( أبيات مهداه إلى سعود بن شحاذه المهيدي )
هذه الأبيات المتواضعه أهداء للرجل الفاضل مقدّم طيار متقاعد : سعود بن شحاذه بن معتاد المهيدي أبو راكان صاحب المواقف المشرفه الذي رفع راس كل من يعتز بنوادر القبيلة وهو يستاهل الشكر والثناء :
راكـب الـلي مـا يجيّـم بـه بساتـم *** ورده مـن طـوكيـوا عبداللطيـف
يوصل الـلي وصفوه لجود حاتـم *** بالكرم والجود حاتـم لـه وصيف
بالصراحـه قـلتهـا مـاهـي تماتـم *** في مديحه صادق ولا قلت زيـف
أمـدحـه ماني لـمدح سعود كاتـم *** الكريـم الـوافـي الشهـم العـفيـف
قـول هاكم عـادتـه مـا قـال هاتـم *** حيث أبـو راكـان نـزيـه وشريف
ومن زمانه صار كنـه ليـل عاتـم *** الكريـم سعود لـه عـون وسعيف
المهيدي ستر من تزهى الخواتم *** شامخ قصره كما الضلع المنيف
مـا تجد مـن مـرّو بقصره وفاتـم *** عن ضيوفه ماقفل باب المضيف
من حمايـل مـا شناهم كـل شاتـم *** حصلوا مـدح المجاور والحليـف
الكـرم موروث من شيبان مـاتـم *** من جدود جدوهم منسف وسيف
مـن قديم ضيوفهم مـا يـوم باتـم *** عنـدهـم مقـوين بالوقت الحفيف
ما يجض الليث من نبل الصواتم *** ولايمل الحيص من شيل الكليف