وقال عبدالله بن دهيمش بن عبار هذا المقطع من قصيدة : 180
صرحت لـك يالقـرم بالتيـه والبيـه *** والـلـي رئـيـتــه كـل مـنـا رئاهـــا
اللي من أول ما تزن شلن واجنيه *** الـيـوم نجـامـلـهـا نـدور رضـاهـا
كـم واحـدٍ وقـت اللزم مثـل أناثيـه *** لـو كان توخـذ حصتـه مـا حماهـا
واليـوم يـزمـر وأيتهـدد بـنـيخـيـه *** مغـرور وايحسب العبـاد ابغـبـاهـا
كـن الخلايق عايشـه مـن صيانيـه *** يتـلي رغـب نـفسه ويتبع هـواهـا
عـنـد المـدامـة كنـه الذيـخ تشليـه *** مـجتهـد بـخـدمـتهـا وكنـه فـتـاهـا
والمشكلـة من عايلـه يـوم اسميـه *** نسل الرجال اللي تشرف اسماهـا
منسـوب لـلي فعـلـهـم مـا يسـويـه *** وفعايلـه بالخـزي ما احـدٍ سداهـا
هلباج وأن شاف العصامي يناحيه *** وينـدب رمـوس باليـة فـي ثراهـا
فيه الحسد والحقد وإبليس مطغيه *** وكـل الرذايـل والمخـازي جنـاهـا
واليـوم كـلن واقـع النـاس تشكيـه *** مـا ينفـرق عـقالها مـن أسفهاهـا
وقال عبدالله بن دهيمش بن عبار هذا المقطع من قصيدة : 181
وضحت له عذري ولا قـلت تدليس *** حـيثـه عـنـالي مـن بعـيـد المكاني
أنقـل حمـولي بالكـواهـل كـوابيـس *** حملي ثقيل وكل ما انهض رمانـي
يـحـلـهـا جـالـي ظـلام الـحـنـاديـس *** رب الـمـلأ عـلام سـبـع الـمـثـانـي
يابن شريدة صار وضعي حماليس *** ومن لاقدرت اقضي لزومه شناني
مـن بان علمه غربلوه العـواسيس *** والصيـت مـا بيـن الخلايـق بلانـي
العـيلم الهـداج ينضب إلـى عـيـس *** لـو كـان جـمـه مـنـبعـه ريهجـانـي
التجرة اللي ما تجيب أجرة أدريس *** خـلهـا تـولي مـا بهـا صلح شانـي
صـارت عـليه كنهـا لقطت اغـليس *** أسـمـه كبـيـر ولا تـفـيـد الـعـوانـي
لو كنت تاجـر كان أصيّف اباريـس *** مـن فـوق بـنـز وبـالعـلـيـا مكـانـي
ماني تحت ضلع شنيع التضاريـس *** بالموقـع الـلي مسكنـه مـا هنـانـي
وقال عبدالله بن دهيمش بن عبار هذا المقطع من قصيدة : 182
والعافية مـن فضـل ربـك صفيطـه *** هيهات مـا يسبـق عـليها العبيطـي
وأفطن ترى دنياك مثـل الخطيطـه *** تذبـل إلـى جاهـا سمـوم وقحيطي
دنيـاك مـابـه يـالسنـافـي غـبـيطـه *** لـو سـانعـت لازم يـميـل الغـبيطـي
أن ضحكـت دنيـاك هـمـك تـميطـه *** وأن عنكضت خـلتـك دايـم تعـيطي
كـم مـن خليط تبعـده عـن خـليطـه *** مالت على اللي خيلهم له عطيطي
وقال عبدالله بن دهيمش بن عبار هذا المقطع من قصيدة : 183
أعتـز باللي بدرب الأجواد ينساق *** اللي على منهج طريق الفخر سار
ولا الردي ودك عنه بعـد وافـراق *** تـحـول مـن دونـه ملايين الأمتـار
كـب الـردي عسى تعشاه الأطلاق *** الخايـب الهلباج مقصوف الأعمار
اللاش جعل اللاش في ناب زراق *** ثعبـان نـفـد وشوكتـه تقـل شنكـار
