قال عبدالله بن دهيمش بن عبار هذه الأبيات اهداء للرجل الفاضل فرحان بن مزاوم الخمعلي أبو سالم من أهل السويدة في عسيلان بالقصيم :
عسى المطـر يسقي روابـي عسيلان *** سيلـه عـلى فـروع المسايـل تعـاوم
وعـلى السويدة هـل هملول الأمـزان *** غـب المطـر طـلع الـزبيـدي يـتـاوم
يـهــل ديــم بـديــرة الـقــرم فـرحـان *** الـنـادر الـلـي مـن سـلايــل مــزاوم
تـرتـع نيـاقـك فـي سمـاهيـد ريضان *** حـتـى يـا أبـو سـالـم ذراهـا تـزاوم
حيثـك نبيـل ولـك كرامـه ولـه شـان *** دايـم عـلـى فـعـل الـمـراجـل مـداوم
ربّـاك شايب يذبـح الحشو والضـان *** ما هـو مـن الـلي عن لزومه تـناوم
ساسـه معـرّب من حمايـل صميدان *** وربـعـه سطـام الضّـد يـوم المقـاوم
سموهـم ذيابـه عـلى الذيـب سرحان *** هـم والـذيـابـه بالوصايـف تسـاوم
خـماعلـة في حـزّت الكـون شجعـان *** لا صـار لـلـروّح العـزيـزة مـسـاوم
كل من غـزاهم عـاد خاسر وندمـان *** يـعـود فـي خـيـبـه وربـعــه تــلاوم
كـم عايـل لـفـوه فـي بيـض الأكفـان *** عـلـيـه عـكـفـان المخـالـب تـحـاوم
واليوم حاضـر عصرنا أمن وأيمـان *** من فضل الـلي خـلا القبايـل تخاوم