حياك الله يا خيال اللهازم وبناء على طلبك يسرني أن لنشر هذين القصيدين من شعري القديم

قال عبدالله بن دهيمش بن عبار العنزي معتزاً بقبيلتة عنزة :
مـبـداي بـالـلـي لـلـسـمــوات رفــاع *** الـواحـد الـلـي يـطـلـبـه كـل داعــي
يـدعـيـه بـسـمـه كـل ساجـد وركـّاع *** بـيـبـان رزقـه للخـلايـق أوسـاعـي
بسـم الـولي مـولاي نظمـت الإبـداع *** وسجلت من نفح الضمير أنطباعي
كـتبـت عـن مجـد القبـيـلـه أستطلاع *** ودافعـت لـو ماهـم بحاجـة دفـاعي
أولاد وايـل عـلـمهـم مـلي الأسمـاع *** تاريخهـم فـي كـل الأقـطار شـاعـي
اهل الصحون اللي غميقات ووساع *** اهـل البـيـوت الشامخـه والـرباعي
رجـالـهـم مـا هـو لـلأمـوال جـمـّـاع *** يـكـرم الـيا شـح البخـيـل القطاعـي
رجالهـم وأن جوا مهاجيف وأجيـاع *** يقـفـون من عنده ضيوفه أشباعي
رجـالـهــم بـالـكـون لـلـضــد قــمـاع *** عـوق العديم الـلي براسه زعاعـي
رجـالـهـم مـا يـقـبــل الـظـيـم بــزاع *** الـيـا ضرب مـن كـفــه الـدم ثـاعـي
رجالهـم مـن عـيلـت الخصـم جـزاّع *** لا شـك للصاحـب كـريـم الطبـاعـي
رجالهم يـوم الـزمن كـون وأصـراع *** يـرهـب عـدوه كـان حـل النـزاعـي
رجـالـهـم يـستـافـي الحـق بالـصـاع *** شجـاع يـوم المـرجـلـه بالـذراعـي
ربعـي الـيا جـرد مـن الغــمـد لـمـاع *** يـا مـا بهـم من كل قـرم وشجاعـي
وأن صالـت الخيليـن والجـمع فـزاع *** وتعـاقـبـوا بالـلي يـقـص النخـاعي
حـمايـة السـاقـة طـويـلـيـن الأبـواع *** كـم شيـخ لابــه فـدعـوبـه فــداعـي
والعايـل اللي تاه عـن درب الأسناع *** وسلـك مناهيج الغـوى والضياعـي
لـو زام يـرجع عـن نـويـه وينصـاع *** وينقـاد في حبـل الرسن والخناعي
مـن زام يـلقـونـه صنـاديـد وأسبـاع *** ويصبح عشى لمهرفات الضباعـي
ترعـى هيت في ظلهم شقح الأقطاع *** ويا سرع فزعتهم اليا صاح راعي
حـاميـنهـا عـن كـل غــازي وطمـاع *** وبسيوفهم يرعـون قـفـر المراعي
صالـوا وجالـوا فـوق نسّاع الأكواع *** فـوق النجايـب والهميـم الزعاعـي
قـدم الجهـام أستجـنبـوا كـل مطواع *** مـا فـوقـهـا إلا شدادهـا واللـواعـي
قـاد الـنـشيـر وسـار لـلـرحـل تـبـّاع *** وخالط صهيل الخيل حس المتاعي
يـرعـون فـيجـان البـراري والأرياع *** فـي كل دار أدوى ظعـنهم وزاعي
مـا ردهـم عـن مـرتـع الـقـفـر منـاع *** تسمع لهم برض المخاطر شياعي
داجـوا وراجوا في بعـيدات الأصقاع *** ولهـم طوارف فـي جميع البقاعـي
ويا مـا تمشـوا مع سماهيد الأجراع *** عـلى هـوا الـبـل كـل يـوم أنتجاعـي
ويا مـا أخذوا بـديار الأجناب مرباع *** بـيـن الحـزوم النـايـفـه والتـلاعــي
بالديـره الـلي تـنفـح الصبح ذعـذاع *** الـلي بهـا عـفـر الجوازي أرتاعـي
عشب الربـيع بـوسطه المـزن نـقاّع *** غـاذيه وبـل الغيث ما هـو زراعـي
