موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

قصائد مساجلات جديده

قال الشاعر فرج بن عوده الجعفري هذه القصيدة يسند على عبدالله بن دهيمش بن عبار :

يابو مشعل سـود الليالي تقلب الدنيا ظـلام
ما تميل الاعلى الـلي طاح بـه حظه ومـال

تـقـلب الـراحـة شقا وتقـلب الهادي زحـام
تقلب الفرحه حـزن وتودع الممكن محـال

تهدم آمـال وطموح وهـمه وحـلـم ومـرام
تغرس يأس وشكوك ضعف رادة واختلال

دارت الدنـيـا عـلي ووجهت كـل السهـام
الهدف صدر قوي الباس وحلم وطول بال

عادتي مشكي زمـاني ولاني معطيه اهتمام
لو يجيني كل يـوم مـن الشقا كثـر الرمال

كـل حكم الوقت بأمر الواحد الفرد السلام
العـليـم الخـالـق العـدل الخبـيـر المـتـعـال

الأمل في رحمة الله فيه عصمه واعتصام
ما يهـز الوقت مؤمن يرجي الـلـه باتكال

ارفع كفوفي لربي في الشديدات والعظام
من نطق بالـرب واثـق فارقه همه وزال

اعـطي الـزمـان ظهـري ثـم اتوسد وانـام
وادري ان الله كريم وتالي الدنيا الـزوال

واللـيـالـي مـا تـذل الا الـذليـل ومـا يـلام
مـن يلوم الـلي خـذا دنياه هم وراس مال

الشقا والخوف دايم ندعسه حـدر الكزام
ثابـت ولاني بطايح حتى لـو طاح العـقال

شامخ بالعـز والـلـه عـزني نفس وهـمام
مـا حـنيـت الـراس للـدنيـا وسـود الليـال

يا أبن عـبـار الاهانـة من قليل الأحتـرام
مالها عنـد الحليم الشهم بالحـلم احتمال

جـاني الناقص يكمّل نقصه اللي فيـه دام
جاهـل جاني يقـول الشعر ينطق ما يقال

الشعـر هـو مـا يعـرفـه يفتكـر انـه كلام
والسوالف باعتقاده ازين واكثـر جمـال

لكن لو أنه سألني قلـت شاعر يا سلام
الشعـر نظمه مشاعر كله شعور وخيال

يفتخـر بالشعـر كنه فارس الشعـر التمام
اللقب فارس زمانه والزمن يطرح سؤال

قال انتـه لست شاعر قلت امسك يا غلام
الشعر تكـرم حروفه عـن مهابيل وهـبال

الشعـر ينطـق بحكمـه هـمته هـمّت كرام
الشعـر طفـل همومـه كلهـا لعـب العيـال

الشعـر عنـد القبايل فـيـه حكمه واحتكام
ترغبه كل الشعوب جايـز ونظمـه حـلال

من زمان الجاهلية الشعـر ما هـو حـرام
مـا يطيـع الا يطـاع ولا يشيـل الا يشـال

ان وصفت الحرب طاحت كل رايات السلام
وان وصفت السّلم طاحت كل رايات القتـال

وان وصفت البنت صارت حلم للناس وغرام
وان وصفت الـلي ابيها ذابـت قلوب الرجـال

وان وصفتك قـال شعري يا بشر والله حـرام
لا تسمون السـوالـف شعـر يكـفـيـكـم ضـلال

يابو مشعل لا غرابه لا استوى ناقص وتـام
ما يفرق وقـتـنـا بيـن الـردي وابـن الحـلال

قال عبدالله بن دهيمش بن عبار العنزي هذه القصيدة
جواب لقصيدة الشاعر فرج بن عوده الجعفري :

ابـتـدي باسـم الكريـم الـرّب خـلاق الأنـام
الـولي رب الخلايق مـا عـلى غيـره مـآل

أذكـر الـلـه فـي كـلامي بالبدايـه والختام
نتـقيـه ونستعينـه ونطـلبـه فـي كـل حـال

