وقال عبدالله بن دهيمش بن عبار العنزي هذه الأبيات : 129
فكـرت فـي عـادات بعـض الـرجـالي *** وأضحيت مما شفت بالعين مهتـال
نـاس تــدنــت لـلـعـلــوم الـهــزالــي *** يـا للعـجـب عقـالهـا تـقــل جـهـّال
ذربــيـن بـهـروج الــردا والـجـدالـي *** يجيك واحدهـم كما الطعـس ينهـال
الـلـي بـلـمـات الـمـجـالـس أيـلالـــي *** يدوخـك بـاللجـة تـقـل صـوت دلال
يلقـف ولـو هـو مـا أفتـح لـه مجالي *** يدخل مجال الهرج من غير مدخال
نـاس مجـال هـروجـهـم مـا أتحلالي *** بالكـذب والتزويـر والقيـل والـقـال
إلـى صـار ما من بالمجالس تسالي *** ولا بـه عـلوم طيبـه تشـرح الـبـال
أبـي أنـعـزل وأجـلس وحـيـد لحالـي *** أخيـر من مجـلس خبيثين الأعـمال
لـو كـان قـالـوا مـنـطـوي وأنعـزالـي *** العزلـه أفضـل من مقاعيد الأنـذال
مـعــنـا كـلام أبـــو زويــد طــرالـــي *** انا أشهـد أنه فـي مهاجيه ما عـال
ابـن رخـيـص الـلي جـرالـه جـرالـي *** بـصيـر وأمثـالـه عـذيـات وأجـزال
عـلـيـك فـي دوٍ مـن الـنـاس خـالــي *** اليا عـاد مانت للمست الخشم حمال
اليا صار ما ترافق من الناس غالي *** مـالـك بــدار للـمـبـاغـيـض مـنـزال
وقال عبدالله بن عبار من قصيدة : 130
ومـا قّـدر الخلاق مـا عـنـه مهـزم *** ولا يـنـفـع الصـيـاد كـثـر الحبـايـل
اللي كتب لـك لو تقـف دونه ادهـم *** يـجـيـك يـالـمـنعـور لـو مـا تسايـل
ومن لا اكتب لك لـو تكلفت مـا تـم *** الـلـه يـجـيــب الـلـي تـوده حـلايـل
أوصيك صل لخالق الكون ثم صـم *** ومن لا طلب مولاه ما حاش طايل
أرقـد وتـّرك واهـس الـهـم ثـم نــم *** الـهـم يـجـلـب للضـمـيـر الـغـلايـل
افهم هدف صاحبك بالذوق والشـم *** ولا تاخـذ المهروج من كـل قـايـل
والمجلس الـلي ما يعـزك عـنه قـم *** والـمـنـتـحـي تـلـقـا بـدالـه بـدايـل
وقال عبدالله بن دهيمش بن عبار هذه الأبيات من قصيدة نصيحه : 131
أنصحـك يا المجهـول كانك تطيعـي *** عـرق الغـصون الدانيـة لا تقصـه
ومن لا يطيع الشور يمكن يضيعي *** عـن الخطأ حرص ضميرك اوصه
خـلـك صبـور وخـل بالـك وسيـعـي *** وأحشـم رفـيقـك للقصا لا تـرصه
الـنـاس تـشـري بالـكـلام وتـبـيعـي *** كـلـن يـقـول وعـلـتـك مـا تخصـه
وأحذر من اللي بالمجالس يـذيـعي *** يـلمـز بـغـيـره والـبـلاوي بعـصـه
حذراك عن خطو الخبر لا يشيـعـي *** يلزق كما تلزق على الحيط جصه
لا تعتـرض ما بيـن سـني وشيـعـي *** باب السوالف يا فتى الجود لصـه
لا يستـفـيـد الـلي ضميـره وجيعـي *** حلـق الصديق بـناعـم الحبل تصه
الوضع يا المجهول ما هو طبيعـي *** ولا يعـرف الليمـون من لا يمصـه
شف الثعل يا القرم أصبح شجيعي *** والـذيـب طـلـيـان النعيـمي تهصـه
والحـر عـنـد البـوم شفـتـه منيعـي *** هـذا الـوكـاد الـلي بعــينـك تبصـه