والـروض لـه بـنـه تقـل ريح نعـناع *** يـفـوح مع طـل الـنـدا كـان مـاعـي
الورق غـرد به على الغـصن سجاّع *** وصـوت أم سالم بالخمايل تعـاعـي
بهـم أفتخر والناس تدري بالأوضاع *** أنبيـك يالـلي حاضر الذهـن واعـي
كـانـك فـطين لـمبهـم الهـرج رمـاّع *** وعـندك مع الفلهام وسع أطلاعـي
شف العـرب بالهرج تشرى وتبتـاع *** والـكـل يـفخـر لـو صنيعـه صناعي
والكـل يطـمح لأنـتخـابـه بـالأجمـاع *** يرغـب نجاحـه لـو يكون أقـتراعـي
وصلوا على الـلي سنته نور سطاع *** يضـوي عـلى كـل الملأ له شعاعـي

وقلت على نفس القافية هذه القصيدة بالوجد :
البارحـه نـومي عـلى عظـم الأكـواع *** والـهـم زاود واهـسـي بـنـتــزاعـي
سـهـران لـيـلي والـمخـالـيـق هجـاع *** مخلوق ربي ما بهم شخص واعي
أضحك وانا قـلبي مـن الوجـد ملتـاع *** واخـفي سبايب لوعـتي وأنفجاعي
لـولا ضـميـري بــه للأسـرار ميـداع *** مخـفـيـه مـا ودي كنيـني أيـذاعــي
لا أصيح صيحت شارد الذهن مرتاع *** بـيّح عـزاه وهيضه صـوت ناعــي
وألعـي كمـا يلعـي عـلى الديد رضـاع *** طفـل يتيم ومن غـثا الجوع لاعـي
عـلى الـذي خـده مثـل نـور الأشماع *** يوضي جبينه لـو عـليه القـناعـي
وتــرايــبـه مـثــل الـرمـامـيـن شـلاع *** مـا مصهـن عـيّـل بصـدره مقاعـي
والـجــيـد تــزهـاه الـقـلايــد والأدلاع *** وجـدايـل المجمـول مـقـدار بـاعـي
والـزول عـود الحور فـي حيـر زراع *** يـمـيـل مع ريـح الصبا بـنهـزاعـي
غـرو لعـب بـي لعـبـت الريـح بشراع *** حـبـه سقـاني سـم رقـط الأفـاعــي
والـحـب سلطـان لـه الـنـاس خـضاع *** سيـدٍ عـلى العشاق وأمره مطاعـي
قيس الملوح مـن وجـود الطنا ساع *** وابـن الخـفـاجي لوعـه والقضاعي
عـلـيـه قـلبـي فـر مـن بـيـن الأضلاع *** مـثـل الظليم إلى أنحدر من رفاعي
قـلـب الـعـنـا كـنـك تـجــره بـمــقـلاع *** أدوت عـروقـه وأقـرشت بنشلاعي
يـا مـا عــذلـتـه عـن نـويـه ولا طـاع *** قـلبي غـدا مع ناعـم العـود زاعـي
خـلـي نحـاه الـبـعـد والـبـعـــد قـــلاع *** مدري متى عقب الفراق أجتماعـي
دون الغضي حالت مسافه مـن القاع *** وأرجـي بريـده كـل ما طـب ساعـي
أتـلا الـعـهـد بـه يـوم لـّوح بالأصباع *** أبعـد وعـلـمي بـه نهـار الـوداعــي
يـا لـيـت لـي عـنـده وسـيـط وشـفـاع *** يـبـذل عـلى لامـاه جهـد ومساعـي
ولا أريـد انـا لامـاه فـي مكـر وخـداع *** بالشـرع والحاسد عـيونـه تراعـي
وجدي على هاف الحشى حلوالأطباع *** بعـده شقاي وشوف زوله متاعـي
لوا وجودي وجـد من يشكي الأوجاع *** عـلـه عطيـب وزاد عـلـه صداعـي
ولا وجود اللي وراء حصون وأقلاع *** مـدمي سجين ولا لسجنه مـداعـي
أو وجـد من نوخ عـلى فـرش وأنطاع *** ينظر سبب حتفـه وعينه تـراعـي