تابع
قال عبدالله بن دهيمش بن عبار العنزي هذه القصيدة بمناسبة مزاين الأبل في أم رقيبة لعام 1431هـ : 118
مبـداي بـالـلي يطـلبـه كـل مخـلـوق *** الواحـد الـمـعـبـود رب الـخـلـيـقـه
منشي المزون اللي لها رعود وبروق *** من مـوج لجّـات الـبحـور الغميقه
ذكر الـلـه البادي عـلى كل منطـوق *** وبعـده نظمت مـن البيوت الرقيقـه
الـلـه يـعـز الـلي يشجع هـل النـوق *** بـدابـهـا فـكـره وصـارت حـقـيـقــه
مشعل يعله ما يرى الباس والعـوق *** عضيد أبـو متـعـب اسنـاده شقيقـه
نسل الزعيم الـلي صعـد للعلا فـوق *** عبدالعـزيـز الـلي أعـمـالـه وثـيقـه
البـاسـل الـلي ياخـذ الحـق مطبـوق *** ويشب بـقـلـوب الأعـادي حـريـقـه
الدار سطع نورها وأشرق اشـروق *** رجّـع لـهـا أمجـاد الجـدود العتيقـه
ساد الجزيرة وأرتـدع كـل مطفـوق *** ومـن بـان شـره عـن نـويـه يعيقـه
يـوم القبايل بـيـن سارق ومسروق *** كـيـد ونـكـد والكـل يـنصـر فـريـقـه
كف الغزو والسلب والغـدر والبوق *** وخـلا الـعـشايـر بالمفـالـي طليـقـه
عـلى العدو علقم من المر مسحوق *** يصعب عـلى مـن عانده بلع ريـقـه
وللصاحب أحلامن حلا الشهد بالذوق *** وألـذ مـن ذوب العسل فـي رحيقـه
المقرني ما هو على المجد مسبوق *** عـدل المنـاهـج والسياسـه عميقـه
لـه بالعـدل منهج ومسلك وطاروق *** جاهـد وكاد اعـداه وأفـرح صديقـه
ساوى الـرعية ماوضع بينها فـروق *** وأنقـذ شعوب فـي جهلهـا غريقـه
وحظي بمركز يرفع الراس مرموق *** وأنـجب صوارم سايـرين بطـريقـه
من ساس لابـة مرويت كل مذلـوق *** والسيـف بالمـيـدان يـلـمع بـريـقـه
نطيحهـم دمـه مـن الطعـن مـدفـوق *** تـشهـد لـهـم سرج الجـياد السبيقه
نسل الملوك اللي بوايل لها عموق *** صفوة حمـايـل والمناسب عـريـقـه
وأثني على شبل له الطيب مرفـوق *** الـوافـي الـلي مـا يـبـور بـرفـيـقــه
مشعل وضع للبل مواجيب واحقوق *** نـفسه عـلى عـز المواطـن شفيقـه
النوق بجهود أبـو فيصل لها سـوق *** يـزداد سـوم اسـعـارهـا بالـدقـيقـه
يا مكثر اللي من العرب حده الشوق *** للبـل ولـكـن سـعـرهـا مـا يـطـيقـه
البل ركاب اجدودنـا تركهـا اعقـوق *** هـي الضعـن في كل شـدة وضيقـه
تنقـل من احمول الثقـل كـل معلـوق *** وتقطع سماهيـد الـديـار السحيـقـه
تفلا المفالي في صحاصيح وعروق *** وتـبـرالهـا سـرد المهـار الـرشيقه
بأرض القفر تقطف نواوير زملوق *** في روضـة تشبـه مـروج الحديقـه
فـيهـا مغـاتيـر تـقـل لـون غـرنـوق *** وفـيـهـا مجـاهـيـم الـمـولـع تشيقـه
وصلوا عدد ما تنظر العين بالموق *** عـلى الرسول اللي صدح بالحقيقـه
قال عبدالله بن دهيمش بن عبار هذه القصيدة في حفل بمناسبة مزاين الأبل لعام 1431هـ : 119
سجلت منظومي مـن الفكـر يملـيـه *** والهرج مـا يلفظ على غيـر معنـاه
قـال الـذي بــدأ أيـتـضـّرع لـبـاريـه *** أن المـلـك الـلـه يحفـظـه ويـرعـاه