ويـن الـذي يـهـابـهـم كـل صـيـعـي *** ستر الهنوف اللي زهاهـا خوصه
دنياك من هولـه يشيب الرضيـعـي *** وكلن جرالـه يا أبن الأجواد قصـه
دور المهادي ويـن هـو والسبيعي *** اليوم عصر الطيب ضاعت فرصه
ربعـك غـدو مثـل خـطاة القـطيعـي *** مرتع بروض ويفرس الذيب نصه
طوح بعالي الصوت وين الدريـعي *** الظيم حـل وصاحـت اليـوم حصـه
* فقال عبدالله بن دهيمش بن عبار رداً على هذه الأبيات يقول : 132
بديت القاف بسم الله عليم بخافـي الغايـــات
عظيـم الشـان مولانـا ولـي الكـون خلاقـه
تهيّض خاطري يبدع قصيد وينظم الجزلات
قرايض شهد من فكري تقاطر ذوب ترياقه
كتبت أشعـار ناقيها عـن التحوير والـهزلات
أعذي منطقي وأفهم جليل الهرج ودقاقـــه
نصيحه قلتها مخلص ولاني للعرب شمــّات
أخص الفاهـم المدرك عساها تبلغ أعماقه
أنا أبي أوصيك يالعاقل بتقوى الله والطاعـات
ترى نفس التقي دايم لفعـل الخيـر سبّاقـه
تحكـم وأحتكـم بـاللي نـزل في محكم الآيات
تـمش بنصـه وحافظ على عهده وميثاقـه
ترى من خان عهد الله مصيره ياقع بنكبات
ولـو شفتـه نجح مـره تعيّن ويـن مطباقـه
تجنب مذهب الفاسد تواضع وأخلص النيات
ولا ترافق حليف الشر ترى الأشرار بواقه
تجنب صحبت الغادر تجنب رفقت الشّلات
ترى من رافق الخايب لدرب العايزة ساقه
تجنب مجلس الكوبة تجنب شلـة الحارات
تراها تجمع السافل مع السربوت والعاقه
الولدين اللي ربوك لهم فـي ذمتـك ديـنـات
ترى لو غبت يرجونك عليهم شوفك شفاقه
ترى من عق به شاره تبين من أوضح الشارات
مقام أبوه في صدره مثل تقدير سواقـه
يقول لصاحبه حاضر تبشّر وأبرك الساعات
ولو نادى له الوالد تزرى وهـدل اشداقه
عدوك يفرح بسّـوك يدور العيب والخملات
نكور ولو تصل حبله يموق ويفصم حلاقه
ترى مهما عن الأحمق تعف وتسمح الزلات
خبيث النفس لو تخطي عليك يحملق أحداقه
توقع وأحفظ لسانك ولا تبحث عـن الغـرات
حذورك غـرة الغافـل سهـوم العين رماقـه
توقع وأبعد النظره ترى من يكشف العورات
يبي يفتح خلول الناس وعنده تنفتح طاقه
عن الهزلة عن الرزلة ترفع يا رفيع الـــذات
مقام الحر ما يطمن مقره راس شوهاقه
ترى من عادت الصيرم يهوم ويبعد النوهات
يروم النايفـه نفسـه لرقي الحيـد عشاقـه
وصاتي لك وصاتي لك تجلد وأنطح الشدات
ترى لابد ما تجرب عذاب الوقت وأرهاقـه
لفعل المرجلة حاول لـو أن دروبها صعبـات
ردي العزم والخامل بلوغ المجد ما شاقه
أبي ترسم حروف العـز وتسطرها على الصفحات
تـرى من شـام للعليا يشـوم بنفس تواقـه
حصيل العلم به تسلك طريق الفـوز والطولات
ترى من كان متعلم يطول وتسمو أخلاقـه
تعلّم وأجتهد وأكدح عساك من التعب تقتات
ترى من لا عمل خيّم عليه الفقر والفاقه
ولا تكسل سوات اللي يدور الهون والراحات
