لـه عـدة أضـراف *** ولا جـاء مـرد اخطوطنا من تلاتـه
ولنـا عليـه حقـوق أكبر من اذراف *** حيـث أبـو مشعـل يفتهـم واجباتـه
الشـاعـر الـلي للـقـوانـيـن عــّراف *** ومعـنـا المثـايـل يـفـتهـم لمعـنـاتـه
شاعـر بني وايل من الكاف للكـاف *** وأمـرشـحـيـنـه لـلـقـبـيـلـه ابـذاتـه
رشحـه أبـن حبيـب بعـيـد الأهـداف *** عـبـدالـلـه ابن تشيم أعـلـن ثبـاتـه
ما كن عـن واجب والأرياق نشـاف *** فعـل أبـو مشعل بان حـزت انداتـه
إلى سمع صوت الندا لو بـه اكلاف *** قـال أبـو مشعـل حاضـرٍ لأ طلباتـه
يـنـوب عـن كـل القبـيـلـة بميـقـاف *** ومـواقـفـه بالمـرجـلـة مـن بـداتـه
بالشعـر أبن عبـار هـو الـذي نـاف *** ولا الـردي مـا يعـرفـه الا خـواتــه
حيثه كما موج البحر زام الأطراف *** كـان اشهـلـنـه بالـهـوا عـاصفـاتـه
وقال الشاعر مقبل بن عقلا العنزيأيضاً من قصيدة :
ويا راكب اللي لا مشى بالغطاليس *** يـنـوز مـع الـهـاويــة دون دعـاس
يلفي على اللي ينشكاله حواسيس *** عـبـدالـلـه العـبـار لـعـداه مـدبـاس
يا شوق من تزهى جديد الملابيس *** تستاهلـه ولا الردي يزها الأفـلاس
لـك ربعـة فـيهـا النشامـا مجالـيس *** ما طبها شلات وأوباش وأخساس
مـن لابـة عـلى المعادي ضواريس *** عـدوهـم يقفي عـن الدار مـرواس
تقفي اعداهـم عن لقاهـم مراويس *** يلقون من جمع الفداعين الأنكـاس
عـدوانهـم ترجـع وتقـفي مفـاليس *** لو زارجمع أخصامهم كود ينحاس
حمـر النواظر محرقين المحاميس *** وأفعالهـم يالـوايـلي تـرفـع الـراس
هـداتهـم تشبه لعـنتـر وأبـن قـيس *** يـوم الشفايـا فـيها الأريـاق يـبـاس
وقال الشاعـر خالد بن حسين البقمي هذا المقطع من قصيدة :
وأسنـد عـلى اللي بالفعايل عطيبي *** يفـرق عـلى بـاع المناعـيـر بـاعـه
الـلي جـمع ثـنتيـن عـرف وطيـبـي *** والثـالـثـة قـاف يشـوقـك سمـاعـه
قـافـه الـيـا مـنـه نـطـق بـه تعـيـبي *** ما صار عـن معناه فيـه انهـزاعـه
مـن لابـة الفدعـان عـوق الحـريبي *** تاريخهـم حـاز الفخـر والشجاعـه
لا تـنـتـقـدنـي يـالـفـهـيـم اللبـيـبـي *** أرجـوك تـعـطـيـني كـلام الـوقـاعـه
وجهـت لك شكواي حيثـك صحيبي *** يا أبـن المعـنى مـن يراعيك راعـه
يا أبـن عـبـار أن كان ما تستجيبي *** ولا اعـتـبـرني مـغـلـط بـالـطبـاعـه
أنا عـلى غيرك فـلا أبـديت غـيـبي *** أخـذت عـن بـوح السرايـر منـاعـه
أحـب الـلي شـرواك رايـه صليـبي *** وإلـى نصحني قـلت سمع وطـاعـه
ولا الـردي لـو كـان مـني قـريـبـي *** أخـوي ولا لـي مـن أدنـا الجمـاعـه
إلـى نشـدني قـلـت لـه وش تبـيـبي *** عنكـم خذيت من التجـارب قـناعـه