جميع شعـب المملكة يـرفـع ايـديـه *** يخشع ويطلب والي الكـون مـولاه
يدعي لأبو متعب عسى الله يعافيـه *** وعسى الولي من كل عاثور ياقـاه
حـاكـم وطـنـا الـلي نـعـزه ونغـلـيـه *** العـاهـل المحبـوب بالـروح نـفـداه
نـعـتـز بـافـعـالـه ونـفخـر بطـاريـه *** حـكـم شعـوب المملـكـة بالمسـاواه
شهم وكريم وخالـق الخلق مهديـه *** عـدل وحليم الله عـلى الحق يـقـداه
مهـمـا حسبـنـا مـا نـعـدد حسانـيـه *** عـم الـبـلاد بـمـد جـوده وحـسنــاه
نطلب عسى الله مالك الملك ينجيـه *** يلطف به الرحمن وايـزيـل شكـواه
وسلطان سلطان السعد نعتزي فيه *** عضيد أبـو متعـب سنـاده ومـركاه
ولـي عـهـد المملكـة ريـف ناصيـه *** ذخـر المواطن والوطن لا عـدمناه
نطلب من المولى عسى الله ايقويه *** والحمد لـلـه عـاد يـوم الـلـه اشفاه
بالجود ينـدر بالعـرب مـن يضاهيه *** كـم من فقير أغناه يوم اللـه أغناه
رب الملأ من حسن الأخلاق معطيه *** يضحك حجاجـه ما يغـظلم محيّـاه
لـو نمدحـه ماظـني المـدح يـوفـيـه *** فعـلـه تعـدى المـدح مهما مدحنـاه
وسلمان أبو فهـد عسى الله يـبـقيـه *** نـور الـبـلاد الـكـل يـفـرح بـلقـيـاه
عـاد الزعيم وعاصمة نجـد ترجيـه *** والكـل يـرجـي عـودتـه وايـتـمنـاه
سلـمـان تسـمي للفضـايـل مـبـاديـه *** المكـرم الـلي تـبـذل الجـود يمـنـاه
وأثـني على اللي سلم الأجداد يحييه *** ثبّت قواعد ماضي السلم وأرساه
عـاش الأمير اللي يفاخـر بمـاضيـه *** عهـد المؤسس بالفخر عاد ذكراه
مشعل عـلى درب الفضيله مماشيـه *** رمز الشهامة عـالي القدر والجاه
نسل الـزعيـم الـلي عـريبـه مجانيه *** نال الفخـر والمجد أصله ومـربـاه
مشعل عـطأ مـن يقتـني ذود توجيـه *** الباسل الـلي بالفخر طـاب مسعاه
من أجـل شعبـه نـادر الـذود يقـنيـه *** سن المزايـن والـولي سدد اخطاه
والـيـوم جـيـنـا لـلـقـرابـه أنـهـنـيـه *** أبــو فـهـد هـزاع نـفـخـر بـشرواه
رفـيـقـنـا الـلي لـه عـليـنـا مشاريـه *** الـيـا بـدت لـه لازمـه مـا نـسيـنـاه
قـرم العـيـال الـلي بـعـيـده هقـاويـه *** يلقـا الحفـاوة والكرم كـل من جـاه
الـلي بمـالـه نـقـوة النـوق يـشريـه *** كنـز الذهـب بالمشترى مـا تـغـالاه
وضـحً لميـع أوبـارهـا كـنهـا جنيـه *** مالوم من يرخصبها حوش مخباه
مـنـقـيـتـه مـالـه حـلايـا وتـشـابـيـه *** الا الـوضيحي بالوصايف حـلايـاه
الـلـه مـن عـيـون الحواسيد يحميـه *** وعسى ينال الفوز وقـت المبـاراه
قال عبدالله بن دهيمش بن عبار العنزي هذه الأبيات بمناسبة تخرج دفعة من طلبة الكليّة الحربية من أبناء قبيلة عنزة : 120
يالشباب الـلي نـدور الـعـز مـنـكـم *** نطلب المولى على الخير ايهداكـم
والديكـم ما ذخروا مجهود عـنكـم *** بالقـلـوب الحـانيـة يرسخ غـلاكـم
الكسـل دون المعـالي مـا هـدنـكـم *** عسى ربـي مـا يخيّـب من رجاكـم
من نجبكم للقبـول الـلي امـتحنكـم *** ظنـتي لـولا التفـوّق مـا انـتـقـاكـم
