مرثية شالح بن هدلان

امس الضحى عديت روس الطويلات
وهيضت في راس الحجامه طرالي

وتسابقن دموع عيني غزيرات
وصفقت بالكف اليمين الشمالي

وجريت من خافي المعاليق ونات
والقلب من بين الصناديق جالي

واخوي ياللي يم قاره خفا فات
من عاد من عقبه بيستر خمالي

ليته كفاني سو بقعه ولا مات
وانا كفيته سو قبر هيالي

وليته مع الحيّين راعي الجميلات
وانا فداله من غبون الليالي

واخوي ياللي يوم الأخوان فلات
من خلقته ما قال : ذالك وذالي

تبكيه هجن تالي الليل عجلات
ترقب وعدها يوم غاب الهلالي

وتبكي على شوقه بني عفيفات
من عقب فقده حرمن الدلالي

عوق العديم ان جا نهار المثارات
والخيل من حسه يجيهن جفالي

قاره خفا :اسم المكان اللي مات فيه فديع
راس الحجامه : اسم المكان اللي صعده شالح
العديم : الشجاع
جالي : يعني مال واضطرب
هيضت : يعني حزنت
المعاليق: القلب والاحشا الداخليه