الأخ فيصل بن فرحان الرويلي أشار مشكوراً لشطر بيت ورد في ملحمة تبلغ مائة بيت مسندة على الرجل الفاضل حسين بن علي الطويلعي :


*- وهذه الملحمة الشعبية من شعر عبـد اللـه بن دهيمش بن عبار يسند على الفاضل حسين بن علي بن عطـاالـلـه الطويلعي العنـزي

سميت بسـم مكّـون الـكـون تكـويـن *** رب العـباد اللي على العرش متعـال
شـاد السماء وثبـّت مـقـرّه أبتمكيـن *** والأرض مهـدهـا سمـاهيـد وجـبـال
خلـق أبــونـا آدم وسـواه مـن طيـن *** ونفخ حياة الروح في جسم صلصال
محيي رميـم الـلي بـالأجـداث فانيـن *** تحت الرموس الباليه وسط الأطلال
أنبت على يونس من الغرس يقطين *** بأمره وعـاد الـروع لـلخائـف الـذّال
موسى فرج له من زعيم الفراعيـن *** ويوسف وقاه الرب من بعد الأغلال
سبحـان خلاق البشـر نـاصر الديـن *** الــواحـد الـلـي لـلـصعـيـبـات حــلاّل
يا رب عفـوك يـوم نصـب الموازيـن *** ثقّـل عـملنـا عـند تـوزيـن الأعـمال
يـا لـله يـا منـزل تـبـارك ويــا سـين *** بحسناك يـا رب الملأ ترحـم الحـال
نعـوذ بـك مـن كيـد غـلب الـملاعـين *** ونلوذ بـك عـن كـل خائـن ومحتـال
أنـت الـمعيـن أتـدبّر الخـلق وأتـعيـن *** عـندك مصير أرزاق خلقك والآجال
يا مـن لـوجـهـه يـسجدون المصلين *** يا راحم اللي بقوته ضعف وهـزال
من لا رحمته يـا الـولي لاعـه البيـن *** كـل ما تـنهض نوخـه ثقـل الأحمـال
يا رب لطـفـك يـا مـغـيـث المساكيـن *** يا مـربع بالقـاع من عقـب الـمحـال
ومن بعد ذكر اللي له الخلـق راجين *** عبر ضميري من تصانيف الأقـوال
نظمّت عذب القاف ما مقصدي شين *** ولا قـلت شعـري للأجاويـد غـربـال
فاض القريض وفطّـن البال تـفـطين *** يملي وحبر الزاج فوق الورق سال
تـفـجـرت نـفـحات صـدري بـراكيـن *** وتـواصلت موجات فكـري بالإرسال
وبديت أفكر وين صوب الهدف وين *** لكن نـويت أسند على ذرب الأفعـال
أسندت منظوم القوافي عـلى حسين *** نسـل الحمايـل زاكي الـجـد والخـال
الـوائـلي يـفـهـم جـميـع المـضامـين *** والقصـد ما يخـفـاه لـو ربـع مثقـال
أبــو عـلي لـه حـق نـأتـيـه عـانـيـن *** حيثه من أصحاب الفضائل والأنفال
وحنا على عرف المصّيت حريصين *** نشفـق على الطيّـب إلى جابنا الفال
صيته مـع الأجـناب والـربع الأدنيـن *** نسـمع عـلومه بالفخـر كلهـا جـزال
عـنه الـرفـاقـة والأجـانـيب راضيـن *** تسلم يمينـه شـوق منقوض الأقـذال
رام العـلاء مـا طمن الراس تطمين *** شـامت به العـليا على المنزل العـال
قـرم العـيـال اللـي لطيـبـه بـراهـيـن *** لـلعــز والـطـولات والمـرجـلـه نــال
يتبع سلوم الي على الطيب ماشيـن *** حيث ا لردا ماله على حسين مدخال
ما حـاد عـن سلم العـرب والقوانيـن *** ولا عوقه عن واجبه كثـر الأشغـال
عـز الرفيق وريف من جـوه ناصين *** دايـم مـضيـفـه للشغـامـيـم مـدهــال
من عـرفـتي لـه مـدة أعـوام وسنين *** ما مـل ممدوح السجايـا والأخصـال
يلقى الهواشـل مسفهـل الحجـاجيـن *** ما هـو مـن اللـي ناظره كـنه عـقـال
