وقال عبدالله بن عبار في أحد قصائد الرثاء : 87
لا والله الا سـاكب الدمع مـا أيـفيـد *** وش عاد لو سيّل شعيب الفلاجـي
ولا تنفع الحسرة وكـثـر التـنـاهـيد *** والموت كانـه حـان مالـه علاجـي
الموت حق ولا عـن القـدر تصديـد *** وسهـم المـنـايـا ما يـرده سياجـي
ليت المنايا سهومهـا تعـفي الصيـد *** وتاخذ بدل منهم خطات الهباجـي
لـيـت الـمـنـايـا للـرخـوم الرعـاديـد *** اللي إلـى صـار اللـوازم أتجاجـي
ومن قصيده قال عبدالله بن عبار : 88
الصـدق يا أبـو زيـد مبـطي نـدوره *** والنـاس تـدري بالعـلـوم الصمايـل
وكـل العلـوم المسملات امحضوره *** عـنـد الـعـرب لـهـا سجـل وفـوايـل
يوم الزمان الـلي كفى الله اشروره *** كـل الحـمـايـل مـا بهـم قـول قـايـل
مـار الـزمـان الـلـه يكـافيـك جـوره *** الـيـوم أشـوفـه بـالأجـاويـد مـايــل
كيف الرجال الـلي سـوات النمـوره *** صـاروا مجـال لشـايليـن النـقـايـل
ذل الشجـاع الـلي طـويلـه اشبـوره *** وعـز الذليل وساعـده صـار طايـل
يـوم الرجـال أهـل الحميـا الغيـوره *** حيـيـن مـا حطـوا بعضهـم هـمايـل
واليـوم بعض الهـرج ردد انشـوره *** الجـمع صـار يـوزعـونـه فصـايـل
أقـولهـا ولا أحـب نخش الجحـوره *** ولا خير بأصحاب النكـد والدغايـل
الفـضـل لـلـه والفـخـر لأخـو نـوره *** يردع عـن دروب الخطأ كل عايـل
وقال عبدالله بن دهيمش بن عبار هذه الأبيات نصيحة : 89
يا عـيال أطيعوا ترى بالحق نامركم *** إبـليس والنـفـس بالسيـات أمـاره
حفـظ الكرامة بهـا الرحمن ياجركـم *** من طاع رب الملأ مايغثي جواره
تـرى القرين الـذي يبغـي يعـاشـركم *** كانه مشى بالردا يلحقكم أضراره
تـرى حليف الـردى شكله يحذركـم *** من ينظر لمظهره تبديلـه الشـاره
الخايـب بعشـرتـه ما الـلـه ناصركـم *** تنبهوا وأحـذروا من شلة الحـاره
وأن كان عن الخطأ عفت ضمايركم *** تجنبوهم تـرى اهـل الشر غـراره
والـلي مشى بالدنس قربـه يدمركـم *** جنب رفيق الخزا يخزنـك اخبـاره
وقال عبدالله بن دهيمش بن عبار هذه الأبيات من قصيدة جوابيه : 90
دنـيـاك هـذي كـنـهـا فـي واضــلال *** لـو مـهـلـت يــوم سـريـع زوالــــه
ما تنوصف يا مسندي تشبـه الـلال *** يـلـفـح عـلـى كـل الـمـلأ هـمـلالــه
دنياك هـذي خيرها حسن الأعمـال *** وكـم واحـدٍ مـا فـاد لـو كـثـر مـالـه
لـو ثـروتـه مليـار عـد مـن الأنـذال *** مـالـه كـثيـر ولا يحـوش الجمـالـه
وكـم واحـدٍ تـلـقــاه لـلجـهــد بـّـذال *** لـو كـان دخلـه ما يعـيـّش عـيـالـه
أطلـب ولـي الكـون خـلاق الأجيـال *** يفـرج لـك المولى عـزيـز الجلالـه