قـد قـالـهـا مـرشـد لـزبـن العـتيبي *** المرجلـة مـا هـي بتصنع صناعـه
والسـر لا مـنـه مـن الـقـلـب جيـبي *** غنت بـه الأصوات في كـل أذاعـه
وقال مونس بن مفرح الشملاني هذا المقطع من قصيدة :
خـذ الـكـتـاب اوصـلـه لأبـن عــبـار *** من روس لابـة عـز اللي عزوتلـه
وإلى وصلـت الوايلي تلقـا الأخبـار *** حـيـث أن بـيــتـه كــل قــرم يـدلــه
الـبـن دايـر والـذبيحـة عـلى الـنـار *** عـوايـده ذبـح الـخـراف بـمـحـلـــه
صفـر الدلال مبهـرات عـلى اوجـار *** حيـث الكـرم والمـرجـلـة عـادتـلـه
تـثنـي عـلى فعـلـه مجالس وشعـّار *** القـرم اللي مجـد القـبيلـة فـطـنـلـه
ولا الغـبي مـا ينفعـه كـبـر الأعمـار *** سوالف اجـدوده مـا هـو عـارفلـه
هـذاك خـله وأتركه يا أبـن الأخيـار *** لا تـناقشـه يا نسـل الأجـواد خـلـه
وقال مونس بن مفرح العنزي أيضاً هذا المقطع من قصيدة :
واصـل مسيره والـولي ما يعيـقي *** عقب العصر تلقاه في هضبة طويق
وصل أبو مشعل بالسلام الـرقيـقي *** على الجواب مغلق الضرف تغليق
بالمجـلس الـلي للنشـامى يشيـقي *** والكـيـف جـاهـز بالـدلال الغـرانيـق
مـن لابـة الفدعان سـاسه عـريقي *** من دور وايـل والسنين السواحيق
والـلـي يـعـاديـهـم بـدمـه غـريـقـي *** وصديقهم نـال الرخـى والتـوافيـق
قال مبارك بن نومان المطوطح رحمه الله هذا المقطع من قصيدة :
نـرسـل كتـاب مـزرف لأبـن عـبـار *** فـيـه التحيـة والوفـاء وأحتـرامي
وجميع من ساهم بطبعات الأشعار *** وقاموا بنصح وساهموا بالنظامي
تـحـيــة مـنـي لـكـم سـر وأجـهــار *** وكـل الجماعـة خصهـم بالسلامي
سـلام أحـلا مـن همـاليـل الأمـطـار *** وألذ مـن شربه إلى صرت ظامـي
أولاد وايـل فـعـلـهـم مـابـها انـكـار ***هـذي سلـوم جدودهـم والعـمامـي
جـلابـة الأرواح بـالـمـوسـم الحـار *** أفـعـالهـم غـرب وشـرق وشـامي
اللابة اللي تحشم الضيـف والجـار *** وإلـى زبـنهــم لاجـي مـا يـظـامـي
مـاهـم خـفـيـيـن عـلـيـنـا بـالأذكـار *** واليـوم شفنـا رسومهم بالتمامـي
يا جعـل ميتهـم يزحزح عـن النـار *** والحـي منهـم فـي رفـيع المقامـي
وقال إبراهيم بن حرير بن فيحان العنزي هذا المقطع من قصيدة :
وأرفع سلامي وأعـتـزازي هـديـه *** ومهمـا احـيي فـيـه مـا هـو كفايـه
عـبـد الـلـه العبـار راعي الحـميـه *** الـلـه يـفـكـه مـن خـطر كـل سـايـه
وأقـبـل تـحـيـاتـي بـنـفـس نــقــيـه *** بـاول كلامـي وأوسطـه والنهـايـه
وقال الشاعر عاصي العامر المطرفي هذا المقطع من قصيدة :
يـمـد مـن رفـحـا حـلـول العـتيمـي *** ويلفي على قـرم العيال ابن عـبـار
