موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

كان الشاعر المرحوم عايد بن ضافي الجلوي باطراف مدينة الجوف فجاء راضي اللهيبي وكان صديقه ايام الشباب وليس له به عهد حيث لم يتقابلوا لفترة طويلة من الزمن فجاء راضي ولم يعرف ابو عدوان وكذلك ابو عدوان لم يعرفه فاستأذن راضي وذهب فلما علم ابو عدوان ان هذا صديقة لحق به وقال له هذه الابيات :

يابن سماح انكرتني يامحبوبي = خليتني واقفيت للربع ذولاك

وانا صديق ن لك ولاني لسوبي = وان شفت صدات الجفا منك ماشناك

ياصار عندي ماهفا لك وجوبي = وسني وقم سنك ومرباي مرباك

كان ماتبي المسيار منت مغصوبي = وان جيتني يالهيلعي قلت حياك

مايمشي الاقدام غير القلوبي = ومن ماشتهى لو تفتح الباب ماجاك

مابيك تغفر لي سوابق ذنوبي = ولا بيك تعطيني من اطراف دنياك

والله لو ماملك غير بشتي وثوبي = اني عزيز النفس مثلك وشرواك

جاني خبرك انك حسنت الشنوبي = وحطيت لك لحية وبالجيب مسواك

لا انته شماليا ولا انته جنوبي = عجزت لاميز مذاهبك والقاك

خابرك يوم انك ضحوكا عجوبي = قبل بياض الشيب ياشع ملحاك

يوم انت عوقا للهنوف النصوبي = اللي تروقب بالوعيدة تحراك

ذكرتني سنة ربيع الخبوبي = يوم البكار يداحمنك بمفلاك

يوم انت باطراف العرب لك ذهوبي = وضحا تبي تقفي بهن مع رعاياك

البكرة اللي ماضرت للركوبي = ترجع بمفلاها على صوب ممشاك

لوشفت منزلهن خلي ن تهوبي = صفقت باليمنى على كف يسراك

يامسندي سكر نسيم الهبوبي = يوم انقطع عند الرعابيب طرياك

شمسك عصير وهورفت للغروبي = واللي تخبره باول العمر خلاك

وليا احتريت احتر عليم الغيوبي = لاتحتري يرجع زمانا تعداك

لو سالت الشعبان سيلا سحوبي = ما ظنتي يرجع مثل وقتنا ذاك

الله يفكك من عكاش الدروبي = ومن البناشر والمطبات ياقاك

وعساك ماتسكن ببيتك عزوبي = والله يخلي لك ذلولك ومعزاك