أصبـر ولا بـد لـلصـعـيـبـات حــلال *** والـلـي تصبـر كـل مقـصـود نـالـه
وهذه أبيات من قصيدة لعبدالله بن عبار : 91
وأن كـان تسمع قـول شـذاذ الأنفـار *** كلن يدور بصاحبه نقص وعيـوب
كـم واحـدٍ بيـن العـرب يشعـل النـار *** يبغـي فتيل الشـر بالناس مشبـوب
الـلـي يـلـفـق بـالأجـاويـد مـعــيـــار *** من دار عيب الناس لا بـد مهزوب
وراعي الخطأ ماله مع الناس تعبار *** ومسبت الغـافـل بهـا أثـام وذنـوب
وأحذرك لا ترغـب شماتـة هل الكار *** قـلبـك دليلك والخلايق لهـا قـلـوب
وقال عبدالله بن عبار هذه الأبيات من قصيدة مسنده على أحد الزملاء : 92
بديت باسمك يالـولي سـر وأجهـار *** منشي المطر من مدلهـم الغمامـي
موحي دبيب الدابية فوق الأحجـار *** يـا رازق الـدود العـمى والهـوامـي
يالواحد اللي بقدرتك قـدر الأعمـار *** محصي اعداد شهورها والعـوامي
مولاي خلاق الملأ مجـري الأنهـار *** محـيي رمـايـم بـالـيـات العـظامـي
مـهـدي طـغـات تـكـره الديـن كفـار *** من عقـب ما هم يعبدون الصنامي
من عقـب ما كانـوا عصـاة وفجـار *** هــداهــم الــخــلاق رب الأ نــامـي
الـلـه يـجـازي كـل خـايـن وغـــدار *** شين الضمير اللي فعوله اجـرامي
ويعـز ساس الجـود زينين الأذكـار *** اهـل الصخى والمرجلـة والعدامـي
خطو الرزيل اللي قهوته من البـار *** عـاف الـذي قمقـومهـا لـه خيامـي
لا جيـت بيتـه ريح دخـان وأسكـار *** وروايح قـشـرى تجـيـب الـزكامـي
هـذاك طـشـه يالسنـافـي بصـنـقـار *** الخـايـب السافـل لعـيـن الـرسـامي
والخاتمـه طالبـك يا صاحـب الكـار *** تسمح لنا يا شوق زاهي الوشامي
وصلوا عـلى اللي للمخاليق مختار *** محمد شفيع الناس يـوم الزحامـي
قال عبدالله بن عبار مقطع من قصيدة : 93
أبـدي بـذكـر الـلـه مـديـر الـهـبـايـب *** حـلال عـسـرات الأمـور الصعـيـبـه
بأمـره يسوق الغيث مـزن السحايب *** ويجعـل بـه الـدار المحيلـه خصيبـه
منشي الملأ من بين صلب وتـرايـب *** رب الـبشـر عـلام فـي سـر غــيـبـه
وأن كـان شفت من الليالي عـقايـب *** مـا شفت شفته مـار نسكت غصيبـه
لا تـبتلـش في كـل هـامـل وسـايــب *** تـرك وضيـع الشـان لا تـبـتـلـي بــه
وأفطن لقـول الدسـم معنـاه صـايـب *** مـن عـال يـلـقـا مـن الـمقـرد لعـيبـه
خـل الـعـفـون السـافـليـن الـزلايــب *** والـلاش لا تقـرب جـوانـب شعـيـبـه
أبـعـد عـن الأنـذال لـو هـم قـرايــب *** تـرى الـزلايـب قـربـهـم لـه ضريـبـه
عـليـك بالشجعـان حصن الطـلايــب *** فـرحـت ضميـرك بالسنين العصيبـه
إلـى حـداك الضيم صـاروا جـلايــب *** فـيهـم طـنـا شـمـر ونـخـوة عـتـيبـه
هـذا جـوابـي يـا عطيـب الضرايــب *** ومـن طـاب تعـتـز الـرفـاقـه بـطيـبـه
