قال عبدالله بن دهيمش بن عبّار هذه القصيدة من شعر التصدي للحمله المغرضه : 6
يا الـلـه يـارب العبـاد أكـفـني شـر *** شـر العيـول الـلي بـلاني بشّـره
يارب يـا مخـرج مـن المشة الـّدر *** أنـك تجـازي مـن يـدور المضّره
جعل كفـر خطو التريله اليـا صـر *** يـدهـك عـظامه مـا تجمّع اكسّره
يصبح طعـام لجايع الـدود والـذر *** فـتيت جسمه مثـل رمـل الصفّـره
نفـرح بمصرع كـل ظالـم الياخـر *** مصيـر مـن حـاك المكـايـد تحـرّه
الظـالـم الـلـي بالـديـاويـن يـفـتّـر *** واليـا وجـد عـامي بصيـره يفـرّه
يخـدع ردي الشان بالفـر والـكـر *** يـقـدح ومن يسمع كـلامه يغّـره
الظـالـم الـلي بالخطأ للسبب جـر *** والـرمـل بـعيـون الـمغـفّـل يـذرّه
ينقـل نـمايـم بالمجـالس اليـا مـر *** ويغـتابـني فـي كـل مجلس يمـرّه
عنده خداع ولـه مـلاويـذ وازبـر *** ومن قـام مقـفي بالعـلابـي يـتّـره
لو كان قرقر بالمجالس ولـو قـر *** مـا شلت من دعـواه مثـقـال ذرّه
الهرج اللي مالـه براهين ماضـر *** والكـذب يملـه صاحبـه مـا يسرّه
شيطان نفسه بالغـوى زرهـا زر *** يجـمخ وصـوتـه بالتشّدق يـجـرّه
كنّه ملك عـلى المحيطات والـبـر *** يمـدح جنابـه والـردى هـو مقـّره
خلا شمل ربعه حزوبات وأخبـر *** ونـار التشاحن بـيـن ربـعـه يـوره
ياعل ما فعله مثل حضرة اعـمـر *** عـــز الأقـراب وقـالـوا الـلـه درّه
المرجلـه ما هي تماثيل وأصـور *** ولاهـي ملامح زيـن منظر وغـرّه
الطيب من دونه عراقيل واحفـر *** واتـلاع فـي دربـه وضلعـان حّـره
الطيب تقليط الموايد على اسفـر *** مـا نـالـه الـلي دوم كيسـه يصـّره
والتبع يبقى تبع لو مصقره حـر *** والهلب ما حـاز السبق لـو تـبـرّه
قال عبدالله بن دهيمش بن عبار العنزي هذه القصيدة يسند على الشيخ زيد بن عليق الرويضان رحمه الله : 7
يا زيـد قـلبـي مـا هجـع ربـع يـومـه *** مـن غـب هاجوس الروابع يهومـي
والعيـن مـن حلـو المنـام امحرومـه *** كـن الحـمـاط بمـوقهـا والـهـزومـي
يـا لـيـت عـيـني لـو تهـنـت بـنـومـه *** عسانـي ادلـه مـع خـيال الحـلـومـي
غـديـت مـثـل الـلي مضيـّع يـمـومـه *** تـاه الطـريـق بـداجـي الليـل يـومـي
الـلي سـرى بـعـتمـه تـلبـد غـيـومـه *** اظـلـم سمـاه ولا يشـوف النجـومـي
ســراي لـيــل وكـل ديــره يـهــومـه *** بـيـن التـلاع الموحشه و الحـزومي
بأرض خـلا يلفح هـواجـر سمـومـه *** في صلف موجـات الهبايـب يعـومي
الـداب يصـفـر فـي مـنـافـذ خـرومـه *** والـذيـب يقـنـب والقشاعـم تحـومي
مع جـرهـد البيـداء تحـفـت اقـدومـه *** خـارت قــواه ومــر كـبـده يـزومـي
والـلي مشى حفـيان لـو فـيه زومـه *** مـا ايبـاري الخيال فـوق القحـومـي
يا زيـد يـامـن بـك شهامـه وشـومـه *** مـا تذخـر الماجوب وقـت اللزومـي