التعـب دون المعـالي مـا شحنـكـم *** والصبـر والجـد يـرفـع مستـواكـم
اجهـدوا بالدين واخلصوا لوطنكم *** واجـعـلـوا لـملـوكـكـم دايـم ولاكـم
عـزكم صقـر الجزيـره مـا مهنكـم *** خيـر جنـد المخلصين لخيـر حاكـم
داركم الأم الحنون الـلي اتحضنكم *** عـن هجير الشوب والبرد تحماكم
الـفخـر شريان يجـري فـي بـدنكـم *** والوطـن دونـه تضحون بـدماكـم
طيبكم منسوب من طيـب معـدنكـم *** ومجدكم يمتـد مـن مجـد زعماكـم
يا رصيد ويا ذخيـرة مـن خـزنكـم *** تحـملـون الـلي عـلى متنـه تـراكم
فعلكم يـفـرح ضميـر الـلي بخنكـم *** ارتـقـوا للمجـد يـوم الـلـه عطاكـم
مقصد الطولات غيره مـا شطنكـم *** وعـن دواليل الـردى تكـرم لحاكـم
* هذه القصيدة بصاحب السمو الملكي الأمير أحمد بن عبد العزيزآل سعود
وزير الداخلية حفظه الله ورعاه شعر عبدالله بن دهيمش بن عبار : 121
مـبـداي بـالـرحـمـن رب الأنـامـــي *** منشي المطـر من مدلهـم الغـمامـه
بسـم الـولـي مـولاي مطلع كـلامـي *** ذكـر الـكـريـم بـمـبـتــداه وخـتـامـه
ومـن بعـد ذكـر الـله أوجـه سلامـي *** يـهـدى لعنوان الشرف والشهامـة
أحمـد رفيـع الجـاه عـالـي المقـامي *** مـواقــفـه تـفـرض علينا احترامـه
نعـتـز بسـمـه يــوم تـطـرا الأسامي *** حـيـثه بـذل لـلطيـب جـل اهتمـامـه
بـالمرجلـة يحمـل رفيـع الـوسـامـي *** والشاهـد اللـه ما تطـولـه ملامـــة
مـن نبـع كفـه هاشـل الجـود طـامي *** يـمنـاه ينبـوع الصخى والكـرامــة
كفـه كـمـا الهـداج يـروي الظـوامـي *** هـداج تيماء اللي غزيرة جمامــه
أحـمـد ولـد عبـد العـزيـز الأمــامــي *** نسـل الزعيـم اللي يقـود الجهامـة
حـرر بـلاده فـي رهـيـف الحسـامـي *** البـاسـل الـلي لـلـرجـاجيـل هـامـه
حيـثـه عـلى نـص الشريعـه يحامـي *** دستـور شـرع الله يـطبـق نظـامـه
زبـن المجنـى بـاللـقـاء والــزحامـي *** مـلاذ مـن خـانــه زمـانـه وضامـه
مــن لابــة دخـيـلـهـم مـا يـظــامـــي *** عـن الطلـب كنـه بـراس العدامــه
أولاد مـقـرن مـن مـواكـر قـطــامـي *** مـخـالـبـه تـفــرا ظـلـيـم الـنعــامـة
عـاداتهـم بـالكـون خـوض الكتـامي *** إلـى جـاء نهار مثل يوم الرغامـة
ضـد العـنيـد اللي عـن الحـق عـامي *** والـلي يعـاف العافية هـم كعــامـه
هـل السيـوف الـلي تـقـص العظـامي *** عــدوهــم مـا نـال غـايـة مـرامـه
اشــم مـن شـم الـحـيـود الـزوامــــي *** واعـز وارفع مـن شوامخ تهامـه
يـا اللـه تبـقـيـهــم عــلـيـنـا دوامـــي *** وتـنعـم عليهـم بالهناء والسلامـة
وصـلاة رب البـيـت مسـك الخـتـامـي *** على شفيع الخلـق يــوم القـيامـه
هذه الأبيات تهنئة بتعيين صاحب السمو الملكي الأمير أحمد بن عبدالعزيز
آل سعود وزير الداخلية حفظه الله شعر عبدالله بن دهيمش بن عبار: 122
قـال الـذي بالقيـل هـاضت اشعـوره *** يفخـر بمدح الوايلي ذرب الأفـعـال
