[size="6"]
هذه القصيدة أسندها على الشيخ جدعان بن زبن بن محروت بن فهد الهذال أحد أنجال شيخ مشائخ عنزة هذا الرجل يسعى لحل قضايا القبيلة ويهمه أمرها وهذه
القصيدة تحتوي على ما وعد الله به من أجابة دعوة المظلوم أسأل الله أن ينصف كل مظلوم وحسبي الله ونعم الوكيل فأقول وعمر الظالم ما يطول :
يالـلـه يا محيي العـظـام الـرمايم *** يالواحـد الفـرد الصمد حـي قيوم
يا رب يا مجـري هبـوب النسايم *** يامنزل السحب الثقيله من غيوم
يا مـوفـّر ارزاق البشر والبهايـم *** قدّرت لعبادك من الرزق مقسوم
أدعـوك بأسماك الجـلال العظايـم *** يامن خلقت من العدم كل معدوم
أدعي بدعـوة كـل خاشع وصايم *** واللي تهجد بالدجا هجعت القـوم
بـك يستغيث اليـا هجـد كـل نـايـم *** يدعي وعـينه حاربت لذّت النوم
الطف بحال الـلي شكالك هضايم *** يشكي عليك الظّلم والقلب مكلوم
يا رب تنصفني مـن أهـل الظلايم *** يامجيب دعوة بالملأ كـل مظلوم
الظلم ظلما ومـن كـبـار الجـرايـم *** والله جعل عقـوبـة الظلـم زقّـوم
الظـلّـم يـرمي صاحبـه بالجحايـم *** عن حامي اللاّهب تظلّل بيحموم
لاصارت الأجساد تحـت الـردايـم *** مـا قيـل للظالم محالـل ومرحـوم
بالموقف الـلي بـه تشيب اللمايم *** الـرب يقضي بين حاكم ومحكوم
دام الحكـم بالعـدل والشرع قـايـم *** كلي أمل ماني من الحق محروم
الشرع من هدي النبي له دعايـم *** والحـاكـم العـادل أقـره بمرسـوم
لاشك كان الوضع ما هـو ملايـم *** الظالم أرغد والبري صار متهوم
جـلاّب حـظّـه بيـن بـايـع وسايـم *** يا للعجب أصبح مشجع ومدعوم
يـقـدح ومنطوقـة لـعـان وشتايـم *** أسبابها قـلبـه من الحقد مسموم
الـلي بهـرج الزور شامت ولايـم *** يـدور بالصاحب نقيصه ومثلـوم
مـا يـدوّر الـغـرّات كـود الهـلايـم *** ولا يفعل الهزله صناديد وقـروم
الـلـه حسيب الـلي جـداه النمـايم *** مهمته بيـن العـرب ينقـل عـلـوم
الـلي عن الماجوب والحـق نايـم *** يكتب ولا عنده من العلم معـلـوم
حتى الرضيع الـلي عليه التمايـم *** يبي الحقايق مايبي قول مزعوم
ركـّزت لأنساب القبـيلـة رسـايـم *** انا بشر ماني عن العيب معصوم
نكتب حقـايـق مـا نـوهـم وهـايـم *** ولا يغيّـر الـواقع تواقيع وختـوم
أسم عنزة عبـر العصور القدايـم *** سجل بتاريخ العرب ليس مكتوم
لـهـم مـعـالـم بـالـديـار وعـلايــم *** بالحـرّة السمـرا مراسيم ورسوم
ما تنجحد يا أهل القلوب الفهايـم *** لاشك قصد مزوّر الأصل مفهوم
هـرج المـزوّر نجـدعـه بالقـمايم *** مالـه سنـد كـلّـه خيالات وحـلـوم
مجد عنزة من فـوق نجم النعايـم *** ولا يختلف بنسابهم كود منجوم
عـزوة ضنا عـنّـاز ماهـم خمايـم *** لهـم بفعـل الطيب عادات وسلوم
أولاد وايـل يـتـعـبـون الـهـمـايــم *** عز الخوي والجار ذباحت الكوم
أولاد وايـل يـوم جـدع الـعـمـايـم *** أفعالهم شهد لها الفرس والروم
كان اعتلوا بكوار عـوج القـوايـم *** باجوا من البيدا رهاريه وحزوم
عـوق الـذي للشّر راغـب ورايـم *** يقفي ذليل مخبّث البـال مهـمـوم
ضـد الـذي كبـده بهـا المـر زايـم *** ردع العنيد اللي تجبّر من الـزوم
يـوم المـغـازي يكسبون الغنـايـم *** عدوهم يرجع من الغلب مصدوم
مدحي لهم ماهو حسوف وندايـم *** من فن قافي سجل الفكر منظوم
وأسندتـه لنسل الشيوخ الحشايم *** الشيـخ الـلي جـدّه لعـنّاز زيـزوم
جدعان نجل الشيخ للطيب شايم *** عليه يسند كـل من كـان مـلـزوم
شيخ الشيوخ لمركز المجد هايم *** الوايلي منعـور من عقب شغموم
كالحيد يذري عن لهوب السمايم *** هجيـر وأيـامه نحيسات وحسوم
مثل المحيط اللي به الموج عايم *** اليـا طمى يقشع دراكيل وعـقـوم
تـرثـت مشايخ تـدرك النعـم دايـم *** مشايخ الويـلان بالأمس واليـوم
بـربـاعـهـم يـلـقـا المسّيـر ولايـم *** وكيـف الرجال مفوّحينه بقمقوم
هذال ريف أهـل الركاب الوخايـم *** منصى الوفود الياهبأ كل مكعوم
أخـوان بـتـلا بالـمـراجـل عـدايـم *** زبن الدخيل وملتجأ كـل مضيوم
ودنياك هـذي بين نصر وهـزايـم *** هـذا بهـا كاسب وهـذاك مهـزوم
دنيـا الشقا تـرمي قـوي العـزايـم *** كثير اللي من جور دنياه مغموم
والحر الـلي يرمي جزيل الحوايم *** اليوم زال وصار في ماكره بـوم
نـوادر صقـور الحـرار الصرايـم *** بوكارها يا حيف سمقان ورخوم
وزعّـت لشخوص القبيلـة قسايم *** أقـولـهـا ولا هـمني كـل مـذمـوم
التعديل الأخير تم بواسطة عبدالله بن عبار ; 11-17-2012 الساعة 06:45 AM
|