موقع قبيلة عنزه الرسمي: الموقع الرسمي لقبائل ربيعه عامه و عنزة خاصه - أبيات من شعر فارس زعل الضميني تعرض لمن يجاريها

أبيات من شعر فارس زعل الضميني تعرض لمن يجاريها

قال الشاعر فارس بن زعل الضميني هذه الأبيات وهو يطرحها لمن يريد مجاراته والأتفاق مع رأيه أو مخالفته يقول :

لأجـل الـمـسـيّـر نـفـتـح الـبـاب كـلّــه *** من خوف يرجع لا لقا الباب مردود
ان شـفـت واحـد يـقـفـل الـبـاب قـلّــه *** تـراك مـا انـت بقفلة البـاب محمـود
الـبــاب خـلّــه دوم مـفـتـوح خــلّــــه *** ألا اليانـك صـرت مـا انـتـه بموجود
وبيت الرجـل لا صـار مـا أحـد يـدلّـه *** مـاهـو حـري بهبت الريح والجـود
طيـب الـرجـل يـبـين لـك مـن محـلّـه *** ربـي جعـل خلقه عـلى خلـقه شهود
ومـوتـك عـزيـز ولا حـيــات المـذلّـه *** أخيـر مـن صبـرك عـلى كـل منقـود

قال عبدالله بن عبار هذه الأبيات مجاراه لأبيات فارس بن زعل الضميني :

يـا فـارس المقـصود نعـطيـك حـلّـه *** حـيثـك فهـيـم وتفتهم كـل مقـصـود
الـيـوم صـار بـفتحـت الـبـاب خـلّـه *** أخـبـرك بالاسبـاب والقـول مسنـود
الـيـوم كـل الـنـاس تـسـكـن بـفـلّــه *** ولا قـصـد رد البـاب للضيـف لادود
يخشى تجيـه مـن السرابيـت شـلّـه *** شـلّـه مـن السرقـان دوارت الـفـود
وأن شيل مـن بـيتـه دراهـم وحـلّـه *** نـدم وقـال لـفـتـحـت الـبـاب مـاعـود
وأن أشتكى قـيل السبـب منـك زلّـه *** يـامـا هـفـا لمثك من الناس مفقـود

صح السانك الشاعر والأديب ابو مشعل وصح السان الشاعر فارس

نشكر الاخ الشاعر فارس زعل على طرح هذا الموضوع با ابيات جميله تعبر عن مفهوم لدى الباديه وكانت الباديه والقبائل لايسكنون الفلل والقصور او كانو يسكنون قرى معروف جيرانهم . وربعهم واما اليوم كما تفضل الشاعر والاديب الاستاذ الكبير ابو مشعل وهو الجواب الحقيقي
في هذا الوقت والذي لايخفاك عن مايحدث اذا كان الباب مفتوح ؟ مرة كان بابنا مفتوح اهمال منا جيت للديوان لقيت التلفاز والسيفر والاسطوانات مسروقه . ومرة جهاز الكبيوتر وطاولته الصغيره بس مكانه وعقبها تآدبنا وانا اخوك الباب وحنا قاعدين نغلقه . ولكن ترانا نحمل المسئوليه للشعراء الذين يبون البيبان مفتوحه . عليهم الرجوع الى الوقت الحالي ولايربطوننا بماضي مانقدر نمثله اليوم سوى الاخوه وصلة الرحم والواجبات العامه والتواصل كما قال علي ابن ابي طالب رضى الله عنه (اعرف نسبك لتصل رحمك)

صح لسان الشاعر فارس
وصح لسانك شاعرنا ابو مشعل
صوت وصدى رائعين لله دركم مبدعين