وبعد ذكر الله بديت القـاف ينظـم بانتظـام
فرج القرم أبن عوده قال وارسل لي مقال

ارسله بالواتساب وناب عن زاجل حمـام
قيل من عذب القوافي ارسله وافي الخصال

أنت شاعر يابن عوده انت من الشعاّر فام
دوم نسمع لـك قصيـد ودوم تلقي باحتفال

دام عـزّك يالمعـرب من جدودك والعـمـام
يالأصيل أبن الأصايل من عمامك والخوال

كنت أريد الرد حالاً لك يا أبن عوده شمام
لكـن القـاف المكـرر شاب معـد لـه مجـال

يالزميل أرجوك تسمح ما على مثلي ملام
دوم تجيـني قصايد من جنوب ومن شمال

يا أبن عودة ترى الدنيا كـل ما فيها حطام
لا تـقـول أن اللـيـالي حـطـمـت كـل الأمـال

يا فـرج دنـيـاك هـذا طبعهـا يا أبـن الكـرام
نوب تشبه رس قيظ مـاه يغـرف بالسحـال

كان شفت الحـر يخشى من دواريج النعـام
والوحش سرحان هج وجفله صوت الرخال

يا فرج هرج المجالس بالمجادل والخصام
شبّه لشوك الكبـود أو كـما ضـرب النبـال

يا فرج بين القرايب ما يجب يحدث صدام
وأنت يا فرج خبرتك دايـم علـومك جـزال

اسـمـع القـول وتجـاهـل لا تفـكـر بـالكـلام
وأعرف أن الـلي تكلّم يدري أنك لست ذال

السوالـف لا تـهـمّـك وانـت بالعـلـيـا سـنـام
انـت مـثـل الحـر دايـم ماكـره فـوق الجـبـال

الـشـجـاع الـلـي تـقـدم مـا يـفـكـر بـانـهـزام
وانت دايم يابن عوده صامد وهرجك صمال

بـه حـكي وانـت بكرامـه حطـه بوسط الدرام
وبه حكي مثل الجواهر يوضع باحسن مشال

أنت من عزوه عزيزه عصر مصقول الحسام
خصمهم يخشى خطرهـم حين يشتـد النضال

عـزوتك باليـوم الأقشر باللقاء مثـل الهـوام
كم معادي هج عنهم اسرع من جري الغزال

يوم كانوا بالصحاري في زمن سود الخيـام
عندهم مقرا الضيوف وعندهم صفر الدلال

أهل الجدعا من زبنهم ما يخاف ولا يضام
جارهـم دايـم عـزيـز ولا وجـد منهـم خـمال

وكم قصر كالحيد شامخ زيّـن بنقش الرخام
راح عصر اللي سكن به بالعجل شد الرحال

ويـن تبـع ويـن جرهـم ويـن تـنـوخ وجـذام
ويـن الأجيـال القديمه كلهـم وسـط الـدحـال