يـنطـح قـبـال مسيـره بـالنبـا الزيـن *** بالقـدر والحشمة وحسن الإستقبـال
وإلى لفـوه اللي عـلى البن شفـقيـن *** قـلـّط لـهـم مـن رايـب الهيـل فنجـال
وحيلٍ تغّرس في شحمهـا السكاكين *** يـفــرح بـغــالـي سـومـهــا كـل دّلال
شــاد وشـمـخ بـالـوائـلـيـة ديـاويـن *** يـجـذبـك ديـوانـه مثـل نايـف الجـال
بـيتـه مـلـم الأصدقــاء والـمـوالـيـن *** مـا صـك بـابـه دون ربعـه بـالأقفـال
تـلقـى مشـاكيـل الـقـروم الحشيمين *** بالمجلس الـلي جلسته تشرح البال
بيت الشرف ضم الرجال الشريفيـن *** بـيـت الـفخـر ما فـيه لجة ولا جـدال
بيت الصخى بيت الرجال العزيزيــن *** بيـت اللنـقـا ضلـه للأجـواد مـقـيـال
نـفخـر بنسل عـطيـل شـم العـرانيـن *** الـلي فخرهـم صار مضـرب للأمثال
موروث من عقب الجدود القـديميـن *** مبطي مـراجلهـم جـديـدات وسمـال
مـن صلب لابـة يلحـقـون المخـلـيـن *** رجـالـهــم بـالـكـون لـلـروح بـــّذال
عـزوة ضـنـا عـنـاز زبـن المجـليـن *** أولاد وائــــل مـلــتـجــأ كــل دخـــّال
ويـلان بـالـلـقـوات سقـم الـمعـاديـن *** أفـعــال ماضيهـم مـفـاخـر للأنـجـال
وإلى أعتلوا من فوق مثل الذوانيـن *** عـوص النجايب للخطر تهذل أهذال
حـمـايـة السـاقـة سطـام الحـريـبيـن *** أدنــاهـم الـلـي كـان لـلـقـفــر نــّزال
أولاد وائـل كـان صـار الـلّغـى شيـن *** كانوأ مدابيس الوغـى ضد من عال
شجعـان وبـوقـت الملاقـا عـنـيـديـن *** يـوم المـنـاحـر وأحـمـر الـدم شـّلال
وأن جالـت الخيلـيـن يـوم الأكـاويـن *** عـنـد الملاقـا مـا يهـابـون الأهـوال
شجعان في عصر المراجل وصلفين *** فـرسان بـالهيجـاء صناديد وأبطـال
كـل العـرب تشهـد لفعــل العـنـزتيـن *** يـا ما بهـم مـن كـل فـارس وخـيّـال
يـا مـا بـوائـل مـن حمـائـل أمسـمين *** وياما بهم من لابس الجوخ والشال
ولا أقدر أعد شخوص وائـل كثيرين *** راس القـرابه لا سمع مدحهـم طـال
عـاداتـهــم ذبـح الـغـنم والـبـعـاريـن *** وذبح العـديـم إلى بطـل كــل عـّـذال
دائـم لـفعــل الـمـرجـلـة مستعـديـن *** ضـد الخصيم اللي من الزوم يختـال
وأن صارت أرواح النشاما نياشيـن *** رجـالهـم هـوشـه إلـى هـاش بخبـال
جـهـالهـم بـالـكون مـثـل المجانـيـن *** وعـقالهـم في ساعـة الغيض جهّـال
وإلى أختلط عج الرمّك بالـدخاخيـن *** نطيحهـم حـاش الهبا وأشهب الّـلال
مـركاضهـم يشبع جياع السراحـيـن *** مثل النمور الضاريه تحمي الأدغال
حمـوا أسباط المصطفـى يوم صفين *** وروس الرجال مرجمـه كنهـا تـلال
صفـوة ربيعـه مـا بهـم قـول تخمين *** رجـالـهــم عـنــده حــمـيـه وزعــال
يـوم الزعيم كليـب قـاد الـمضاعـيـن *** حرر بني عدنان من جـور الأغـيال
أوقـد عـلى خــزاز بـالـلـيـل نـاريــن *** مثـل السعايـرضوحها يشعـل أشعال
ويـوم المناذر جـو على بكـر لاجيـن *** جـوهـم صناديد العجم فـوق الأفيـال
ذي قـار تشهـد بـانتصار الشيابـيــن *** وجـمع اللهازم سار للفرس صّـوال
حاموا على الحرقـا هنوف المزايين *** هـاني ذراهـا سـتـر ربـات الأحجـال