يا مسندي مـالي حـقـوق مهضومـه *** ولاني سوات لـلي يبوس الخشومي
كـم واحـدٍ يـشـكي عـلـيـه اهـمـومـه *** لا شك أنـا مـن اشتكي لـه اهمـومي
أشكي على للي تـدي الناس صومـه *** رب الـملأ بـكـل الخلايـق رحـومـي
والـجـاه مـا يجـلب لـمـن لا يسـومـه *** الـجـاه عـنـد الـغـانـميـن محشومـي
ومـن يجـتهـد يا زيد تكثر خصومـه *** ولا خـيـر با اللي بواجبه ما يقـومي
وأهل الحسد من جاد هـدوا عزومـه *** ولا يثني المخلص شمات الرخومي
والـلي عـلى الباطل يـركـز هجومـه *** لابــد بـامـر الـلـه يعـود مـهــزومـي
مـا هـمـنـا الـلي طايشات اسـهـومـه *** يطعـن ورمحه مـا ينوش الهدومـي
عـدواننـا بأمـر الكـريـم امـخـزومـه *** ولا أشكـل علينـا كـل غاشم ظلومي
نفس البشر يا زيد ما هي معصومه *** والنـاس تبحـث عـن مثالـب ثلومـي
فـكـري شـقـا يـا زيـد بعـلـوم قومـه *** مـغـرم بـذكـر الـطـيـبـيـن القـرومـي
والمعـتزي فـي لابـتـه مـن يـلـومــه *** يـا مـا بـهــم مـن طيبـيـن السلومـي
تـاريـخ اهلنـا نـفـتخـر فـي عـلومــه *** لـو الـمـعــزة والـفـخـر مـا يـدومـي
الـمـجـد الأول مـا تـخـفـت ارسومـه *** مـجـد تـلـيـد ولا اتحصـاه الرقـومي
يلبق على بيض الصحايف اختـومه *** عـند العـرب والفرس مع كل رومي
ولا اقول هـم خير البوادي عمـومـه *** الـطيـب يـوجـد بالـقبـايـل عمـومـي
والـيـوم نـرفـل فـي حـيـاة النعـومـه *** من فضل ربي مابقي ضرب شومي
الـشـكـر لـلـه والـفـخـر لـلـحـكـومـه *** والـكـل مـنـا بـالـنـظـام امـحـكـومـي
وقال عبدالله بن دهيمش بن عبار العنزي هذا المقطع من قصيدة جوابية يسند على أحد الشعراء : 8
وصل القرايب يعبّـر عـن تكاتـفها *** وجمع الشمل يفرح المهجه ويبهجها
والتفرقه تفرق العصبه وتضعفها *** تـذهـب قدر هـيـبة العـزوة وتسمجها
من يلطم الخشم نون العين يطرفها *** تنثـر مـن الـدمع لو بالكحل يدعجها
أفخـر بعزوة بني هـّزان وأنصفها *** شكر الثناء في مجد الأجـواد نلهجها
عزوة فخر نفخر بماضي سوالفها *** ما هـي دعـايه خبـيـر الـفـن روجهـا
هـّزان من عـزوه التاريخ يعرفهـا *** ضمن القبايـل سجـل المـجـد يدمجهـا
هـّزان يـوم الجفا تقـري مضايفهـا *** ضيـانهـم يـجـذب الهـاشل تـوهـجهـا
وأنسابهم من قبـل الإسلام ولـفـهـا *** هـشام بـكـتـابـه المشهـور مدرجهـا
من ساس عزوه تزبّن من يحالفها *** دخـيـلهـم يغـلـب أخصامـه ويفلجهـا
كـم دار قــوم بـنـي وايـل تصيـفهـا *** تسيـد قـطعـانـهـم مـا أحـدٍ يـهجـجها
زمان يـوم العـرب كانـت وضايفهـا *** بالسيف ويـن الـذي يـقـدر يـرمجها