ولا تقنط ترى المولى يقيت العبد بأرزاقه
دني النفس ما يقنع يحوش الرزق بالحيلات
يغـش الناس وأيخـادع ونفسه دوم ملاقه
تبصّر وأفتهم وأعرف تنبه وأحذر الغفـلات
ثمين الوقت لا يمضي ترى الأيام سراقــه
ترى من فرط بوقته ندم بالماضي اللي فات
يفـر الوقـت دولابـه يسيـر ويوصـل قناقـه
تغانم وقتك وبادر ترى من طال عمره مات
رميم الجسم بالبرزخ يعـوث الدود بشناقه
خـذ العبـرة ولا تنسى تذكّـر هــادم الـلــذات
جديد العمـر صيوره سمايـل جـرد خماقـه
ولا تغـتـر بـالدنـيـا تـرى الدنيـا لهـا ميلات
ولا تخـدعـك لـو تقبـل تراهـا دوم صفاقـه
فلا تأمن غوايلها لـو أنت بمنصب الباشات
ترى كف الزمن لازم يلوح الخـد بطراقـه
وصلى الله على الهادي بذكره نختم الأبيات
عدد ماهل من هاشل تلاعج ضوح براقـه
قال عبدالله بن دهيمش بن عبار هذه الأبيات من شعر الحكمه : 133
ياللي تفاخر وأنت ماتثيب شاكي *** توقّع وخـل المفاخـر ماهي لـك
ستـر العـذارى لابسات التـراكي *** افخر أن كان خصالهم كلها بـك
الـلي بـحـزات الـلـّوازم مـراكـي *** أهل المراجل والفخرمابهم شك
والخامل اللي مامسح دمع باكي *** ولاينتخي للي عليه الزمن ضك
هذاك ماهـو من الرجاجيل زاكي *** وشهادته للنفس ما تعتبر صك
من شال كبر ولا أحـد له يحاكي *** يـزوم وقصور الفخـر دكهـا دك
الجـوخ جوخ ولا يشبّـه لخـاكي *** والحيط ما يبنا بلا اسمنت وبلك
والـلي لـنـار الشّـر معلق وذاكي *** هـذاك نـذل ولـيتنـا منـه نـفـتـك
وقال عبدالله بن دهيمش بن عبار هذه الأبيات : 134
يـالـلّـبـيـب أوع الـكـلام ومـا حــوى *** وأفـتـهـم قـصـدي لـو المعـنـا لـوي
مـن تـبـصّـر فـي زمـانـه مـا غــوى *** كـانـه مـن الـحـاضـره ولا بــــدوي
مـن ظـلـم حـظّـه مـن الـعـالي هـوى *** عـاش وحـدانـي ولا يـاجـد خـــوي
ومـن تمادى بالطّـغى عـقـلـه خـوى *** راسـه الـمـصـدوع يـلـزم لـه كـوي
وش نـبي بالـلي عـلى وجـهـه دوى *** وأبـتـعـد عـن لابـتـه تـقـل جـلــوي
ومن نـوى وصـل الرفيق اليـا نـوى *** يـقـطـع البـيـداء ويـطـويـهـا طـوي
يـا مـن مـدحـت الـردّى مـالـك لـوى *** أمـدح الـلـي مـثـل حـرّان عـشـوي
الـصـخـي غـيــره لـفـعـلـه مـا قـوى *** بـالـكـرم كـفّـه كـمـا غـيـث ثــروي
الـبـشـر بـسـلـومـهـم مـاهــم سـوى *** مـن سـكـن فـي بـاديـه ولا قــروي
والـوحـش سرحـان كـان أنـه عـوى *** يـرجـع لـطبـعـه ولـو كـان غــذوي
لـو تـشـد الـحـاشـي بـحـمـلــه ثـوى *** مـار شـد الحيـص حيـث أنـه قـوي
الــمـحــوّر مـا يــثــور الـيـا ضــوى *** والـهــلامـه مـا يـكـتّـر لــو شــوي
والـسبـل مـا يـنحـصـد كـانــــه ذوى *** ومـن ورد لـلّــرس ذوده مــا روي
التعديل الأخير تم بواسطة عبدالله بن عبار ; 10-31-2021 الساعة 03:39 PM
|