يـذكـر تـرى بـيتـه بحـي النظيمـي *** وإلى وصلت الحي تنشد عن الدار
تـلـفـي لـقـرم بـالـلـوازم كـريــمـي *** يذبح لك الحايـل إلى جيـت مسيـار
وبـلـغ سـلامي للعـزيـز الحـشيمي *** عبـدالـلـه العبـار صليـب الأشـوار
وقال الشاعر عودة بن زله الصقري رحمه الله هذا المقطع من قصيدة :
وقضى لزومه وأصطفق لأبن عبار *** ملفا النشامـا اليـا كبـا كـل مكعـوم
قـبـل الـذبيحـة قـلـط الهيـل وأبهـار *** متعـلـم للـطيـب مـن غـيـر تعـلـوم
مـن لابـة بالكـون يهـدون الأعمـار *** يـوم العـزاوي واللقا تسمع الـروم
ويوم المغازي والفخر بـام شنكـار *** ويـوم الرقيبـة ملتوي عند مرجوم
وقال الشاعـر سعود بن عودة بن زلـه الصقري هذا المقطع من قصيدة :
يـم الـريـاض مـكـلـفـه لأبـن عـبـار *** عـبـدالـلـه الـلي فـايـزٍ بـالـشطـاره
مـن دون بيتـه لا تمّيـل عـن الـقـار *** وكـلـن يــدلـك كـان ضـيـعـت داره
مـا هـو خـفي كلـن يـدلـك بـتـذكـار *** مـتـبـيّـن ولا صـك بـاب الـعــمـاره
يالوايلي علمك مـع الجـاري المـار *** يا الـلي بـدرب الطيب زايـد وقـاره
يا اللي عـلى در الصعـيبـات صبّـار *** الـلـه يـفـكـك مـن عـذابــه ونــاره
وقال الشاعر محمد المحدى الغبيني هذا المقطع من قصيدة :
ومن بعد ذكرك قلت زين القـوافي *** وسجلـت مـن قيـلي كـلام سليمي
يهدى عـلى قـرم من الـربع وافـي *** عـبـدالـلـه العـبـار رجـل حشيمي
أديـب شـاعـر بالمـواقـف سنـافـي *** الـوايـلي بالـعـرف دايـم فـهـيـمي
قلـه يا أبو مشعل أشوف أختـلافي *** في هالـزمن عن الزمان القديمي
شفنا يا أبو مشعل بـه الحـر خافي *** كـمـا تـرى ذل الشجاع العـديـمي
وأشوف جو الناس ما هو بصافي *** شفنـا يا أبن عبـار بالجـو غـيمي
وأيضاً هذه الأبيات من قصيدة للشاعر محمد المحدى الغبيني :
قـم يا نديـبي فـوق ما يقـطع القـار *** فكسار لـونـه بـيـج يشـر انبيـره
يقـطع بعـيـدات الفيـافـي والأقـفـار *** ويحل في ممشاعه في كـل ديره
يلفي عـلى قـرم من الربع الأخيـار *** طاري جنابـه تفتخـر بـه عشيره
أبـي استشيرك يالسنافي بالأشوار *** ومن شاور الفهيم ريّـح ضميـره
وش حيلتك يا مسندي يا أبن عبار *** بـنـاس خفايـاهـا عـلينـا حقـيـره
قلي يا أبو مشعل ترى الوقت دوار *** ودنيا البشر رب الخلايق يديـره
وقال الشاعر خلف بن محدى الغبيني هذا المقطع من قصيدة :
أبـو مشعـل بالفـخـر ذرب العـيـالي *** بالوفاء والمجـد والطيـب معـروف
لابـتـه بالـكـون لا جـوا بحـتـمـالي *** خصمهم بالكون يمشي مـا يشـوف
لابـتـه بالكـون مـاضيـن الـفـعـالـي *** لا تـلاقــوا بـالـرمـاح وبـالسـيـوف