وفي ختام القول أصلي عـدد منبوت الثمـام
وعـدد حجـار البسيطـه بالـروابي والـتـلال

عـلى الـلي أهدى العباد وصار للأمه أمـام
أسـس الـديـن الـحنيـف وأذن بـأمـره بـلال

كتب الشيخ الشاعر ابو عمر شايح بن ناجي الرشدان
بسم الله الرحمن الرحيم
المكرم الأخ العزيز الشاعر الكبير عبدالله بن عبار العنزي ابو مشعل حفظه الله تعالى السلام عليكم ورحمة الله وبركاته وبعد اخي العزيز إليكم هذه الأبيات الآتيه: قلتها نظراً لطيبكم المعروف لدى الرجال الطيبين الذين مثلكم وشرواكم ونحن نفتخر ونعتز ونتشّرف فيكم في كل وقت كان لأنكم فخراً في سمعتكم الطيبة المشهورة لقبيلة عنزة بصفة خاصة وكذلك بين القبائل الأخرى بصفة عامة ونأمل عدم المؤاخذة في التقصير لأني لست شاعر ولكن مجرد اجتهاد مني وتقدير لكم وفي نفس الوقت تعتبر الأبيات نصيحة عامة لأتباع أوامر الله سبحانه وتعالى وكذلك أوامر الرسول صلى الله عليه وسلّم وابتعاد عن الباطل نعوذ بالله من ذلك وهي كما يلي :

1- نـطلـب الـلـه ستـره الضـافـي *** وحــنـا نـعــبـده صـلاويــــه
2- ورسـولـه لـلـحـق عــراّفــــي *** وضّـح لنـا احكـام شرعـيـه
3- عـبـدالـلـه عـسـاك مـتـعـافـي *** يـا الـقـرم يـا طـيّـب النـيــه
4- يـا عـل مـا جـاري خــلافـــي *** ودايـم بـعـيـدن عـن الـسيـه
5- قـلبـي لكـم ابـيـض وصـافـي *** وعـن حالـك رد الخبـر ليـه
6- كـلـن عـرف طيبـكـم شـافـي *** والضيوف الياجوك مقـريـه
7- ايضـا انـت بـواجـبـك وافـي *** وشاعـر بالميـه عـلى مـيـه
8- مـتـواضـع حـكيـم وسنـافـي *** عـقـب رجـالٍ تنطـح الهـيـه
9- من ابـوك كسبت الاوصافي *** صفات مـن الطيـب مـرثـيـه
10- يـوم أن بـه الحـرب وقـافي *** شجـعـان مـن سـاس جـديـه
11- ومثلـك حـرن فوق مشرافي *** فـي قـمـة جـبـال عــالـيـــه
12- يـفـداك مـن كـان بـلافــــــي *** الـلي من مضمـون حـيليـه
13- وبكـذبـه اسـرع من الهـافي *** فـي كـل الأوقـات وهـمـيـه
14- ولا يحسـن للهـرج خطـافي *** ولا يميـّز هـذيـك مـن ذيـه
15- بـدربـه يمشي حـد ميهـافي *** ومـخـالـف لسلـوم سـنـيـه
16- وبـالـزود لـلـكـذب حـلّافـي *** لـلـذمـة بـيـاع مـشـريــــــه
17- واليـا هـرج وي سـولافــي *** والمـرجـلـه عـنـه مـنـفيـه
18- يـنـقـد عـلى النـاس نقـافي *** يـشـبـه بـالـفـلاه هـكـريــه
19- وبـقـولـه يـقـال مـيـهـافـي *** مـا شفـت مـع البشـر زيـه
20- بالحـيـل مـخـادع ولـفـافـي *** مـا تـامـنـه يـشبـه الحـيـه
21- ومـثـلـه كما سمق خوافي *** ما قيـل انـه صـاد قـمـريـه
22- وفي بخله بين العرب نافي *** ونفسه على الشين مبنيه
23- من طبعـه يصد عن اللافي *** ولا يفرح لو كان هو خيه
24- وعـلى القـدم ماشين حافي *** لـو يمـلـك بالبنـك مـالـيـه
25- نـفا الـرجـولـه لهـا عـافي *** مـا عنـده احساس منسيـه
26- والطيب له انواع واصنافي *** عند اللي شرواك ممشيه
27- راعي الردى صاحب اهدافي *** يعيش بمذهـب يهوديـه
28- ومرافـق لأبـليس ميـلافـي *** توجـد بـه خمسين جـنيـه
29- ونـعـوذ بـالـلـه يـا كـافـــي *** من كـل شرور الحـراميه
30- واسمـح بالتقصير بالقافي *** بجهـدي الأبـيـات مهديـه
31- ومثـلـك للقيـفـان عسّـافي *** تاخـذ مـن افـكـار منقـيـه
32- ونطلب من الواحد الشافي *** وبالجنة تجـزاه حـوريـه