وقال عبدالله بن بن دهيمش عبار هذه القصيدة مسنده على الرجل الفاضل الدكتور حسين بن علي العطالله الطويلعي حيث أنه تصدى للرجال الذين شنوا الحملة المغرضه ضدي وحاولوا أستقطاب رجال من القبيلة بتلفيق الإشاعات المضلله ولكنهم فشلوا حيث أن هذا الرجل النبيل يقدّر ما بذلت من جهد لقبيلة عنزة من خلال بحوثي ومؤلفاتي عن تاريخها وتراثها وأنسابها والذود عن أحسابها في شعري وقلمي وكل ما أستطيع وقد ثمّن جهودي وقلت هذه القصيدة أشكره على مواقفة وأوضح له مغزا هؤلاء الرجال : 9
يا حسين راجت بـالمجالس دعـايـه *** مضمونهـا مفهـوم قـصـده ومعـنـاه
فـاهـت من الـلي يفـوهون الفـوايـه *** وقامت تـناقـلهـا الملاسن والأفواه
وأحجمت عـن مـن بـثهـا بالـبـدايـه *** عسى يجي ناصح عن الظلم ينهـاه
ولاحـظـت كـلـن يستـمـع للـوشايـه *** ويـصن لهـروج النمايم اليـا أوحـاه
ومـن لا يـعـد الحـق مخطي وتـايـه *** ولا كل مـن سولف تصّـدق حكايـاه
الـثـرثـري يـلـزم لـسـانـه وكـايـــه *** لازم نـقـول لصاحـب البـلبـلـه صـاه
قالـوا رعاع القـوم ويش الحكايـه *** وش علم أبن عبار بالقص وش جاه
قلت افـقهـوا يا ناس وشو خطايـه *** من حاك هـرج الـزور بانت نـوايـاه
يـا نـاس تـرديـد السوالـف كفـايـه *** الهـرج الأجـوف مـا نقـره ونـرضاه
يـا نـاس حـطـوا للتـكهـن نـهـايــه *** بعـض العلـوم المحدثـه مـا سمعنـاه
مـن حيـث تـزويـر الحقايق جنايـه *** وتحريـف واقـعـنـا مهـازل ومـزراه
مـن خـط مشهـد يجـدعـه بالنـفـايـه *** ما يغيّـر التاريخ ختمه ولا امضاه
السـاس ثـابـت مثـل ساس البـنـايـه *** هوج العواصف مـا تـزيله وتمحاه
عـلـيـه مـن كـل الجـوانـب حـمـايــه *** صرحه منيع ولا أحد يقـرب احماه
والـلي يخوض بدون علـم و درايـه *** مـا يـتقـن التـاريخ مـثـلـه وشرواه
أسنـدت فـي قولي صحيح الـروايـه *** سند على من وضّح الـقول وأمـلاه
نـبـراس لـلي مـن صلايـب ضنايــه *** يبقى دلـيـل لسـايـر الـنـاس تـقـراه
ولا اقـول أنـا قـولـي مـنـّزل بــآيــه *** أنـا بشـر والخلـق يـا مكـثـر أخطاه
ولـو بـه نقيصه لـدعسه في حذايـه *** المبحـث الـلـي مـا يـشّـرف بـليــاه
تدوين مجد أهـل الفخر لي هـوايـه *** اكـتب عـلوم الصدق والباطل أنفـاه
ذكـر الشخوص الصيد غايـة منايـه *** ولا خيـر فـي رجـل قـليـلـه احميـاه
أبعـدت عـن عـوج المقاصد مـدايـه *** ولاني من اللي مقصده ملي مخباه
ولاني مـن أهـل الـدلبحه والحبـايـه *** أهـل الخديـعـة والـدجـل والمحابـاه
مـن عـز نـفسه مـا خضع بـنحنـايـه *** لا عاش مـن طمّن مـن الذل علباه
ومـن فـكـر أنـه لـه عـليــه وصايـه *** غـره شويـره تايه الـرأي وأغــراه
فـي ظـل حـكـم الـلي أشـاد الـولايـه *** الحـاكـم الـلـي كـلـنــا مـن رعـايـاه
والـلي مـرامـه بـس يبحـث خفـايـه *** خـاب وخسر ما صح لـه مـا تمنـاه