اللي من ثياب الخـزا لبسه اشقاق *** مـا ينفع العـانـي ولا يكـرم الجـار
اللاش لو يصعـد طويلات الأطباق *** مهمـا أرتفـع لا بـد ينـزل بمحـدار
الحر مسكانه عـلى راس شوهاق *** طيـر السعد بالحيد دايم لـه أوكـار
والبوم دوم بطامن الجـرف نغـاق *** ما ظنتي صـاد السمينه ولـو طـار
يا مسندي قـلبي جزوع ومحـراق *** اكـره قبال وقـرب عميان الأبصار
السافـل الـلي كن قـلبـه بـه افتـاق *** نـذل ورزيـل وملسنه تقـل منشـار
حيث الردي لو كان تسقيه تريـاق *** لا بـد مـا يسقيـك حنظـل وجنـزار
ينسا الجمايل لعن أبوهك الأشداق *** ومن ينكر المعروف خاين وغدار
أقـولـهـا ولا هـمـنـي كــل هـــلاق *** الخـايـب الـلـي بالـدياويـن ثـرثـار
وقال عبدالله بن دهيمش بن عبار هذا المقطع من قصيدة : 184
ومن عال له بالشرع رادع ونهـام *** وكثـر المجادل فيـه عيب وفشيلـه
حنا عن هروج الردى نحجم حجام *** ونشوم عـن نبش العـلوم الرذيلـه
والجابه الـلي قـلتها ما لهـا أحكـام *** والنـاس تـدري بالعـلـوم السميلـه
تشكي ولا أنت من الأجابات منظام *** ولا قـلت عـيـب بـلابتـك والقبيلـه
أنشد سـراة أفـراد ربعـك والأعـلام *** عن جابتي يا شوق ناقض جديله
أمـثـال مـا فـيهـا عـلامـة أستفهـام *** لـو تنشـد الـلي يفهمون اتحـليـلـه
هذا المثـل موجود من دور بسطام *** أمـثـال تـورد بـالـقـوافـي مـثـيـلـه
منطـوقـنا يا مسندي مـا بـه ادغـام *** ولا بـه عـلى جهينـه لك الله ميلـه
وقال عبدالله بن دهيمش بن عبار هذا المقطع من قصيدة : 185
أن كان عـني هـرج يالقـرم منقـول *** الشـاهـد الـلـه بالمثـل مـا هـزبتـه
يقـول لـه عـنـدي رسالة لهـا حـول *** والخـط مـا والـلـه بكـفي قـضبتـه
الحـمـد للمـولى عـن الكبـر مكفـول *** والـلي يـناديني بـصوتـه أجـبـتـه
ولا بيننـا يـذكـر حـزازات وأزعـول *** كـود المثـل من بد غيري ضربته
ولاني كما تذكر مثل حضرة اشكول *** هـات الـدلـيـل وأي حـق سـلـبتـه
هــذاك يـهــودي وكـافـر ومـخـذول *** لا شك أنا مسلم ولا صمت سبتـه
وأن كانـني كـزيت للشـيخ مرسـول *** صياح شيخك وأن أمر ما عقبتـه
صياح شيخ ومن مشايخ لها فعـول *** مسبوك مـن جوهـر نقيـه ذهبتـه
واللي نصى صياح بالعذر مشمـول *** ومثلك فخـر شيخك يطول أرقبتـه
هو مقدم الجهنان بالعرض والطول *** نسـل الغـنيم خيـار قـومك نجبتـه
وقال عبدالله بن دهيمش بن عبار هذا المقطع من قصيدة : 186
أن كان عندك يا فتى الجود سيدان *** ومعـك رفيق وفيـه عندك خـزينـه
تصل مرامك ما أنت يالقرم زملان *** وتزيـل عن فكرك هجوس الغبينـه
وعـزي لحالك كان مالجيب مليـان *** ومـن لا لـديـه نقـود ربـه عـوينـه
أفطن لقول عبيد في قـدم الأزمـان *** تـمعـن بـمعــنـاه وأعـرف يـقـيـنـه
أخوك ما يسقيك لا صرت عطشان *** لا صار ما شرب الفتى من يمينـه