صالـوا وبـالروح العـزيـزة أمفاديـن *** مـا رابهم يـوم اللقـاء كثـر الأزوال
مـفـاخـر الـويـلان مـبـطي وهـلحيـن *** معـروف بـالتـاريـخ والـمجـد لازال
أفـخـر بـتمجيـد الـرجـال العـريـبـيـن *** حيث الضراغـم مثلها تنجب أشبـال
أفخـر بـهـم والنـاس بـالفعـل داريـن *** مـا ينجحـد تاريخهـم عـبـر الأجيـال
عـنـاز مـن خيبـر إلـى حـدود حطين *** الجـمع واحـد والمعــادي بـه أخلال
وش عـاد لـوهـم بـالمنـازل بعـيـدين *** مـن صلب وائـل كلهـم عقـب رجـال
مـن لا أعـتـزا كنه كسير الجنـاحيـن *** كوبان مثـل العوشـزة ما لهـا ضلال
وحنـا بفعـل أهـل الفخـر مستعـزيـن *** ولا هـمـنـا مـن كـان لـلـهـرج نـقـال
ما نطاوع اللي يقسم الجـمع جمعين *** ولا نـستـمـع لأقـوال حـاقــد ودجال
سـود الضمايـر بالمـراميع مخـطيـن *** يسعـون بيـن الربـع بالقـيـل والقـال
الـمحـرشيـن الـمخبثيـن البغـيضيـن *** اللي على الصاحب مناحيس ورزال
عـوج المشاور والعفـون الـرديـيـن *** قـشـر الـنـوايـا والـهـلابـيـج الأنـذال
يا للـه عساهـم للمرض والطواعين *** مـا هـم فـقـايـد جعـلهـم بألـف سلال
والناس مـن خلقت أشكـال وتلاوين *** فـيـهـا تـفـاوت بـالطبائـع والأشكـال
مار البلا اليا صارت الروس رجلين *** وتعـانـقـت هـام الجـماجـم والأذيـال
والـذيـب الأمـعـط ذلـلتـه السعـاديـن *** والليث الأروع صار يخضع للأثعال
وأضحت صواريم الهدد والشياهيـن *** تلبد ومن طيـر الرخم صابها أجفال
واليوم أشوف الـلي رصيده ملايـين *** مـا يـقـتـنع بالـمـال لـو يكنـز الـمـال
يجـض مثـل اللي تضجـر مـن الدين *** كـنـه فـقـيـر ولا بـجـيـبـه ولا ريــال
وأشـوف كـل الناس يا حول شاقيـن *** الشـيـب والشبّـان وكـهـول وعـيـال
يـا الـلي بدنياكم عـلى الـدوم لاهيـن *** حاذورمـن كثـر التهـاون والإهمـال
يـا الآدمي حذراك مـن قـول بعـديـن *** أغـنم شباب صباك قبـل الأضمحلال
مـا يشبـع الجائـع لحاس المواعيـن *** والـرس مـا يملأ مغاريـف وأسحـال
دنيـاك يـا مـا فـرقـت مـن مـقـاطيـن *** لا تـأمـن الدنـيا تـرى الـوقـت مـيّـال
وش قال عنها نوح من بعد الألـفين *** دار الـفـناء مـن طـبهــا شـد رحــال
وآخـر مصير العبـد لو عاش قرنين *** لا بـد يـذرع لـه مـن الخـام تـفصـال
والـعـبـد فـي دنـيـاه مـالـه حيـاتـيـن *** ولا يـرجع الـلي فوقـه الرمل ينهـال
حيث القمر لـو غـاب عقـب الثلاثين *** يعـود فـي جـو السماء بـدر وأهـلال
والـلي اخطاهـم طولـت بـالمحاجيـن *** مـا ظـنتي عقب الهرم عادوا أطفـال
يـفــتـر عــداد الـزمـن بـالـطـبـالـيـن *** بـالثـانـية يـأخـذ مـن العـمـر مكيـال
تمضي الثواني كنهـا رمشت العـيـن *** أسـرع من اللحظة سريعات واعجال
نـعـوذ بـالـلـه مـن رجيـم الشياطيـن *** مـولاي يـرشدنـا على خيـر الأعمال
هــذا وتــم الـقــاف مـائـة وبـيـتـيـن *** ونبـع القوافي صافيه ما بها أحثـال
وصلوا عـلى الهـادي ختام النبيـيـن *** اللي على درب الهدى يهدي الضال



يتبع