الشيخ شخيّر الدهيمان رحمه الله دائماً تصير عنده مناسبات لأمراء ومشائخ وعندما كنت بالقصيم يدعيني في كل مناسبة ويطلب مني المشاركة وكنت أتعنّى كرامه له والقي قصايد وبالأخص في حضرة صاحب السمو الملكي الأمير الدكتور فيصل بن مشعل بن سعود حيث أن الشيخ شخيّر يدعي الأمير عدة مرّات ومن الأمراء الذين زاروه والقيت أمامهم قصيدة أنجال الأمير سعد بن خالد وهذه القصيدة التي قلتها بمناسبة زيارة أصحاب السمو أنجال الأمير سعد بن خالد بن محمد آل سعود للشيخ شخيّر الدهيمان أبو دهيمان :
نظّمـت قـافي بالصناديـد الأبـطـال *** تمجيد ساس المجد واجب عليـه
سـلايـل الـلي للهـواشيـل مـدهـال *** سـعـد كـفـوفـه بالـمـكـارم نـديـه
والجد خالد ليـث ممدوح الأفعـال *** مجـده عـريـق وعـزوتـه مقرنيه
نسل الشجاع اللي لعلم الفخر نال *** يـوم المـراجـل بالعـزوم القـويـه
خلفـة محمـد زاكي الجـد والخـال *** عضيد أبو تركي عـريب السميـه
أحفاد نسل سعود سمحين الأقبال *** لهم الفخر موروث ما هـو حذيـه
عوق اللدود مهديت كـل من عـال *** يـوم الفوارس مـا تهـاب المنيـه
أمجادهـم تسلسلت عـبـر الأجيـال *** بهم الصخى والمرجلـة والحميه
أهـل المكارم والفضايل والأنـفـال *** الـلي رفـعـوا رايات نجـد العـذيه
أفعالهـم فـاقـت تواصيف الأقـوال *** بانت عـلى الأشهـاد ماهي خفيـه
وأعمالهم بالطايله خيـر الأعمـال *** يـا بـعـدهـم عـن الـعـلـوم الرديـه
لهم مواقف باللـزم موقـف رجال *** منصى لحـل المعضلـة والقضيـه
دوم بـذراهـم يأمن الخايـف الـذال *** زبن الدخيل الـلي عليـه الدعيـه
اللي زبنهم زابنن لـه عـلى اجبال *** عـن العواصف والهواجـر ذريـه
مبطي لهم في عالي المجد منزال *** سادوا بشرع الـلـه وسنّـة نبـيـه
ما شفت بهم اللي من الكبر يختال *** متواضعين وعندهـم حسن نـيـه
الدار باجوها عـلى خيـل واجمـال *** فـوق الجياد وفوق كـور المطيـه
يـوم الجفا والناس ما تملك ريـال *** عصر المجاعـه والحيـاة الشقيه
يـوم الخلايق مـا تجـد كيل يكتـال *** ومن دار مونـه ما يحصّل وقـيّـه
هم ريفها يـوم الزمن يشده البـال *** واليوم عصر الخيـر مافيـه زيـه
الخيـر حـل بدارهـم والوهـق زال *** والـكـل يـرفــل بالـحـيـاة الـهنيـه
تغيـرت ببجهودهـم كـل الأحـوال *** الخير عـم وطـاب غـرس الوديه
وختـام منظومي نرحـب بالأشبال *** لكـم مـن شخيّـر جـزيـل التحـيّـه
أبو دهيمان الـوايـلي طيّـب الفـال *** شبحـه بـعـيـد ولا أهـدافـه دنـيـه
لـه مجلسٍ مـا دوجوا فيه الأنـذال *** بـه تجتمع كـل الوجوه الـرضيّـه
وله جفنة فيحا بها الوان واشكال *** أنـواع من كـل الصنوف الشهيه
كم حاشي منظر سنامه تـقـل شال *** بـرّك وقلّط بالصحـون الـفـضيـه
وقلت هذه الأبيات ترحيب بالشيخ تركي بن عمر بن ربيعان شيخ قبايل الروقة من عتيبة بمناسبة زيارته للشيخ شخيّر بن دهيمان :
يا مرحبـا حييت يا خلفـت عـمـر *** في بيت شغموم النشاما شخيّر
ياتركي أنت من الذي مابهم شر *** خيّر وتنجب من صماصيم خيّر
من نسل شيخ في نهار اللقا مر *** يـوم العـرب كـلـن لـداره يجـيّـر
من يزبنه ما يشتكي برد أو حر *** بالعصر اللي شاين زمانه يحيّـر
سلايـل ربـيـعـان كـلـن لهـم قـر *** ريف الهواشل مكرمين المسيّـر
ويوم السنين القاحلـة مابها در *** والنوق تنفـر ما يـفـيـد المضيّـر
بالقحط تلقا صحونهم بالشحم غر *** عصيب حيـل وحـدره الـزاد ديّر
قصيركم محشوم ما يلحقه ضر *** يرقـد بأمان مـن العـدو ما تذيّـر
قاده لسلطان العـرب سادة البـر *** رجالهـم عـن منهجـه مـا يغـيّـر
رجالهم من صولة الخصم مافر *** يخشى كلام الـلي بهـرجه يعيّـر
مع الشكر الجزيل للشيخ أحمد بن ذياب بن هرماس على مروره