نـعـوذ بالـلـه مـن عـقـود النشـايـب *** وصلـوا عـلى اللي سنتـه نقـتدي بـه
وقال عبدالله بن دهيمش بن عبار هذه الأبيات من قصيدة : 94
أحـب عشـرات الحمايـل والأشـراف *** والـنـذل والـهـلــبـاج مـا اطـب داره
لا شـك أقـاطـع كـل هـايـف وبــلاف *** عـشـرة ردي الشـان كـذب وقـمـاره
أحـب وافـيـن الخصايـل والأوصـاف *** الـلي بـهـم عـز الـخـوي وأفـتخـاره
ولا لي بخوتهـم مطـامع ولا اهـداف *** ولا خيـر بالـلي ضاع سلمـه وكـاره
قلبي عـلى الطيـّب شـفـوق وميـلاف *** وزيارة أهـل الطيب مـا هي خساره
وقال عبدالله بن عبار هذه الأبيات من قصيده : 95
المجـد ما حـاشه قصيرين الأنظـار *** عفـون المزايا مـا وراهـم حصيلي
لا شـك مـن يعـطـا تحـاذيـر وأنـذار *** يحتاط مـا ينـزل بجـوف المسيلـي
واللي يبي يفضخ عيونه بالأضفـار *** ما هي غـريبه كان عـقـله ضليلي
الـديـن سـاوى بالبشـر كـل الأنفـار *** ولا يفتخـر مـن كـان ساسه قـبيلي
الـفـرق بـالتـقـوى وللطيـب تعـبـار *** وفعـل المـراجـل مـا عـليها كفيلـي
واليوم من يكتب عن الناس يحتـار *** هـذا عـدو وذا صحيـب وعـميـلـي
وأن كـان مركانا على حيط واجدار *** مـا نستـمع لـلي يـشـيـل النـقـيـلـي
من يبني اجداره على الرمل ينهـار *** والطعس من لفح الهواجـر يهيلي
نـبـوع مقـيـاس المسافـة بالأمـتـار *** ولا انـتـجـاوز حـدنــا قـدر مـيـلـي
والعاقـل الـلي لـه حشيمـة ومقـدار *** مـا يقـبـل العـيـلـة ولا هـو يعـيـلي
وقال عبدالله بن عبار من قصيده طويله : 96
يـا الـلي تـقـول أن الـليالـي وطــنــا *** وتشكي عـلينا من الـزمان وبلاويـه
مـادام حـنـا بـالـمـبـــانــي سـكــنـــا *** وسط القصور اللي الكهارب تضويه
نرقد بأمـان مـن العـدو مـا أشتحنــا *** وخمس الفرايض بالمساجد أنصليه
راح الـزمـان الـلـي وطـانـا ومـهـنـا *** جـوع وحـفـا والكـل ينـدب عـوانيـه
والـيـوم مـستـوريـن مـحـدٍ بـخــنــا *** تسـاوت أشبـال الأسـود وحـصـانيـه
وأبشـر تـرى وضع البشر مـا تـدنـا *** والنـاس كـلـن موقـفـه دون عـانيـه
وأن قـلـت مـيـلات السنيـن أفـقـرنـا *** مـا هـو فـقـيـر الـلي وليـه أمعـافـيـه
وأن كـان صـكـات الـلـيـالـي رمّـنـــا *** يا كـثـر الـلي بقـعـا تخمـه وتخطـيه
وكـان السعد لـك فرصته مـا تـسـنـا *** أصبـر عـلى جـور الزمـان وتحـديـه
وأن كان لـوعـات الزمـان أرهــبنــا *** مـن تـسعــده دنـيـاه لابـد تـشـقــيــه
لاشـك لـو شـان الـزمـن مـا طـمـنـا *** ومن يطلب الله سامك العرش يعطيه
تــم الـجـواب وفـي خــواتـم لـحـنــا *** صلوا عـلى الـلي بمسلك الحق نتليه