أهـل العشوى مثـل حيـد بالجبـالي *** مـاتهـزهز راسي بـوجه العصـوف
هـذا قـولي فـي كـريميـن السبالـي *** ربعـي الفـدعـان طـلقـيـن الكـفـوف
أمـدح الفـدعـان وافيـن الخصالي *** ريف من هو شاف من وقته حفوف
أمـدح الفـدعـان فـي جـور الليـالي *** الـخـوي والـجـار بـه دايـم تــروف
أمـدح الفدعـان لا صـار انـعـزالـي *** يـدحـرون الخصم وعيونـه تشوف
أمـدح الفـدعـان يـا جـالـي مجـالي *** ولا سألت عن الردي هو والهلوف
أمـدح الـفـدعـان فـي قـيـل طـرالي *** ومن زعـل من قولنا جعـله ذلـوف
وقال خلف المحدى هذه الأبيات رسالة جوال :
لا يـهـمـونـك قـريـبـيـن الـشـوابـح *** الـردي حـيـشـاك ذكـره مـا يـخـلــد
يا ابو مشعل خـل من دار المرابـح *** لا يـغـيـضـك خـايـن قـام ايـتـجـلـــد
لا تـسـمّـع لـلمـهـايـط والـمـطـابـح *** أنـت فـوق القـول والخـاسي تـبـلـد
جواب خلف المحدى رسالة جوال :
يـا رفـيع الشـان يـا ذرب الـفـعـايــل *** مـن يـدور الشـر جـعـل الـلـه يـلـده
أصعـد أصعـد للعـلا والـراس طـايـل *** بـرج مجـدك مـا قـدر حـاسـد يهـده
وحـنـا لـك أنصار يـا عـرب السلايل *** مـن يحـدك حـالـفـن والـلـه لا حـده
وقال خلف المحدى :
مكـانـتـك بـقـلـوبـنـا يـا أبـن عـبـار *** وإذا نـسـيـنـاك أنـت ربـي نـسـانــا
يا سيفنا المصقول بالموقف الحـار *** الـيـا احـتمـينـا فيـك نلقـى حـمـانـا
يا أبن المعنى قطعت عنك الأخـبـار *** وحـنـا قصرنـا بـواجـبك من ردانـا
وقال خلف المحدى
واصل يا ابو مشعل للأمجـاد واصـل *** وعليـك لا يشكل من الناس لـواص
أنت الرفيق اللي على الطيب حاصل *** ولا الردي في حزت الضيق حواص
وقال الشاعر محمد المحدى الغبيني أيضاً من قصيدة :
تنصى جناب اللي عـلومـه شهيـره *** عبـدالـلـه الـلي وافـيـات خصايـلـه
الـوايـلي مـن سـاس قـوم عـريـبـه *** مـن لابـةٍ بالطـيـب تـذكـر فعـايـلـه
ويـلان بـالـتـاريـخ كـلـن ذكـرهـــم *** ويخـبـرك بالـتـاريـخ واقـع دلايـلـه
ومن غيـر هـذا خصمهم ينطحونـه *** واللي غـزاهـم دوم توخذ رحايلـه
أشوف ناس يا أبـو مشعـل هـزيلـه *** تـغـيـرت عـاداتهـم فـي هـزايـلـــه
وقال فارس بن سطام الجميدي الركابي هذه الأبيات من قصيدة :
سر يا قـلم وأكتب لنا نظـم الأشعـار *** أكـتـب لأبـن عـبـار مـني سـلامـي
من لابة كـان اعتـلـوا قـب الأمهـار *** فـكـاكـة الطـابـور عـنـد الـزحامـي
ويـلان مـا فـيـهـم تـلاقـيـط شبشـار *** ومـعـربـيـن الخـال هـم والعمامـي
يـوم اللـقـا يسـمع بـهـم كـل مغـوار *** بأفعالهـم يـدري رضيع الفطـامـي
ويـلان مـن عدنـان وافيـن الأشبـار *** لـنـا الفخـر باذكارهـم كـل عـامـي