وكان الجحـود بـمـا عـملته جزايـه *** عنـد الذي ربـه عـن الصايب اعماه
عـنـدي شهايـد من قـروم زملايــه *** أشعار لي من بيض الألـباب مهـداه
تـشهـد نــوادر لابـتي وأخـويــايـه *** بـالجهـد الـلي لـعـيـال وايـل بـذلـنـاه
يـا كثـر الـلي لهـم مواقـف معـايـه *** ومـن يـصنـع المـعـروف لابـد يلقـاه
وقـف بجنبي مـن أعــز أصـدقـايـه *** من كان لي عـنده معـزه ولـي جـاه
صديـقي الـلي فـي ضميـره غـلايـه *** مواقـفـه بالطيـب مـا يـمكـن أنـساه
يغتاض من غيضي ويرضى لرضايه *** ويفخـر بعلمي كل ما جيب طـريـاه
منهـم جـنـاب حسيـن ذخري ذرايـه *** عون الرفيق اللي شكا جـور دنياه
لا قـلـت ويـن حسين يـسمـع نـدايـه *** منصاي عز اللي مـن الظيم ينصاه
ضميره أصفى مـن قـزاز المـرايـه *** ترياق للصاحب وحنضل على اعداه
الـفـاهـم الـلـي يـفـتهـم كـل غــايــه *** أبـو عـلي ربـه عـن الـعـيـب عـذاه
مـا سار بـدروب الدنـس والغـوايـه *** ولا عاشر الخايـب ولا يـوم خـاواه
شهم وشجاع وبـالصخى لـه كنايـه *** حـاش الفـضيـلـه والنفيـلـه بـيمنـاه
وأن صـار بمنيـب الزوامـل خـلايـه *** جض وثـقيـل الشيل مـا عـاد يقواه
بـرك تـقـل بـالـقـاع لـه طـق شايـه *** عجز ينوض وجاوب الحشو برغاه
حـطـوا عـلى متن البليهي حـوايـه *** الحيص يحمل كايد الحمل ما اعياه
لو كان غـط الضلف حدر الـوقايـه *** يصبر لو أنـه غاص بالمتن وأدماه
هـذا شبـيـه حسيـن لا جـتـه سـايـه *** أطلب عسى المولى يحفظه ويرعاه
يـفـعـل وعـن فعـلـه يـريـد الكمـايـه *** مـا تـاق للتمجيـد لـو كـان يـزهــاه
هـو الصديـق الـلي يعـادي اعـدايـه *** عسى الردي واللاش والنذل يفـداه
ويـفـدا جـنـاب الـوايـلـي كـل بـايــه *** العفـن اللي يشمت قـريـبـه ويشناه
ويـفـداه الـلي ينكـر بـربـعـه نكـايـه *** حـاقــد حسـود ولا يـدانــي دنـايــاه
ويفـداه الـلي قلبـه ضهـر قيح دايـه *** المفسد الـلي شمل الأقـراب يشظاه
الطيّـب أرفـع لـه مـن الشكـر رايـه *** واللاش شـف البـال بـعـده وفـرقـاه
وقال عبدالله بن دهيمش بن عبار العنزي هذه القصيدة الجوابية رداً على الشاعر خليل بن غانم الوحداني التويجري
الولدعي العنزي يشكره على موقفه النبيل ويوضّح له وللجميع ملابسات وأسباب بلبلة المجالس : 10
يا الـلـه يالـلي كـل مخلوق تعطيـه *** رزقه وهو مايملك الحول والحيـل
يا الـلـه يالـلي يابس القـاع تسقيه *** من غـر هطال المـزون المضاليل
يا خالـق المخلوق والكـون باريـه *** يا منـزل الآيـات بالـوحي تـنـزيـل
أنت الذي في ساعة الضيق ندعيه *** وأنت الكريم الـلي عليك التواكيل
من لاذبك عن كيد الأشرار تحميه *** يامن عـلى الظالـم عقوبـه وتنكيل
بسمك قـريح القاف نختار صافيـه *** من جـم نقروح القـراح الشهاليل