أحـمـد ولـد عبـدالعزيـز اخـو نـوره *** زبن الدخيل اللى حداه اشهب الـّلال
مـن صـغـر سـنـه وافيـات اشبـوره *** الليـث محـمود الشمـايـل والأخصال
فـعـايـلـه عــنـد الـرجـال مـخـبـوره *** الـبـاسـل الـلـي لـلصعـيـبـات حــّلال
زبـن الـدخيل الـلى حدتـه الضروره *** عوق الخصيم وباللقا ضد من عـال
أحمـد صليب الشور يا صلب شوره *** المقرني منجوب مـن بطـل الأبطال
مـبـروك يـا نـمـرٍ سـلايـل انـمــوره *** يالنـادر الـلي مـن شغاميـم الأشبال
مبروك يا حرز الوطن وأنت سوره *** صنت الحمى عن كل غـادر ودجّـال
الـمنـصـب الـعـالـي تـعـلّيـت كــوره *** منصب فخـر يزهاك يا طيّـب الـفـال
ضـد العنيـد وضد مـن بـه خطـوره *** تقضي على الأشراروخباث الأعمال
صارم ومن بـه شر تقطع اشروره *** وأنـت الخلـف والأمـن باقي ولا زال
وهذه القصيدة في مدح صاحب السمو الملكي الأمير الوليد بم طلال بن عبدالعزيز
آل سعود شعر عبدالله بن دهيمش بن عبار العنزي: 123
بسـم رب الـكـون خـّلاق الـعـبـيـــد *** الـولي مـولا الـبـشـر عــزالـجــلال
وبـعـد ذكـر الـلـه سجـلـت النـشيـد *** مـن قـراح الـقـاف والعـذب الـزلال
الشعـر يـفـخـر بـتـمجـيـد الـولـيــد *** نـفـخـر بـمـدحـه الـيـا جالـه مجـال
الـولـيـد الـكـل بـافـعــالـه يـشـيــــد *** حيـث مـدحـه واقعي ما هـو خـيـال
تعجـز الأبـيـات وحـروف القـصيـد *** بالـوصايـف مـا يـوصـفـه الـمـقـال
زاكـي الـجـديـن مـا مـجـده جـديــد *** مـن قـديـمـات الـعـهــود ولا يــزال
جـده الـلـي شـيّـد الـمـجـد الـتـلـيّـد *** الـزعـيـم الـفــذ والـوالـد طـــــــلال
الـعـمـام مـلـوك نـجـد قـروم صـيـد *** والخـوال الصـّلح يـا نـعـم الخـوال
عـزوتـه عـنـد اللقـا ضـد الضـديـد *** يـقـهـرون الضـد في يـوم الـنضـال
هـم هـل التـوحيـد والحـكم الرشيـد *** لابـة آل سـعــود ذربـيـن الـفـعـــال
ابـو خـالـد صاحـب الـراي السديـد *** بالـكـرم معـروف واعـمالـه اجـزال
الـكـرم يـشـهـد لأبـو خـالـد شهـيـد *** بـاذل الإحسـان محـمـود الخـصـال
شـام لـلـعـلـيـا وحـقــق مـا يــريــد *** للـفـخـر والـمـجـد والـطـولات نـال
مـن يفـوز بحـظـوتـه حظـه سعـيـد *** تـمـتـنـي قـربـه صـنـاديـد الـرجـّال
نـادي الـكـفـيـن يـزهـاه الـحـمـيـــد *** غـيـر حـاتـم بالصخى مـالـه امثـال
عضيد الـلي بالعـرب مالـه عضيـد *** ريـف مـن ينصاه كـان الوقـت مـال
مـرفـد العـاني عسى عمـره مـديـد *** مـزبـن الـلي مـن شنيع الـديـن ذال
يقصدونـه مـن قـريـب ومـن بعـيـد *** مـن جنـوب المملكـة حـتى الشمال
الـهـواشــل كـنـهــا بـأيــام عــيـــد *** يـعـلم الـلـه مجـلسه تـقـل احـتـفـال
الأرامـل مـن نـوالـه تـسـتـفـيــــــد *** وصاحـب العـاهـه ويـتمـان العـيـال
كـم فـقـيـرٍ جـاه مـلهـوف وجـهـيـد *** يشكي الفـاقـه وفـي جسمـه هـزال
زال فـقـره وأنقـلـب عـيشه رغـيـد *** جـاد لـه واغـنـاه عـن ذل الـسـوال