قال عبدالله بن دهيمش بن عبار هذه القصيدة جواب لقصيدة الشيخ ابو عمر شايح بن ناجي الرشدان :

1- اكـتـب رسـالـه بـشـفّـافـــي *** وأرسل من الشعر برقيه
2- فوق الذي يرجف ارجـافي *** يـقـطـع ديـارن خـلاويــه
3- يـشـبـه لـسيـارة سـعـافـي *** ما هـو تقـل مشي حصنيه
4- يلفي على ريف الأضيافي *** يـفـرح اليـا جـوه طـرقـيـه
5- ابـو عـمـر عـالي اهـدافـي *** نظّم الشعـر وارسلـه ليـه
6- شايح بدأ الهرج بأنصافي *** فـي بـدع شـعـر الهجينيـه
7- مـا يستمع منطـق هـلافي *** الـلـي مـهـاجـيـه مـلـويـــه
8- والصاحـب لخـملتـه رافـي *** عنـد أبيض الوجه مرفيـه
9- ينشـد عـن العـلم متشافي *** عـسـاه مـا زار صـحـيــــه
10- اخبـرك انـا مابـي خـلافي *** واسمـر مـع الـربـع ليـليـه
11- ما صـرت يالقـرم بلحـافي *** ولا دجـت بـديـار مـابـيـــه
12- الجـو بـأمـر الـولـي دافـي *** ويـهـل مـن غـيـث وسميـه
13- مـافـيـه عـجّـه ولا سـافـي *** والـكـل مـرتـاح بـالـفـيــــه
14- تعـيش يا نسـل الأشرافـي *** من روس عـزوه حمـاويـه
15- يوم اللقاء بحدب الأسيافي *** بيـديـهـم سيـوف مـحـنـيـه
16- يا مـا بـهـم كـل غـريـافـي *** كـان انـتـخـوا بـالسنـافـيـه
17- الغـزوا مـن جمعهـم خافي *** قـطـعـانـهـم دوم مـحـمـيـه
18- تـرعـابـهـم حـم الأشعـافي *** بـأقـصى الـديـار الشماليـه
19- وبحـدود عرنـان وروافـي *** تـرعـى قـفــر كـل قـفـريـه
20- جـعـافـره تـقـعـد الـغـافــي *** بـأصـوات بـنـدق وردنـيـه
21- برباعهم بيـض الاصحافي *** دايـم مـن الـزاد مـمـلـيـــه
22- بصحونهـم حيـل وخـرافي *** والـرز يـغـرف بـصـيـنـيـه
23- يا أبو عمر نكشف الخافي *** ونشـرح مواضيـع مخفيـه
24- يا شيح نـور العـدو طـافي *** وعـنـدي مـن الربع منقيـه
25- ضـد الـذي حـظهـم هـافـي *** الـجـاحـد الـلـي كـثــر غــيـه
26- هـم يحسـدونـي بـمـيـقـافـي *** وبصـدورهـم تـقـل شبـريـه
27- الـلي عـلى السـب مزهـافي *** والـنـاس بالشـرع مـنـهـيـه
28- مـن بـه حسد جـاه خفخافي *** وذمّـت هـل الظـلّـم مهـفيـه
29- تسمـع مـلافيـض الأشفـافي *** مـثـل حــراج الـشـريـطـيــه
30- والـلـي لـمـجـهـودنـا نـافـي *** ذاك الـذي مـنـكــرن حــيّــه
31- كـلـن بــدأ يـبــرم كـتـافــــي *** يـنـوون تـكـبـيـلـت يــديــــه
32- مقـصـودهـم دونـه اصـدافي *** شـرع وحـكّـام الـسـعـوديـه