|
أبيات من شعر فهدالفليحي مهداه الى الشيخ متعب الفققي مع التحيه يا متعـب الـنـاس لاتسمع لهــرجـتـهـا *** خـل السـواليـف يابـن العـم مقـذولـه لا تنزعج لـو تـزيـد النـاس ضجــتـهـا *** مادامنـا بخـيـر والاوضـاع محـلـولـه بعـض الاوادم تبيـن مـن عـجـاجـتـهـا ***اقـليـّل العـرف ناقـص قـدر محصولـه دائم ورى النـاس يـتـبعـهـا بغـلطتهـا *** يجنح عن الصدق ويكذب كل مايقوله نـفسه عـن العـز ما تـرقى لهـقـوتـهـا *** يـعـيـش الايــام والاحــلام مـجـهــولـه والناس دائـم تصـج الـراس لـجـتـهـا *** ياكثـر ماشفـت من اشياء غيرمعقولـه والشعـر يسمو ابيـوتـه في طـراوتهـا *** لياجـاء من الـراس والابيات مفتـولـه يـكـوي نـفـوساً تـبـيـن لـك عـداوتهـا *** ويـشـرح كـبـودٍ تـحـبـك دوم مقبولــه والـنـاس معـروف يامتعـب حصيلتها *** اكـيـد بـتـقـول لـي الـنـاس وشــولـــه وانـا بـصـرح عـن نـفسي ورغـبـتهـا *** النـفـس مـن طـاري الانـذال معـلـولـه بعض الاوادم مـاهـي كـفـو محـبـتهـا *** الـلي مـن الديـن والمعـروف مغسولـه ترى اكثر الناس ماتنومس صداقتها *** صحيح من قـال عـنها نـاس مـبـدولـه والا الاجـاويـد تـبـقـى فـي مـعـزتـهـا *** لاشـك فـي هـالزمن ياحـيـف مقـلـولـه واقـبـل تحـيـات مـني فـي نـهـايـتـهـا *** دام الـشـعـر اتـجـاهـك حـلـت احلـولـه ردمتعب الفققي على كلمات الاخ الشيخ فهد الفليحي النومسي معرف النوامسه بالقصيم الموجهه لي بعد زيارته لنا من اسبوع يـافـهـد زيـارتـك مـزيـن حـلاوتـهـا *** والي مثل شرواك يبو سلطان مقلوله شرفـتنـا والنـفس طـابـت بهجـتهـا *** خذ صمايل من صديق عطاك مدلوله ونـدري ان الايام لادارة بـدورتهـا *** مـرات تصبح يـد الـرجـال مشلـولـه والجمره الي محد يعرف حرارتها *** الا أن وطاها يا أبو سلطان برجولـه يجهـل الحـلو من لاتذوق مرارتها *** دنـيـاك هـذي يـا أبـو سلطـان مجهوله بعض الأودم ظروف الوقت حدتها *** تسكت ولو هي من الأوضاع معـلولـه كل المصاعيب عـنـد الـرب حلتهـا *** كلماتك وصلت يا أبـو سلطان مقبوله قال عبدالله بن عبار هذه الأبيات مجاراة لقصائد الأخوين فهد الفليحي ومتعب بن عبدالهادي الفققي : يا حي رجـالٍ يرفـع الـراس سمعتهـا *** والـكـل منهـم يطـابـق فعـلـه لقـولـه فهد ومتعب شخوص رجـال عادتهـا *** أهـل ضمايـر عن الأضغـان مكفـولـه أفـعـالـهـم كـل أهـل الـلـوم سـكّـتـهـا *** بهـم الحميـة وبـهـم أخـلاص للـدولـه وأهل الفضايل قمح من كان يشمتها *** الخـايـب الـلي يشيـل العـيـب بحثولـه بعض الرجاجيل تبـدي لـك مودتـهـا *** وتنطح قـبـالـك فـي عـبارات معسوله وأن كنت غايب تبوح بسـر غـايتهـا *** وسيوف الألسن بهرج الظلم مسلّوله سود القلـوب الـلي تـروّج دعـايتهـا *** بـعـلـوم كـذب عـشر مـرّات مـدبـولـه واللي بصدره صنوف الحقد يكمتها *** ينفث سمومه ويغوي كـل من حـولـه الحاسد الـلي رجـال الصدّق ينعتهـا *** بالهيف والزيف حيث الكذب له سوله الشجرة الـلي زرعها بغـيـر منبتهـا *** قـطّـع نـمـاهـا وبالصعانيـن مشتـولـه كانه قطع جذعها وش عـاد قيمتها *** ينشف ثراها وخضر الأغصان مجدوله |
ابو مشعل شرف لنا مجاراتك بهذه القصيدة التي هي ليست قصيدة فحسب بل حكمة صيغة بإبداع ونظمت بموهبة فظهرت هذه النادره الشعرية .. صح لسانك ابو مشعل كلمة شكرالاتكفي ولكن الكلمات وقفت عاجزة عند هذه الرائعة التي تغنى بها شاعر القبيلة ومؤرخها الأول الاستاذ عبدالله بن عبار حفظه الله ورعاه شكري وتقدير لاخي الشيخ متعب بن عبدالهادي الفققي والشكر موصول لادارة المنتديات والقائمين عليها
|
الله درك يا ابو مشعل اكرر كما قال ابو سلطان مجاراتك شرف لاي شاعر نظرا لا اهميه معاني كلماتك وعمقها وتصويرها لقواميس نهج الرجال والمجتمع -- علما ان مناسبة هذه القصائد المتبادله بين وبين الاخ الشيخ فهد الفليحي هي بادرة فعل الطيب الذي قام به اثناء حادث جرى لاسرة من قبيلة الدوام بضواحي بريده وهم قادمين من الحج وصار عليهم حادث توفى بالحادث عدة اشخاص وكان الاخ ابو سلطان هو من باشرهم وعمل كل فعل الخير والواجب تجاه هذه الاسره ومن حضر من الرياض والمناطق الاخرى وكان هو معزبهم وادا كل الواجبات من مساعده واستضافتهم مشكورا ونعلم ان ذلك غير مستغرب من امثال هذا الرجل المعروف باالطيب على قولة الشاعر
فرحان مساعد على ما اعتقد يوم يقول : الطيب لاتستغربه من هل الطيب= الي لهم في منهج الطيب خبره اوسع على الاجواد من فيضت شعيب= واظوق على الانذال من تقب الابره رعاك الله يا ابو مشعل |
شكراً للأخوين الأفاضل الشيخ فهد الفليحي النومسي عمدة النوامسة بالقصيم والشيخ متعب بن عبدالهادي الفققي شيخ قبيلة الدوام من العبدة من السبعة على حسن الثناء وبخصوص أبو سلطان فليس غريب منه الطيّب لأنه من وجهاء الرجال وهو صاحب ديوان مفتوح ودائماً يرودون ديوانه الرجال الأفاضل وهو رجل صاحب علاقات طيبة مع ربعه ومعارفه ومن شخصيات موضفي الدولة وقد عرفته وعرفت عنه اللّين واللطف والحمية والكرم وحب عمل الخير وكذلك أبو عبدالله يحمل كل الصفات الحميدة وشهادتي بالرجلين مجروحه ولكن الحق يقال
|
| الساعة الآن 04:09 PM. |
Powered by vBulletin® Version 3.8.8 Beta 3
Copyright ©2000 - 2025, Jelsoft Enterprises Ltd