مـا قـبـض كـفـه ولا مـد الـزهـيــد *** ولا شـكى ضيفه صدود ولا اهـمـال
دوم يـبـذل بـالـمـقـام وبـالـشـديــد *** جـود كـفـه قـال لـلـمـحـوج تـعـّـــال
جـود كـفـه مـثـل مـزنٍ لـه رعــيـد *** يـسقي الـقـاع المحيـلـة كـان سـال
ينفـق وخـيـره بـحـمـد الـلـه يـزيـد *** مـن فـضل مـولاه والرزق الحـلال
يـدري أن الـمـال صـيـوره يـبـيـــد *** والـثـنـا يـبـقـا ولـو طـال الـمـطــال
مـا بـذل من مـال حـطه لـه رصيـد *** هـو رصـيـده يـوم تـوزيـن العـمـال
هـو الـلي يـاقـاه فـي يـوم الوعـيـد *** مـن الجحيـم الـلي تـوقـد باشـتعـال
قـلتهـا والـوصف مـاني لـه اجـيـد *** والسموحة كـان فـي قـولي خـمـال
هذه القصيدة مهداه إلى صاحب السمو الملكي الأمير الوليد بن طلال بن
عبدالعزيز آل سعود حفظه الله ورعاه شعر وايل بن عبدالله العبار : 124
قـال الـذي عـذب القـوافي جهـربـه *** مـبـداه بـالـلي كـل مسلـم سـجـدلـه
الشعـر جـال بخـاطـري وافتـكـربـه *** أبـي أمدح الـلي كل شاعـر قصدلـه
من شاد في مـدح الوليـد افتخـربـه *** حـيثـه لبس مـن حلـة الجـود بدلـه
صيتـه تـبـيـّن بـالـكـرم واشتهـربـه *** بـحـر الصخى بالجود كلـن شهدلـه
يزبـن عـلـيـه الـلي زمانـه غـدربـه *** شـاف الغـثا من جور وقتـه حفدلـه
مـن قـارب الصنديـد يفخـر بـقـربـه *** ومـن رافـقـه يـزول هـمـه ويـدلــه
كـم واحـدٍ يشكي ضروفـه شعـربـه *** عـزه وخـلا مـطـلـبـه يـنـوجـدلــــه
وياما فرج في بـذل الأموال كـربـه *** ويـاما عمل مشروع خيري رصدله
عـلى الفـضيلـه سـّهـل الـلـه دربـه *** رام العـلا وصرح المعالي صعـدلـه
متـفـّوق بـكـل امـتـحـان اخـتبـربـه *** حـاز المـدالي والنـجـاح اجتهـدلـه
فضله شمل كل الوطن و انتشربـه *** مـا خص موطن دون غـيـره فردلـه
الطيـب ابـو خـالـد شـراه وتجـربـه *** مشى عـلى درب الفخـر واعتمدلـه
قـرار جـوده مـا يـعـيـد الـنـظـر بـه *** واصـل بـذل واكـبـر دليـل استندلـه
حـرٍ يـشبـب بـالهـدد مـن صـقـربـه *** الـيـا هـوى جـزل الحباري هـبـدلـه
جـده حكـم شرق الجزيـره وغـربـه *** سـاد الـبـلاد وعـم شـعـبـه بـعـدلـه
قـضـى عـلـى قـوة عـّدوه بـضـربـه *** ومـن يعتـدي كال الكـدر والنكـدلـه
اعلن على من خالف الدين حـربــه *** حـتى رسى حـكـمـه ودان البـلـدلـه
يا مـا عـلى جـمع العـدا قـاد سربـه *** الـبـاسـل الـلي كـل بـاسـل هـجـدلـه
مـا جـامـل الـلي بالخيـانـه نـكـربـه *** والـلـي نـوى لمحـاربـه مـا قـعـدلـه
يأتيـه في وضح اللنقـا مـا غـدربـه *** جـاه وعـلى سـرج السبـايـا لكـدلـه
سار الزعيم الفـذ مـن شرق وربـه *** ورب المـلأ رايـات نصـره عـقـدلـه
سافـر وعـاد لـديرتـه عقب غـربـه *** وكـل الـديـار مـن الفـرح تـرتعـدلـه
واعفا عن العايل عقب ما ضفربـه *** عـاهـد وحالـف كـل مخلص وفـدلـه
وياكم ليل من أجل شعبـه سهـربـه *** الـهـون عـافـه والكسـل مـا رقـدلـه
يتبع