هذه القصيدة سبق وأن قلتها بمناسبة أجتماع قبيلة بني هزان في السلمية بالخرج بعد أن حضرت أجتماعهم بدعوة من الأستاذ محمد بن حسن الهزاني حيث كان الحفل عند أسرة الحسن أخوان نوضا :
مبداي باللي شئون الكـون صرفهّـا *** رب الملأ كـربـة الشـدات يـفـرجهـا
العالم الـلي اسرار الخلق يكشفهـا *** مولاي كل البشر يقضي حوايجها
هـو الـذي يـنقـذ عـبـاده ويسعـفـهـا *** بالهاطـل الـلي محيل القاع يدهجها
ومن بعد ذكره زهورالقاف نقطفها *** عذب القوافي صميم الجاش ينسجها
أختـار من جزلها وأتـرك عـذايفهـا *** والهـزله الـلي بها المنقود نسهجها
قيفان من خاطري فكـري يصنفهـا *** ماني من اللي حروف الشعر دبلجها
ولاني من اللي صنوف الهرج زيفها *** يلـوي المعاني عـلى كيفـه ويطعجها
قريحتي هاضت مشاعـر عـواطفها *** هاجت وداعي عريب الساس هيجها
الدعـوه الـلي لي الشغموم زرفهـا *** حـددهـا أبو فيصل وسجّل برامجهـا
في محفل أسره قديم المجد شرّفها *** أخوان نوضا على الطولات منهجها
من جـدها حسن تشرّف مواقفهـا *** من نسل هـّزان مجنـاهـا ومنتجهـا
مشكور من لابتـه يجمع طوارفهـا *** توافدوا من داخل الوسطا وخارجها
وصل القرايب يعبّـر عـن تكاتـفها *** وجمع الشمل يفرح المهجه ويبهجها
والتفرقه تفرق العصبه وتضعفها *** تذهب قدر هيبة العـزوة وتسمجها
من يلطم الخشم نون العين يطرفها *** تنثر من الدمع لو بالكحل يدعجهـا
أفخـر بعزوة بني هـّزان وأنصفها *** شكر الثناء في مجد الأجـواد نلهجها
عزوة فخر نفخر بماضي سوالفها *** ما هـي دعـايه خبـيـر الـفـن روجهـا
هـّزان من عـزوه التاريخ يعرفهـا *** ضمن القبايـل سجـل المـجـد يدمجهـا
هـّزان يـوم الجفا تقـري مضايفهـا *** ضيـانهـم يـجـذب الهـاشل تـوهـجهـا
وأنسابهم من قبل الإسلام ولفهـا *** هـشام بـكـتـابـه المشهـور مدرجهـا
من ساس عزوه تزبّن من يحالفها *** دخـيلهـم يـغـلـب أخصامـه ويفلجهـا
كـم دار قــوم بـنـي وايـل تصيـفهـا *** تسيـد قـطعـانـهـم مـا أحـدٍ يـهجـجها
زمان يـوم العـرب كانـت وضايفهـا *** بالسيف ويـن الـذي يـقـدر يـرمجها
واليـوم بضل الـلي الأشرار كتفهـا *** روس الأعادي بحد السيف دحرجها
عبدالعزيـز الـلي العـدوان خـوفها *** ما راعه أطوابها وراسي بوارجها
سوّه على من غيّر السنه وحرّفها *** بالحق الأبلج دعات الشر يحرجها
زمان صم الرمك تنفض معـارفهـا *** صقرالجزيرة قحوص الخيل يسرجها
يا مـا أعتـلا سابقه بالكون يشعـفهـا *** على العداء حربته بالكف يرعجها
وزمان عوص النضا تومي سفايفها *** ياما بغلس الدجا الداجور يـدلجهـا
كانه سمك عجها وهبت عواصفها *** والخود توايقت من وسط هودجها
الليث الأروع شخوص القوم يتلفها *** بحـدود شلف خصوم الخصم تبعجها
أرض الجزيـرة من الإلحـاد نظفهـا *** وكـل القضايا حكيم الـرأي عـالجهـا
ما غـّره المـال والدنيـا وزخـارفهـا *** أيـضاً ولا غـرتـه زاهـي بـهـارجهـا
أفعال صقر العرب ما أقدر أوصفها *** لـيـث بـلاده بـتـاج المجـد تـوجهـا
وأنجب ملوك سليـل المجـد خلـفهـا *** عـلى مسيره زعيـم الشعب خرجهـا
حكامنـا بالفـخـر بـيـض صحايـفهـا *** طـب النفـوس الـلي كثيـراً تشنجهـا
التعديل الأخير تم بواسطة عبدالله بن عبار ; 09-01-2011 الساعة 05:14 PM
|