موقع قبيلة عنزه الرسمي: الموقع الرسمي لقبائل ربيعه عامه و عنزة خاصه - اليوم لاتشكي على الناس حاجتك أصبر وتلقى عند ربك فرجهــا

اليوم لاتشكي على الناس حاجتك ** أصبر وتلقى عند ربك فرجها

الناس ماتقضي لزومك وعازتك ** والنفس من طاوع هواها سمجهـا

الناس ماتقـدر مجيــك وشرهتك ** لاجيت سهاج المراجل سهجها

لإحتجت بعض الناس صدت وخلتك ** والحنضلـة يعافها من علجها

اليوم ماينفعـك لو هـوّ قرابتـك ** ودعـّواك شف مدخالها ومخرجها

أحفظ عن دروب المذلـة كرامـتك ** في مايعيبك لاتسبب حرجها

هذا الزمن ماحد(ن) يحس بمحستك ** لو حولك العالم تكاثر لججها

لاتعتمد على أصدقاك وجماعتــك ** وظروف وقتك لاتبين ضججها

تبييـن حاجاتك لنـاسِ توبتـــك ** يجعل عليك أعداك تكثر حججها

هامتك لاتنزل مع الناس هامـتك ** أحشم جنابك عن سوالف خمجها

ثقتك في نفسـك تقوي عزيمتك ** لو عنك لفـاج الحقايق لفجها

أنا أدري أن أصحاب الأموال غرتك ** وأهل الصلج سبت بلاها صلجها

إن كان شيبانك على الطيب ربتك ** لاتملـج اللمجه مع اللي لمجها

عز الرجـال اللي على الطيب عزتك ** وأهل المظاهر لايغرك روجها

أصبر ولو عازات الأيام حستك ** لابد ماربـك يعــــدل عوجهــــا

تفرج ولو كان الليالي تحدتـك ** للنفس عز ولاتنـزل درجهـا

للنفس عز النفس تلقى معزتك ** لاتهينها لو كان تشرب همجها

وأن جيت خل الناس تشفق لجيتك ** أيـاك لأيصبح مجيـك زعجها

على النقى بيـّن مع الناس وقفـتك ** والهرجة الشينة على من هرجها

وسمعتك لأتخرب مع الناس سمعتك ** ورجلك عن اللي يسقط النفس عجها

في مايذل النفـس لاتطيع رغبتك ** ومن حج نفسـه عند نفسه عجها

للناس لاتنـزل وقارك وشيمـتك ** لو جاز لـك ملبوسها ومهرجهـا

أن ماغناك الله تـرا الناس ماغنتك ** يغنيك من سر النفوس وبهجهـا

وهيبتك لاتفقد مع الناس هيبتك ** والنفس عن ماينقص القدر مجها

لاتهين مابين الرجاجيل قيمتك ** مهمـا قسى وقتك ومسك حوجها

الشاعر / "خلف المحدى الغبين العنزي"

http://www.alfd3aan.com/vb/images/myframes/7_cdr.gif