جـواب قـرم يبهج الصـدر طـاريـه *** خـليـل تـفـداه الـرخوم المساهيل
خليـل بـن غـانـم وصلـني قـوافيـه *** ماطاع هرج المرجفين المهازيل
قريت منظومه عسى الـلـه يحييـه *** يا مـرحبابـه عـد رمـل الغـراميل
قـرم العيـال الـلي عـريبـه مجانيـه *** الـنـادر الـزاكي عريـب الأخاويل
أبي أشكـر الوافي زبـون المداليـه *** الـلي بعـلـم الطايلـه لـه مفـاعيـل
الـوايـلي بالطيـب طـالـت يمـانـيـه *** حيثـه مـن اللي يعـتني بالمعاميل
يلقـاك بالترحيـب مـن حيـن تلفيه *** في مجلسه حلوالرطب وأشقرالهيل
لاشفه الخـرمـان عـلـّم بـاشـافـيـه *** يصبغ شقار اللون بيض الفناجيل
وبعده يجيب اللي عريضه ثناديـه *** كبش مـربـيه الشريطي تـقـل فيـل
ماكن عن واجب عسى الله يقويه *** فـي مجـلسه تلـقـا النشاما تعـاليـل
شهم وكريم وعـز ضيفـه وعانيـه *** يفـرح اليـا حلـت عـليـه الهواشيل
الطيب سلمـه والمراجـل منـاويـه *** شرواه لـه عنـدي كرامـه وتبجيـل
عسى الولي يرفع مقـامه ويـبقيـه *** ويكفيـه رب الكون سـؤ الغـرابـيل
مثلـك يا أبن غـانـم نعـزه ونغـليـه *** يفداك مـن طبّـل مع الناس تطبيـل
العـاقـل الـمـدرك بـعيـده مشاحيـه *** شبحه على روس الجبال المشاويل
من طـاب فعـلـه مـا يطمن علابيـه *** والهـرج مـا يلـفـظ بـلـيـا دوالـيـل
مفهوم قصد مفـوه الهـرج تفويـه *** قولـه نفذ عند أبـلـه القوم وخبيـل
الـلي يريـد لفاعـل الخيـر تشويـه *** ضوح القمر ما هو سوات القناديل
من شـوه التـاريخ مـاني مـداريـه *** أبي أنذره يقصر كلامه ولا ايطيـل
من خالف الواقع عسى الله يهديه *** بالأصـل مـا نقبـل تـدلس وتضليـل
يا ليـت لـوهـم ينصحونـه بنيخيـه *** عـن الخطـأ لا يـبـدّل الجـد تـبـديـل
مـا نـتـبـّع رأي الغشيـم وهـقـاويـه *** لازم نـعــدل تـايـه الـراي تـعـديـل
الـلي تمـادا ولا سمع قـول نـاهيـه *** غـروه قـوم يـنـصبـون المحـابيـل
من عـال نبـراس الحقايق ايقـديـه *** الـلي عـلى الجاهل يهـوّل تهاويـل
والهرج الـلي مالـه براهين مابيـه *** أبي أذكـر الواقع قبل يطفح الكيـل
ما جـدنـا سلعـه يبـيعـه ويـشـريـه *** صفوة ربيعة من سلايل إسماعيل
حلف الضعافة مـا نـبي دوم نتليـه *** حنا عنزة والراس ما ينتكس ذيـل
حنـا عنـزه والجـد نفخـر بماضيـه *** لـنـا عـلى روس الشوامخ منازيل
هذا الوكاد وصاحب الصدق ينجيه *** ما هو مخادع بالسوالف وتدجيـل
يامن تحـوك الكيـد والحـظ تهـفيـه *** ادخل على الله رب موسى وجبريل
حـذراك من جـور الزمان وبلاويـه *** مـا كـل وقـتـه فـيـه ورد وأكاليـل
مـا داومـت دنيـاك للبـاش والـبـيـه *** ولا مهـلـت لـدهام شيخ الجلاليـل
التعديل الأخير تم بواسطة عبدالله بن عبار ; 05-12-2022 الساعة 05:25 AM
|